Ди зэІущІэхэм дыщыкІуэм деж екІуу зыщІэтхуапэр сыт?

Мы брошюрэм ит сурэтхэм къыщыгъэлъэгъуащ Иеговэ и Щыхьэтхэр екІуу хуэпауэ зэІущІэхэм зэрыкІуэр. Ди теплъэмрэ ди щыгъынымрэ мыхьэнэшхуэ щІеттыр сыт?

Ди Алыхьым пщІэ зэрыхуэтщІыр къыдогъэлъагъуэ. ДауикІ, Алыхьым и дежкІэ нэхъапэр цІыхум и теплъэракъым, атІэ и гум илъыращ (1 Самуила 16:7). Апхуэдэу щытми, Иеговэ дгъэлъэпІэну дыщызэхуэсым деж, дэ дыхуейщ Алыхьымрэ ди къуэш, ди шыпхъухэмрэ пщІэ зэрахуэтщІыр къэдгъэлъэгъуэну. Къэрал Іэтащхьэм и пащхьэ диувэн хуей хъуатэмэ, дауикІ, щыттІэгъэнур егупсысауэ къыхэтхынут. Абы ещхьу зэІущІэхэм дыщыкІуэкІэ екІуу зэрызытхуапэм къегъэлъагъуэ «зэманым и Пащтыхь» Иеговэрэ ар щыдгъэлъапІэ щІыпІэмрэ пщІэ зэрыхуэтщІыр (1 Тимофей 1:17, ДЩІ).

Алыхьым и хабзэхэм дытетыну дыхущІокъу. Библием Хьисэ и лъэужь ирикІуэхэр къыхуреджэ «укІытэ яхэлъу, хабзэфІым тету» захуэпэну (1 Тимофей 2:9, 10). УкІытэ хэлъу зыхуэпэн жиІэмэ сыт къикІыр? Щыгъыныр нэм къыщІэуэу, егъэлеяуэ къихауэ, гурыщІэ къемызэгъ къозыт щыгъыну щытын хуейкъым. ХабзэфІым тету зыхуэпэн жиІэмэ сыт къикІыр? Дахэу, екІуу, гурыхьу зыхуэпэн жиІэу аращ. ЗэрызытхуэпэнымкІэ дыхэдэну а принципхэм хуитыныгъэшхуэ къыдат. Дахэу, екІуу зэрызытхуапэмкІэ «дымыкІуэду дыкъезыгъэл Тхьэм теухуауэ ди фІэщхъуныгъэр» нэхъ дахэ дощІ икІи Иеговэ догъэлъапІэ (Тит 2:10; 1 Петр 2:12). ЗэІущІэхэм дыщыкІуэкІэ зэрызытхуапэм куэдкІэ елъытащ адрейхэр Иеговэ хуэлэжьэным зэрыхущытынур.

Щыгъын дахэ уимыІэмэ, абы щхьэкІэ умыгузавэ! Нэхъапэр уи щыгъыныр къабзэу, екІуу щытыныращи, дыщызэхуэс Унэм псори уэ къыпщыгуфІыкІынущ.

• Ди зэІущІэхэм дыщыкІуэм деж зэрызытхуапэм сыт хуэдэ мыхьэнэ иІэр?

• Зэрызытхуэпэнымрэ ди щхьэцыр зэрытщІынымрэ къыщыхэтхым деж, сыт хуэдэ принципхэм дытетын хуей?