УнафэщІ гупым щІэуэ къыхыхьа къуэшитІыр

2024 гъэм, октябрым и 5 «Общество Сторожевой башни» жыхуаІэм, илъэс къэс иригъэкІуэкІ зэІущІэм зы объявление хэха щыжаІащ: ди къуэш Джо́ди Дже́длирэ Дже́йкоб Рамфрэ УнафэщІ гупым щылэжьэну кърагъэблэгъащ. А къуэшитІыр илъэс куэд хъуауэ Иеговэ хуэпэжу хуолажьэ.

Ди къуэш Джоди штат Миссури (США) къыщалъхуащ. Абы зэрыцІыкІурэ Библием ит пэжыр ищІэт. Джоди и унагъуэр щыпсэуа щІыпІэм Иеговэ и Щыхьэтхэр щымащІэти, хъыбарыфІыр ягъэІун щхьэкІэ нэгъуэщІ щІыпІэ щыпсэу къуэш, шыпхъухэр абы щІэх-щІэхыурэ къакІуэт. Абыхэм я зэхуаку дэлъа лъагъуныгъэмрэ зэкъуэтыныгъэмрэ Джоди щыцІыкІуам хуабжьу къыдэІэпыкъуащ. 1983 гъэм, октябрым и 15 иджыри ныбжьыщІэу абы псым зыщІигъэуащ. Джоди хъыбарыфІ гъэІуныр хуабжьу игу ирихьт икІи школыр къызэриухыу, общэ пионер хъуащ. Ар къыщыхъуар 1989 гъэм, сентябрь мазэращ.

Джодирэ и шыпхъу нэхъыщІэмрэ я адэ-анэм щІэх-щІэхыурэ Вефилым экскурсие здашэт. Абы къыхэкІкІэ, Джодирэ и шыпхъумрэ иджыри цІыкІуу мурад ягъэуващ Вефилым щылэжьэну икІи иужькІэ абыхэм я мурадыр къехъулІащ. Ди къуэш Джоди 1990 гъэм, сентябрым Вефил лэжьыгъэр Уо́лкилл щыщІидзащ. ЯпэщІыкІэ абы унэхэр зэлъыІуихт, иужькІэ Вефилым щылажьэхэм я узыншагъэм кІэлъыплъ отделым щылэжьэн щІидзащ.

А зэманым Вефилым и гъунэгъуу испаныбзэкІэ псалъэ зэхуэсхэр щыІэт икІи ахэр псынщІэу зэрыхэхъуэм къыхэкІкІэ, къуэшхэм хуэныкъуэт. Арати, Джоди а зэхуэсхэм щыщ зым кІуащ икІи испаныбзэ зригъащІэу щІидзащ. Куэд дэмыкІыу абы а районым пионеру щылажьэ Да́марис зи цІэ ди шыпхъур къицІыхуащ. Ахэр зэрыша иужь зэгъусэу Вефил лэжьыгъэм пащащ.

2005 гъэм Джодирэ Дамарисрэ Вефил лэжьыгъэр къагъэнэн хуей хъуащ, я адэ-анэр зыхуей хуагъэзэн щхьэкІэ. А зэманым къриубыдэу ахэр общэ пионеру лэжьэн щІадзащ. Абы нэмыщІ ди къуэш Джоди пионерхэр щеджэ Школыр езыгъэкІуэкІхэм яхэтащ икІи а щІыпІэм щыІэ сымаджэщхэм зыпыщІэнымкІэ комитетымрэ региональнэ ухуэныгъэхэм кІэлъыплъ комитетымрэ щылэжьащ.

2013 гъэм, Джодирэ и щхьэгъусэмрэ Уо́рвик щекІуэкІ ухуэныгъэм хэтыну кърагъэблэгъащ. ИужькІэ ахэр Па́ттерсонрэ Уолкилрэ щылэжьащ. Джоди МПСО-мрэ «служба больничной информации» жыхуаІэмрэ хэтащ. 2023 гъэм, мартым, Джоди УнафэщІ гупым и служебнэ комитетым и дэІэпыкъуэгъу ящІащ. Джоди Иеговэ зэрыхуэлэжьа зэманхэр игу къигъэкІыжу жеІэ «КъалэныщІэ гуэр уи пщэ къыщыдалъхьэм деж, абы уигъэшынэнкІэ хъунущ. Ауэ апхуэдэхэм деж псом нэхъапэр зыщомыгъэгъупщэным мыхьэнэшхуэ иІэщ — ар Иеговэ ущыгугъыныращ, сыт щхьэкІэ жыпІэмэ ди къалэну хъуар тхуэгъэзэщІэн щхьэкІэ аращ къыддэІэпыкъур».

Ди къуэш Джейкоб штат Калифорние (США) къыщалъхуащ. Ар щыцІыкІум и анэр Иеговэ и Щыхьэту щыт пэтми, зэІущІэхэм кІуэтэкъым икІи хъыбарыфІри игъэІутэкъым. Ауэ абы Библием ит пэжхэм и къуэр хуригъэджэну хущІэкъут. Илъэс къэс Джейкоб и анэшхуэм деж кІуэт. Ар Иеговэ хуэпэжу хуэлажьэт. Абы и фІыгъэкІэ Джейкоб пэжыр ифІэгъэщІэгъуэн хъуащ икІи илъэс 13 щыхъум Библие ирагъэджэну елъэІуащ. 1992 гъэм, сентябрым и 27 иджыри ныбжьыщІэу абы псым зыщІигъэуащ. Джейкоб и анэм зэІущІэхэм кІуэн, хъыбарыфІри игъэІун щІидзэжащ. Абы нэмыщІ и адэми, и къуэш нэхъыщІэми, и шыпхъу нэхъыщІэми Библиер яджын щІадзэри, иужькІэ псым зыщІагъэуащ.

Джейкоб щыныбжьыщІэм пионеру лажьэ къуэш, шыпхъухэр насыпыфІэу зэрыщытыр илъагъут. Арати, абы школыр къиуха иужь пионеру лэжьэн щІидзащ. Ар къыщыхъуар 1995 гъэм, сентябрь мазэращ. 2000 гъэм ар Эквадор Іэпхъуащ, абы хъыбарыфІыр зыгъэІухэр щымащІэти. Абы щыІэу Джейкоб Канадэ къикІа, пионеру лажьэ Ингэ зи цІэ ди шыпхъур зригъэцІыхуащ. Зэман дэкІри, ахэр зэрышащ. ХьэгъуэлІыгъуэ нэужьым а тІур Эквадор щыІэ зы къалэ цІыкІу гуэрым Іэпхъуащ. Абы щыгъуэ а къалэм щыІэ къуэш, шыпхъухэр гуп цІыкІу хъууэ арат, ауэ нобэ абы зэхуэс щыІэщ икІи ар хохъуэ.

Зэман гуэр дэкІа иужь Джейкобрэ Ингэрэ специальнэ пионер ящІащ, абы иужькІэ ахэр районнэ лэжьыгъэми хэтащ. 2011 гъэм, ахэр Галаад Школым и 132 классым щеджэну кърагъэблэгъат. Ар къауха иужь абыхэм къэрал зэмылІэужьыгъуэхэм къалэн гъэщІэгъуэн куэд щагъэзэщІащ: Вефилым щылэжьащ, миссионеру щытащ икІи районнэ лэжьыгъэми хэтащ. Абы нэмыщІ ди къуэш Джейкоб «Школа благовестников Царства» жыхуаІэм егъэджакІуэу щыІащ.

Пандемие COVID-19 къызэрежьам къыхэкІкІэ, Джейкобрэ Ингэрэ США-м къагъэзэжын хуей хъуащ. Ахэр Уолкилл кърагъэблагъэри, Джейкоб служебнэ отделым щрагъэджащ. Абы иужь ди къуэшыр Эквадор щыІэ филиалым и комитетым хагъэхьащ. 2023 гъэм Джейкобрэ и щхьэгъусэ Ингэрэ Уорвик ягъэкІуащ. 2024 гъэм, январь мазэм ди къуэш Джейкоб УнафэщІ гупым и Служебнэ комитетым и дэІэпыкъуэгъу ящІащ. Иеговэ и организацэм щигъэзэщІа къалэнхэр игу къигъэкІыжурэ ди къуэш Джейкоб жеІэ: «Мыхьэнэ зиІэр ущылажьэ щІыпІэракъым, атІэ узыдэлажьэ цІыхухэращ».

Ди къуэш Джодирэ Джейкобрэ фІыщІэшхуэ яхудощІ егугъуу зэрылажьэм щхьэкІэ икІи ахэр лъапІэу долъытэ (Флп. 2:29).