ЦІыхумрэ псэущхьэ зэмылІэужьыгъуэхэмрэ къигъэщІын щхьэкІэ, Алыхьым эволюциер къигъэсэбэпа?

Библием мы упщІэм ирит жэуапыр

Хьэуэ. Библием наІуэу къегъэлъагъуэ Алыхьым цІыхур, псэущхьэхэр икІи къэкІыгъэхэр «езыхэм я лъэпкъыу»a къызэригъэщІар (ЩІэдзапІэ 1:12, 21, 25, 27; Апокалипсис 4:11). Тхыгъэ ЛъапІэм зэрыжиІэмкІэ, цІыху псори япэ цІыхуитІым — Іэдэмрэ Хьэуарэ — къатехъукІауэ аращ. (ЩІэдзапІэ 3:20; 4:1). Алыхьым гъащІэр къигъэщІын щхьэкІэ эволюциер (языныкъуэхэр абы теистическэ эволюциекІэ йоджэ) къигъэсэбэпауэ Библием зыщІыпІи щыжыІакъым. НэгъуэщІ лъэныкъуэкІэ уеплъмэ, наукэм зэрыжиІэмкІэ, зы лъэпкъым щыщ псэущхьэхэр зэщхьэщыкІыу щытыфынущ, Библиери абы арэзы тохъуэb.

• Сыт хуэдэ еплъыкІэхэр щыІэ?

• Теистическэ эволюцием жиІэмрэ Библием итымрэ зэтехуэрэ?

• Япэм щымыІа псэущхьэхэмрэ къэкІыгъэхэмрэ къызэрыунэхум къигъэлъагъуэрэ эволюцием жиІэр пэжу?

Сыт хуэдэ еплъыкІэхэр щыІэ?

Теистическэ эволюциер зи фІэщ хъухэм гъащІэр къызэрыунэхуам теухуауэ еплъыкІэ зэмылІэужьыгъуэхэр яІэщ. «Британская энциклопедия» жыхуаІэм зэритымкІэ, Алыхьым теистическэ эволюциер — «естественный отбор» жыхуаІэр (нэгъуэщІу жыпэмэ, дуней зызыхъуэжым нэхъ хэзэгъэфхэр къанэу, хэмызэгъэфхэр зэрыкІуэдыр) — къигъэсэбэпурэ, дунейм тету хъуар къигъэщІащ.

Теистическэ эволюцием иджыри мыпхуэдэ еплъыкІэхэр иІэщ:

• Псэ зыІут псори зыгуэрым къытехъукІыжащ.

• Псэ зыІутхэм щыщу зы лъэпкъыр нэгъуэщІ лъэпкъ хъуфынущ (языныкъуэхэр абы макроэволюциекІэ йоджэ).

• Эволюциер Алыхьым и мурадым тету йокІуэкІ.

Теистическэ эволюцием жиІэмрэ Библием итымрэ зэтехуэрэ?

Теистическэ эволюциер зэреплъымкІэ, гъащІэр къызэрыунэхуам теухуауэ ЩІэдзапІэ тхылъым итыр пэжкъым. Ауэ Хьисэ Мэссихь а тхылъым ит псалъэхэр къихьт икІи ахэр пэж дыдэу къэхъуа Іуэхугъэу зэрыщытым шэч къытрихьэтэкъым (ЩІэдзапІэ 1:26, 27; 2:18—24; Маттэ 19:4—6). Библием зэрыжиІэмкІэ, Хьисэ щІылъэм къэкІуэн ипэ уафэм щыпсэуащ икІи Алыхьым псори къыщигъэщІым щыгъуэ дэІэпыкъуащ (Иуан 1:3). Абы къегъэлъагъуэ Алыхьым псэ зыІут псори къигъэщІын щхьэкІэ эволюциер къызэримыгъэсэбэпар.

Япэм щымыІа псэущхьэхэмрэ къэкІыгъэхэмрэ къызэрыунэхум къигъэлъагъуэрэ эволюцием жиІэр пэжу?

Псэущхьэхэр е къэкІыгъэхэр къапщтэмэ, зы лъэпкъым щыщхэм я зэхуаку дапхуэдиз лІэужьыгъуэ къыдэкІыфынуми Библием къыдгуригъаІуэкъым. Абыхэм я зэхуаку къыдэкІыфынущ япэм щымыІа псэущхьэ е къэкІыгъэ лІэужьыгъуэ гуэр, икІи Библием жиІэкъым ар апхуэдэу мыхъуфыну. Ар эволюцием и фІыщІэу къэзылъытэхэр щыІэщ, ауэ апхуэдэ еплъыкІэр нэпцІщ, сыту жыпІэмэ зэи щымыІа псэущхьэ лъэпкъыгъуэ е къэкІыгъэ лъэпкъыгъуэ гуэр къэунэхуфынукъым.