Иеговэ и организацэм нэхъыбэу дзыхь зэрыхуэпщІыным хущІэкъу

1. Япэ лІэщІыгъуэм Иеговэ и лэжьыгъэр дапхуэдэу къызэрызэрагъэпэщу щытар?

ИЕГОВЭ и лэжьакІуэхэм къалэн гуэр щаритым деж, ар хуейщ а къалэныр зэтеухуауэ абыхэм ягъэзэщІэну (1 Кор. 14:33). Псалъэм папщІэ, Алыхьыр хуейщ хъыбарыфІыр дуней псом щагъэІуну (Мт. 24:14). А лэжьыгъэр иунэтІыну Иеговэ Хьисэ и пщэ дилъхьащ. Хьисэ кІэлъоплъ хъыбарыфІ гъэІуныр екІуу, зэтеухуауэ зэрыщытыным. Япэ лІэщІыгъуэм щІыпІэ-щІыпІэхэмкІэ зэхуэсхэр къыщыунэхум щыгъуэ, зэхуэсым и нэхъыжьхэр трагъэувэт, абыхэм а лэжьыгъэр яунэтІын щхьэкІэ (Апост. 14:23). Ерусалим щыІэ унафэщІ гупым апостолхэмрэ нэхъыжьхэмрэ хыхьэт. Абыхэм къащтэ унафэхэм зэхуэс псори тетын хуейт (Апост. 15:2; 16:4). Зэхуэсхэм щыщхэр а унафэхэм зэрытетым и фІыгъэкІэ «фІэщхъуныгъэшхуэ яІэ нэхъ хъуурэ... я бжыгъэм махуэ къэси хэхъуэрт» (Апост. 16:5).

2. 1919-нэ гъэм щыщІэдзауэ дапхуэдэу Иеговэ и лэжьакІуэхэр зэриунэтІыр икІи щІэныгъэ пэжыр абыхэм зэраІэригъэхьэр?

² Иеговэ ноби и лэжьакІуэхэр еунэтІ. 1919-нэ гъэм щыщІэдзауэ уафэм кІуэну гугъэ зиІэхэм щыщ цІыхухъу зыбжанэ Хьисэ къигъэсэбэпурэ хъыбарыфІ гъэІуныр еунэтІ икІи Алыхьым теухуа щІэныгъэ пэжыр и лъэужь ирикІуэхэм яІэрегъэхьэ (Лк. 12:42)a. Шэч хэмылъу, а гуп цІыкІум и лэжьыгъэм Иеговэ фІыгъуэ къыпегъакІуэ (Ис. 60:22; 65:13, 14).

3, 4. 1) Дэ зэпэщу хъыбарыфІыр зэрыдгъэІум сыт хуэдэ сэбэпынагъ пылъ? 2) Мы статьям сыт щызэпкърытхынур?

³ Дэ зэпэщу дыщымытатэмэ, Хьисэ къыдита лэжьыгъэр тхуэгъэзэщІэнутэкъым (Мт. 28:19, 20). Псалъэм папщІэ, хъыбарыфІыр щыдгъэІун участокхэр димыІатэмэ, щхьэж здыхуейм деж хъыбарыфІыр щигъэІунут. Апхуэдэм деж языныкъуэ щІыпІэхэм хъыбарыфІыр зыгъэІухэр къытрагъэзэжурэ кІуэнут, адрей щІыпІэхэм ялъэмыІэсу къэнэнут. Дэ зэпэщу хъыбарыфІыр зэрыдгъэІум иджыри сыт хуэдэ сэбэпынагъ хэфлъагъуэрэ?

⁴ Хьисэ щІылъэм щытетам щыгъуэ и лъэужь ирикІуэхэр зэриунэтІу щытам хуэдэу, нобэ дэри деунэтІ. Мы статьям дэ щызэпкърытхынущ Хьисэ сыт хуэдэ щапхъэ къытхуигъэнами икІи ди организацэр а щапхъэм нобэ дапхуэдэу тетми. Абы нэмыщІ дэ дытепсэлъыхьынущ Иеговэ и организацэм дзыхь зэрыхуэтщІыр дапхуэдэу къэдгъэлъэгъуэфынуми.

ДИ ОРГАНИЗАЦЭР ХЬИСЭ И ЩАПХЪЭМ ТЕТЩ

5. Ди организацэм дапхуэдэу Хьисэ щапхъэ зэрытрихыр? (Иуан 8:28).

⁵ Хьисэ сыт ищІэнуми сыт жиІэнуми и Адэм деж зыщигъасэт. Хьисэ игъэлъэгъуа щапхъэм Иеговэ и организацэр дапхуэдэу зэрытетыр? Организацэм тщІэ хъунымрэ мыхъунымрэ теухуауэ къыджиІэхэр Алыхьым и Псалъэм тегъэщІауэ щытщ. (Къеджэ Иуан 8:28; 2 Тим. 3:16, 17). ЩІэх-щІэхыурэ дэ дигу къагъэкІыж Библиер дджын зэрыхуейр. А чэнджэщым дыщІытетын хуейр сыт?

6. Библиер зэрыдджыр дапхуэдэу къызэрыддэІэпыкъур Иеговэ и организацэм нэхъыбэжу дзыхь хуэтщІыну?

⁶ Библиер щыдджым деж, дэ зэдгъапщэ хъунущ абы щыжыІамрэ ди организацэм публикациехэр къигъэсэбэпу къыдит унафэхэмрэ. Дэ къытІэрыхьэ унафэхэр Алыхьым и Псалъэм тегъэщІауэ щытлъагъум деж, Иеговэ и организацэм нэхъыбэжу дзыхь худощІ (Рим 12:2).

7. Хьисэ сыт хуэдэ хъыбар игъэІуар икІи абы и щапхъэм Иеговэ и организацэр дапхуэдэу зэрытетыр?

⁷ Хьисэ «Тхьэм и Тепщэныгъэшхуэм теухуа хъыбарыфІыр» цІыхухэм яхуиІуатэт (Лк. 4:43, 44). Абы и лъэужь ирикІуэхэми ар дыдэр ящІэну унафэ яхуищІащ (Лк. 9:1, 2; 10:8, 9). Ноби Иеговэ и лэжьакІуэхэр дэнэ щымыпсэуами, абыхэм сыт хуэдэ къалэн организацэм щамыІами, Алыхьым и Пащтыхьыгъуэм теухуа хъыбарыфІыр ягъэІу.

8. Сыт хуэдэ пщІэ Алыхьым къытхуищІар?

⁸ Алыхьым и Пащтыхьыгъуэм теухуауэ цІыхухэм яжетІэну ди дежкІэ щІыхьышхуэщ! Ауэ апхуэдэ пщІэ зыпылъ къалэн цІыху псоми яІэкъым. Псалъэм папщІэ, Хьисэ щІылъэм щытетам щыгъуэ, ар хэту щытми жин бзаджэхэм жаІэну яхуидэтэкъым (Лк. 4:41). Нобэ цІыху гуэрым Иеговэ и лэжьакІуэхэм я гъусэу хъыбарыфІыр игъэІуну хуеймэ, япэщІыкІэ абы Алыхьым и хабзэхэм тету и гъащІэм зэхъуэкІыныгъэ хилъхьэн хуейщ. ХъыбарыфІыр дгъэІуну Алыхьым щІыхь къызэрытхуищІар лъапІэу тлъытэмэ, Іэмал дыщиІэм деж нэгъуэщІхэм а хъыбарыфІымкІэ дадэгуэшэнущ. Хьисэ и щапхъэм дытету дэ дыхущІокъу пэжым и жылэр цІыхухэм я гум зэрыхэтсэным икІи псы зэрыщІэдгъэлъэдэным (Мт. 13:3, 23; 1 Кор. 3:6).

9. Ди организацэм сыт ищІэр, Алыхьым и цІэр цІыхухэм къащІэн щхьэкІэ?

⁹ Алыхьым и цІэр къащІэну Хьисэ цІыхухэм ядэІэпыкъут. Хьисэ и тхьэлъэІум хэту и Адэм мыпхуэдэу жриІащ: «Сэ абыхэм уи цІэр къахузэІусхащ» (Ин. 17:26, ДЩІ). Хьисэ и щапхъэм тету, Иеговэ и организацэм къару куэд ирехьэлІэ, Алыхьым и цІэр цІыхухэм яригъэщІэн щхьэкІэ. Псалъэм папщІэ, «ДунеищІэ» жаІэу зэрадзэкІа Библием Алыхьым и цІэр здэщытын хуейм деж иратхэжащ. Нобэ а Библиер зэрыщыту е и Іыхьэ гуэрхэр бзэ 270-м щІигъукІэ щыІэщ. А Библием ит А4, А5 приложениехэм Алыхьым и цІэр Библием щІратхэжам теухуауэ нэхъыбэ къыщыпщІэнущ. АлыджыбзэкІэ тха Тхыгъэхэм Алыхьым и цІэр 237-рэ итын зэрыхуейм теухуауэ иджыри щхьэусыгъуэ зыбжанэ къыщыхьащ английскэбзэкІэ къыдэкІа «Учебная Библия» жыхуаІэм и зы приложением (Appendix C).

10. Мьянмэ щыщ цІыхубзым Алыхьым и цІэр къыщищІам щыгъуэ, сыт жиІар икІи абы сытым дыхуигъасэрэ?

¹⁰ Хьисэ хуэдэу, дэри дыхуейщ Алыхьым и цІэр цІыху нэхъыбэм къедгъэщІэну. Мьянмэ щыщ илъэс 67 хъу зы цІыхубз гуэрым и нэпсым къызэпижыхьауэ Библие езыгъаджэм жриІащ: «Сэ зэи зэхэсхатэкъым Алыхьым и цІэр Иеговэу зэрыщытыр. Уэ... нэхъ мыхьэнэшхуэ зиІэ пэжыр къысхузэІупхащ». Мы Іуэхугъуэм къегъэлъагъуэ зигу къабзэ цІыхухэм Алыхьым и цІэр къызэращІам я гъащІэр зэрихъуэжыфынур.

ИЕГОВЭ И ОРГАНИЗАЦЭМ ДЗЫХЬ ХУЭФЩІ

11. Дапхуэдэу зэхуэсым и нэхъыжьхэм къызэрагъэлъэгъуэфынур Иеговэ и организацэм дзыхь зэрыхуащІыр? (Сурэтми феплъ.)

¹¹ Дапхуэдэу зэхуэсым и нэхъыжьхэм къызэрагъэлъэгъуэфынур Иеговэ и организацэм дзыхь зэрыхуащІыр? Зэхуэсым и нэхъыжьхэм унафэ гуэр къащыІэрыхьэм деж, ахэр а унафэм фІыуэ зэрыхэплъэным икІи ар зэрагъэзэщІэным къарууэ яІэр ирахьэлІэн хуейщ. Псалъэм папщІэ, къуэшхэм а унафэхэм къыщащІэ зэІущІэхэр зэрегъэкІуэкІын хуей щІыкІэр, зэхуэсым и пащхьэ уиту тхьэлъэІур дапхуэдэу жыпІэн хуейми, абы нэмыщІ Хьисэ и мэл цІыкІухэм я нэІэ зэрытрагъэтын хуей щІыкІэр. Зэхуэсым и нэхъыжьхэр ди организацэм къыбгъэдэкІ унафэхэм щытетым деж, къуэш, шыпхъухэм Иеговэ и лъагъуныгъэр зыхащІэ икІи и нэІэ къазэрытетыр ялъагъу.

12. 1) ПщІэ зыпылъ къалэн зыгъэзащІэ къуэшхэм жаІэм дыщІедэІуэн хуейр сыт? (Еврейхэм 13:7, 17). 2) Зэхуэсым и нэхъыжьхэм яхэлъ хьэл-щэныфІхэм нэхъыбэу гу лъыттэн щІыхуейр сыт?

¹² Зэхуэсым и нэхъыжьхэм унафэ гуэр щащІым деж, дэ ар занщІэу дгъэзэщІэн хуейщ. Апхуэдэу тщІэмэ, а къуэшхэм я къалэнхэр нэхъ тыншу ягъэзэщІэфынущ. Библием дыхуегъэуш пщІэ зыпылъ къалэнхэр зыгъэзащІэ къуэшхэм дедэІуэну икІи дахуэІурыщІэну. (Къеджэ Еврейхэм 13:7, 17.) Иныкъуэхэм деж ар тыншкъым, сыт щхьэкІэ жыпІэмэ а цІыхухъухэми гуэныхь яхэлъщ. Ауэ абыхэм яхэлъ хьэл-щэныфІхэм гу лъыдмытэу, я ныкъусанхэм гулъытэ нэхъыбэ хуэтщІмэ, ар ди бийхэм Іэрыхуэ яхуэхъунущ. Сыт апхуэдэу жыпІэ щІэхъунур? Иеговэ и организацэм дзыхь зэрыхуэтщІыр абы зэтрикъутэфынущ, аращ ди бийхэри зыхущІэкъур. Ди бийхэм кърахьэкІ пцІым и къапхъэным димыхуэн щхьэкІэ, сыт тщІэн хуейр?

ИЕГОВЭ И ОРГАНИЗАЦЭМ ДЗЫХЬ ЗЭРЫХУЭФЩІЫМ НЭГЪУЭЩІХЭР ЗЭРАН ХУЭВМЫГЪЭХЪУ

13. Алыхьым и организацэр ягъэулъиину бийхэр дапхуэдэу зэрыхущІэкъур?

¹³ Алыхьым и бийхэр хущІокъу абы и организацэр ягъэулъиину. Псалъэм папщІэ, Библием дэ къыщытщІащ Иеговэ и лэжьакІуэхэм сыткІэ щыгугъми. Ар хуейщ ахэр сыт и лъэныкъуэкІи къабзэу щытыну. Алыхьым жеІэ гуэныхь хьэлъэ зыщІэ икІи абы хущІемыгъуэж цІыхур зэхуэсым хэгъэкІын зэрыхуейр (1 Кор. 5:11—13; 6:9, 10). Дэ Библием ит а унафэм дытетщ. Ауэ абы щхьэкІэ ди бийхэм дагъэкъуэншэну хэтщ. Абыхэм жаІэ цІыхухэр фІыуэ дымылъагъуу, зэхэгъэж тщІыуэ икІи дэ тхуэдэу щымытхэм нэмыплъ етту.

14. Иеговэ и организацэм теухуауэ пцІы игъэбэгъуэну хэт зи фейдэр?

¹⁴ Организацэм зэран къыхуэхъухэм я щІыбагъ къыдэтыр хэтми зэхэвгъэкІ. Ар Иблис ШейтІаныращ. Библием щыжыІащ ар пцІым и адэу зэрыщытыр (Ин. 8:44; ЩІэдз. 3:1—5). Аращи, дэ дгъэщІагъуэкъым абы ди бийхэр къигъэсэбэпурэ Иеговэ и организацэм теухуауэ пцІы игъэбэгъуэну зэрыхэтыр. Япэ лІэщІыгъуэми Іуэхур апхуэдэущ зэрыщытар.

15. Сыт дин пашэхэм ящІэу щытар, Хьисэрэ абы и лъэужь ирикІуэхэмрэ я цІэр ягъэулъиин щхьэкІэ?

¹⁵ Хьисэ Мэссихь гуэныхь лъэпкъ хэмылъами икІи телъыджэ куэд ищІэу щытами, ШейтІаным цІыхухэр къигъэсэбэпурэ абы теухуауэ пцІы куэд игъэІуащ. Псалъэм папщІэ, дин пашэхэм жаІэт Хьисэ «жин бзаджэхэм я пашэ... Велзевул и къарукІэ» жин бзаджэхэр цІыхухэм яхихуу (Мк. 3:22). Дин пашэхэм Хьисэ хьэкум щытращІыхьым, абы Алыхьым и цІэр игъэпуду жаІэри, пцІы тралъхьащ. Абыхэм къызэщІагъэста цІыхухэм Пилат хагъэзыхьащ Хьисэ яукІыну унафэ ищІыну (Мт. 27:20). ИужьыІуэкІэ, Хьисэ и лъэужь ирикІуэхэм хъыбарыфІыр щагъэІум, бийхэм «хамэ лъэпкъ щыщхэр зэщІагъаплъэри» абыхэм къыхуагъэгубжьащ (Апост. 14:2, 19). 1998-нэ гъэм, декабрым и 1-м къыдэкІа «ХъумакІуэ чэщанэр» Апостолхэм 14:2 итым мыпхуэдэу тепсэлъыхьащ: «Хьисэ и лъэужь ирикІуэхэм къыпэщІэувэ журтхэм хъыбарыфІыр ІэщІыб зэращІамкІэ къэувыІакъым, абыхэм пцІыр къагъэсэбэпурэ хамэ лъэпкъхэм щыщхэр хуагъэушащ Хьисэ и гъэсэнхэм пэщІэувэну».

16. Сыт дэ зыщыдгъэгъупщэн хуэмейр, Иеговэ и организацэм теухуауэ пцІы гуэр щызэхэтхым деж?

¹⁶ ШейтІаным ноби пцІыр егъэбагъуэ. Абы иджыри къыздэсым «щІылъэм тет цІыху псори» къегъапцІэ (Апок. 12:9). Ди организацэм е пщІэ зыпылъ къалэн зыгъэзащІэ къуэшхэм теухуауэ пцІы гуэр зэхэфхмэ, фигу къэвгъэкІыж япэ лІэщІыгъуэм Алыхьым и бийхэм Хьисэрэ абы и гъэсэнхэмрэ зэрагъэпуду щытар. Ноби Иеговэ и лэжьакІуэхэм лей къытрагъэхьэ, я пщІэри ираудых. Ар дэ дгъэщІагъуэкъым, сыт щхьэкІэ жыпІэмэ апхуэдэу къызэрыхъунур Библием итщ (Мт. 5:11, 12). ПцІым дэ дызэтрихунукъым, ар къызыбгъэдэкІыр зыщыдмыгъэгъупщэмэ икІи занщІэу ди акъылыр зэрытхъумэным дыхущІэкъумэ. Ар дапхуэдэу зэрытщІ хъунур?

17. Сыт дэ къыддэІэпыкъунур пцІым и къапхъэным димыхуэну? (2 Тимофей 1:13). («Хъыбар нэпцІхэм дапхуэдэу дазэрыхущытын хуейр?» жыхуиІэ рамкэми феплъ.)

¹⁷ Хъыбар нэпцІхэр ІэщІыб фщІы. Паул гурыІуэгъуэу къыджиІащ сыт дэ тщІэн хуейми хъыбар нэпцІ гуэр щызэхэтхым деж. Абы Тимофей жриІащ «Тхьэм и фІэлІыкІ зыхэмылъ... хъыбархэм пэІэщІэ» зыхуищІыну, нэгъуэщІхэми ар яхуигъэувыну (1 Тим. 1:3, 4; 4:7). Дэ дыхуейкъым щІым щылъыр къэзыпхъуатэу занщІэу зи жьэм зыхь сабий цІыкІухэм хуэдэу дыщытыну. ЦІыху балигъхэм апхуэдэу ящІэкъым. Дэ пцІыр ІэщІыб дощІ, абы и щІыбагъым къыдэтыр хэтми дощІэри. Дэ «узыщыгугъ хъуну псалъэ» пэжхэм дытетщ. (Къеджэ 2 Тимофей 1:13.)

18. Иеговэ и организацэм дзыхь зэрыхуэтщІыр дапхуэдэу къызэрыдгъэлъэгъуэфынур?

¹⁸ Дэ зэпкърытхащ Иеговэ и организацэр Хьисэ и щапхъэм зэрытет лъэныкъуэхэм щыщ Іуэхугъуищ. Библиер щывджым деж, ди организацэр Хьисэ и щапхъэм зэрытетым щыхьэт техъуэ нэгъуэщІ Іуэхугъуэхэри къызэрывгъуэтыным фыхущІэкъу. Къуэш, шыпхъухэм организацэм дзыхь хуащІыну фадэІэпыкъу. Фэри Иеговэ дзыхь хуэфщІ икІи абы и Іэмырыр зыгъэзащІэ организацэм зэкъуэту фыдэлажьэ (Пс. 37:28). ДэркІэ щІыхьышхуэщ Иеговэ и лъэпкъым дыхэту абы дызэрыхуэлажьэр. Апхуэдэ щІыхь дызэриІэр адэкІи лъапІэу дывгъэлъытэ!