ФІымрэ Іеймрэ. Дэтхэнэ зыми сэбэп хуэхъуну чэнджэщхэр
Тхыгъэ ЛъапІэм ит чэнджэщхэр цІыху мелуан куэдым сэбэп яхуэхъуащ. ГъащІэм и лъэныкъуиплІым Библиер сэбэп къызэрытхуэхъум дыхэплъэнщ.
1. Нэчыхьыр
Зэщхьэгъусэхэр насыпыфІэу щытын щхьэкІэ ящІэн хуейм теухуауэ еплъыкІэ куэд щыІэщ.
АБЫ ТЕУХУАУЭ БИБЛИЕМ ИТЫР. «Аращи, фэ фщыщ дэтхэнэми, езым и щхьэр фІыуэ зэрилъагъум хуэдэу, и фызри фІыуэ ирелъагъу. Фызми и лІым щІыхь хурещІ» (Ефес 5:33).
АБЫ КЪИКІЫР. Унагъуэр зыухуар Алыхьыращ икІи нэчыхьыр быдэу щытын щхьэкІэ пщІэн хуейр псом нэхърэ нэхъыфІу зыщІэр аращ (Марк 10:6—9). Зэщхьэгъусэхэр насыпыфІэу щытынущ щхьэж зыхуейр япэ иримыгъэщу, и щхьэгъусэр зыхуейм егупсысмэ. Зи щхьэгъусэр фІыуэ зылъагъу цІыхухъум ар зыхуей хуегъазэ икІи абы щабэу хущытщ. ЦІыхубзми и щхьэгъусэм пщІэ хуещІ икІи ар и псэлъэкІэмкІи и щытыкІэмкІи къегъэлъагъуэ.
БИБЛИЕМ ГЪАЩІЭР ЗЭРИХЪУЭЖЫР. Вьетнамым щыщ Куангрэ Тхирэ я нэчыхьыр къемыхъулІауэ икІи абы зыри пхуемыщІэжыну къащыхъут. Куанг щІэх-щІэхыурэ и щхьэгъусэм и жагъуэ ищІт. Абы игу къегъэкІыж: «Сэ Тхи и гурыщІэхэр къысфІэІуэхуххэтэкъым, и пщІэри мызэ-мытІэу щезудыха къэхъуащ». Тхи и щхьэгъусэм бгъэдэкІыжыным нэсат. Ар къыддогуашэ: «Сэ си щхьэгъусэм дзыхьи, пщІэи хуэзмыщІыжу сыхъуат».
Зэман дэкІри, Куангрэ Тхирэ Библиер яджын щІадзащ икІи Ефес 5:33 ит чэнджэщыр я унагъуэм дапхуэдэу къыщагъэсэбэп хъунуми къащІащ. «Библием ит мы псалъэхэм сэ къызгурагъэІуащ си щхьэгъусэм нэхъ щабэу сызэрыхущытын хуейр, — жеІэ Куанг. — ЦІыхубзым зыхищІэн хуейщ фІыуэ къызэралъагъур, зыми зэрыщамыгъащІэр икІи и гурыщІэхэм гулъытэ зэрыхуащІыр. Апхуэдэу сщІэмэ, Тхи дежкІэ нэхъ тынш хъунущ фІыуэ силъагъуну, пщІэи къысхуищІыну». Тхи къыддогуашэ: «Ефес 5:33 ит чэнджэщым сытету си щхьэгъусэм пщІэ зэрыхуэсщІыр нэхъыбэу езгъэлъагъуху, сэри абы фІыуэ сызэрилъагъур икІи къызэрысхуэсакъыр нэхъыбэу зыхызощІэ. Абы си гум мамырыгъэ кърелъхьэ».
Зэщхьэгъусэхэм сэбэп къахуэхъуну чэнджэщ нэхъыбэ jw.org сайтым, 2018 гъэм 2-нэу къыдэкІа «Фыкъызэщыу!» журналым къыщыбгъуэтынущ. Абы и цІэр «Унагъуэр насыпыфІэ хъуну къыдэІэпыкъу чэнджэщ 12».
2. НэгъуэщІ цІыхухэм дазэрыхущытыр
ЦІыхум и теплъэм, къызыхэкІа лъэпкъым, иІыгъ диным икІи сексым теухуауэ иІэ еплъыкІэм щхьэкІэ нэгъуэщІ цІыхухэр абы Іейуэ хущытыфынущ.
АБЫ ТЕУХУАУЭ БИБЛИЕМ ИТЫР. «ЦІыху псоми щІыхь яхуэфщІ» (1 Петр 2:17).
АБЫ КЪИКІЫР. Библием расизмыр, гомофобиер, ксенофобиер идэкъым. Абы цІыхухэр къыхуреджэ я теплъэм, къызыхэкІа лъэпкъым икІи яІыгъ увыпІэм емылъытауэ зыр зым пщІэ зэхуащІыну (Апостолхэм 10:34). ЦІыхум и щытыкІэмрэ и фІэщ хъумрэ дигу иримыхьми, дэ абы пщІэ хуэтщІын икІи гуапэу дыхущытын хуейщ (Маттэ 7:12).
БИБЛИЕМ ГЪАЩІЭР ЗЭРИХЪУЭЖЫР. «Азием къикІахэр псори ди къэралым зэран хуохъу!» — апхуэдэ гупсысэхэм Даньел зэрыцІыкІурэ щІапІыкІащ. Абы къыхэкІкІэ Даньел Азием къикІа цІыхухэр илъагъу мыхъуу икІи псоми я пащхьэм абыхэм я пщІэр щриудыхыу хъуащ. «Зи къэралыр фІыуэ зылъагъу дэтхэнэ зыри апхуэдэу щытын хуейуэ къэслъытэт, — жеІэ Даньел. — МыхъумыщІагъэ гуэр сщІэуи сигу къэкІыххэтэкъым».
Зэман дэкІри, Даньел Библиер иджын щІидзащ. Ар къыддогуашэ: «Сэ си гупсысэкІэр зэрыщыту схъуэжын хуейт икІи Алыхьыр цІыхухэм зэреплъым хуэдэу сэри абыхэм сеплъу зезгъэсэн хуейт. Ар цІыхум и теплъэми къызыхэкІа лъэпкъми еплъкъым». Иджы Даньел цІыхухэм зэрыхущытыр ихъуэжащ. Абы жеІэ: «Иджыпсту сэ цІыхур къызыхэкІам сеплъыжкъым. Сэ цІыхухэр псори фІыуэ солъагъу икІи дуней псом ныбжьэгъухэр щызиІэщ».
Нэхъыбэ къэпщІэну ухуеймэ, jw.org сайтым, 2020 гъэм 3-нэу къыдэкІа «Фыкъызэщыу!» журналым еплъ. Абы и цІэр «Есть ли лекарство от предубеждений?».
3. Ахъшэр
Куэдыр къулей хъуну хущІокъу. Абыхэм я гугъэщ насыпыр ахъшэм епхауэ икІи къэкІуэну зэманым абы гъащІэфІ къыуитыфыну.
АБЫ ТЕУХУАУЭ БИБЛИЕМ ИТЫР. «Іущагъым ахъшэм хуэдэу укъехъумэ, ауэ щІэныгъэмрэ Іущагъымрэ куэдкІэ нэхъ лъапІэщ, сыт щхьэкІэ жыпІэмэ ахэр зиІэм и гъащІэр хъума хъунущ» (Экклезиаст 7:12).
АБЫ КЪИКІЫР. ДауикІ, дэ ахъшэм дыхуэныкъуэщ, ауэ абы ди насыпыр елъытауэ жыпІэ хъунукъым (Притчи 18:11; 23:4, 5). Дэ ди насыпымрэ ди къэкІуэнымрэ зэлъытар Іущагъ зыхэлъ Алыхьым и чэнджэщхэм дызэрытетыращ (1 Тимофей 6:17—19).
БИБЛИЕМ ГЪАЩІЭР ЗЭРИХЪУЭЖЫР. Индонезием щыщ Кардо и къарури и зэманри зытригъэкІуадэу щытар ахъшэ нэхъыбэу къызэрилэжьынырат. Абы игу къегъэкІыж: «ЦІыхур зыщІэхъуэпсу хъуар сэ сиІэт. Си нэгу зезгъэужьт, машинэ, унэ, хьэпшып лъапІэхэр къэсщэхут. Ауэ апхуэдэу куэдрэ екІуэкІакъым. Апхуэдиз илъэскІэ гугъу сехьу къэзлэжьа ахъшэр гъэпцІагъэкІэ къысІэщІагъэкІащ. Сэ нэхъ къулей сыхъун щхьэкІэ сымыщІа къэзгъэнакъым, ауэ икІэм-икІэжым абы къысхуихьар гукъеуэрэ гухэщІрэщ».
Кардо ахъшэм теухуауэ Библием ит чэнджэщхэр и гъащІэм къыщигъэсэбэпу щІидзащ. Иджы абы и къарури и зэманри ахъшэ куэду къызэрилэжьыным тримыгъэкІуадэу, иІэмкІэ арэзыуэ мэпсэу. Кардо жеІэ: «Сэ къызгурыІуащ гъащІэм япэ увыпІэр ахъшэм ептыным Іущагъ зэрыхэмылъыр. Псом нэхърэ нэхъапэр Алыхьымрэ дэрэ ди зэхуаку дэлъ зэныбжьэгъугъэращ. Иджыпсту сэ ІэфІу сожей икІи нэгъэсауэ сынасыпыфІэщ».
Ахъшэм теухуауэ Библием итыр jw.org сайтым «Могут ли образование и деньги гарантировать лучшую жизнь?» жыхуиІэ статьям къыщыпщІэфынущ.
4. Сексыр
ЦІыхухэм сексым пыщІа упщІэхэр къыщаІэтым деж, къезэгъымрэ къемызэгъымрэ теухуауэ я еплъыкІэхэр зэтехуэкъым.
АБЫ ТЕУХУАУЭ БИБЛИЕМ ИТЫР. «Тхьэр зыхуейр фигу нэхъ къабзэ хъу зэпытыну, зинэ щІэным пэІэщІэ зыфщІыну арщ. Абы нэмыщІуи, Тхьэр зыхуейр езыр зымыщІэ хамэ лъэпкъхэм ящыщ цІыхуу, зи гур зинэ мыхъумыщІэ Іуэхухэм щІэхъуэпсхэм фахуэмыдэу, гукъабзагъэкІэ, щІыхь хэлъу, фэ фщыщ дэтхэнэми езым и пкъым тепщэныгъэ хуиІэну арщ» (1 Фессалоникэ 4:3—5).
АБЫ КЪИКІЫР. Библием зэритымкІэ, сексым теухуауэ уи Іэпкълъэпкъым и хъуэпсэныгъэхэр ебгъэгъуэтын щхьэкІэ сыт хуэдэ Іэмалри къэбгъэсэбэп хъунукъым. Библием ит «зинэ щІэн» жыхуиІэ псалъэхэм хохьэ уи щхьэгъусэм уепцІыжыныр, къэхьпагъэр, нэчыхь узыхуимыІэ цІыхум уригъусэныр, цІыхухъуитІ е цІыхубзитІ зэгъусэныр, цІыхумрэ псэущхьэмрэ зэгъусэныр (1 Коринф 6:9, 10). Сексыр — Алыхьым къыдита тыгъэщ икІи абы зэгъусэну хуитыныгъэ зритар нэчыхь зиІэ цІыхухъумрэ цІыхубзымрэщ (Притчи 5:18, 19).
БИБЛИЕМ ГЪАЩІЭР ЗЭРИХЪУЭЖЫР. Австралием щыпсэу Кайли жеІэж: «Япэм щыгъуэ сэ си гугъэт сыдэмыкІуами, зыгуэрым сригъусэмэ, фІыуэ сызэралъагъур икІи къызэрысхуэсакъыр зыхэсщІэну. Ауэ сэ си щхьэр къэзгъэпцІэжу арат. Сэ сыт щыгъуи сыгузавэт икІи зыри къысхуэмейуэ къысщыхъут, абы щхьэкІэ си гур икъутыхьауэ щытт».
ИужькІэ Кайли Библием итыр къищІащ икІи абы тету псэун щІидзащ. Ар къыддогуашэ: «Сэ солъагъу Библием ит хабзэхэм дыкъызэрахъумэр икІи сыт и лъэныкъуэкІи Иеговэ зэрыхуейм хуэдэу сызэрыпсэуным сыхущІокъу. Иджыпсту сэ фІыуэ сыкъэзылъагъу икІи сыкъэзыхъумэ щхьэгъусэ сиІэщ. Сэ Библием ит чэнджэщхэр си гъащІэм къыщызгъэсэбэпу зэрыщІэздзам сызыпэщІэхуэнкІэ хъуну гукъеуэ куэдым сыщихъумащ».
Нэхъыбэ къэпщІэну ухуеймэ, jw.org сайтым ит «Что в Библии говорится о сожительстве до брака?» жыхуиІэ статьям еджэ.
ДыкъэзыгъэщІа ди Алыхьыр хуейщ дэ сытыр фІыми, сытыр Іейми зэхэдгъэкІыну. Абы и хабзэхэм утетыну щымытынш къэхъуми, абыхэм узэрытетым фІыгъуэшхуэ къыпхуихьынущ. Аращи, уэ абы нэгъэсауэ насыпыфІэ узэрищІынум шэч къытумыхьэми хъунущ.