Иеговэ уэ къару къыпхилъхьэнущ

1. Библием зи гугъу ищІ Алыхьым и лэжьакІуэ пэжхэм къару къыздрахыр дэнэт?

БИБЛИЕР Алыхьым и лэжьакІуэ пэж куэдым топсэлъыхьыж. А цІыхухэм Іуэху гъэщІэгъуэныщэхэр ялэжьу щытащ, ауэ абыхэм я нэхъ къарууфІэми къарууншэу зыкъыщилъытэжа къэхъуащ. Псалъэм папщІэ, пащтыхь Даут иныкъуэм деж къарууфІэу зэрыщытыр зыхищІэт, ауэ иныкъуэм дежи ар шынэм щызэщІиубыдэ къэхъут (Пс. 30:7). Самсони къаруушхуэ бгъэдэлът, ауэ абы къыгурыІуэт Алыхьым и къарум щыщ къримытмэ, адрей цІыху къызэрыгуэкІхэм хуэдэ зэрыхъунур (Суд. 14:5, 6; 16:17). Алыхьым хуэпэжу щыта а цІыхухъухэр къарууфІэу щІыщытар Иеговэ и фІыгъэщ.

2. ЛъэкІыныгъэ щимыІэм деж, лъэкІыныгъэ нэхъ игъуэту Паул щІыжиІар сыт? (2 Коринф 12:9, 10).

² Апостол Паули къыгурыІуэт Иеговэ и къарум зэрыхуэныкъуэр. (Къеджэ 2 Коринф 12:9, 10.) Дэр хуэдэу, абыи узыншагъэм пыщІа гугъуехьхэр иІэт (Гал. 4:13, 14). Зэман-зэманкІэрэ абы ІуэхуфІхэр ищІэну къегугъуэкІт (Рим 7:18, 19). Иныкъуэхэм дежи ар щІэгузэвэн щхьэусыгъуэ иІэт икІи къыщыщІынкІэ хъунум теухуауи щышынэ къэхъут (2 Кор. 1:8, 9). Апхуэдэхэм деж Иеговэ абы къару къритт. Абы и фІыгъэкІэ Паул зыпэщІэхуа гъэунэхуапІэхэм пэщІэтыфащ.

3. Мы статьям сыт хуэдэ упщІэхэр щызэпкърытхыну?

³ Иеговэ дэри къару къытхилъхьэну дыкъегъэгугъэ (1 Пет. 5:10). Ауэ дэри зыгуэр тщІэн хуейщ. Зы щапхъэ къэтхьынщ. Моторым машинэр зэрегъакІуэ, ауэ газым томыкъузауэ ар ежьэнукъым. Апхуэдэ дыдэу дызыхуэныкъуэ къарур къызыбгъэдэкІыр Иеговэщ. Ауэ ар къытІэрыхьэн щхьэкІэ, дэ лъэбакъуэ гуэрхэр дымычу хъунукъым. Дэ къару диІэн щхьэкІэ Иеговэ сыт къыдитар? ИкІи а къарур къытІэрыхьэн щхьэкІэ сыт дэ езым тщІэн хуейр? Мы упщІэхэм я жэуапхэр къэтщІэн щхьэкІэ, Алыхьым и лэжьакІуэхэм щыщ цІыхуищым я щапхъэхэм гу лъыттэнщ. Дэ зэпкърытхынущ Иеговэ бегъымбар Инус, Хьисэ и анэ Мэрием, апостол Паул сымэ дапхуэдэу къару яриту щытами. Абы нэмыщІ Иеговэ и лэжьакІуэхэм нобэ дапхуэдэу ядэІэпыкъуми дэ дытепсэлъыхьынущ.

ТХЬЭЛЪЭІУМРЭ БИБЛИЕР ЗЭРЫВДЖЫМРЭ КЪАРУ КЪЫФХАЛЪХЬЭФЫНУЩ

4. Иеговэ къыддэІэпыкъун щхьэкІэ, сыт дэ тщІэн хуейр?

⁴ Иеговэ къызэрыддэІэпыкъу Іэмалхэм ящыщ зыр ар тхьэлъэІуращ. Абы ди тхьэлъэІум жэуап къыщриткІэ «лъэкІыныгъэшхуэ» къытхилъхьэфынущ (2 Кор. 4:7). Абы нэмыщІ Тхыгъэ ЛъапІэм дыщеджэм икІи дызэджам дыщегупсысым деж дэ къару диІэ мэхъу (Пс. 86:11). Апхуэдэу щІыщытыр Библием ит псалъэхэм «лъэкІыныгъэшхуэ яхэлъщи» аращ (Евр. 4:12). ТхьэлъэІумрэ Библием фызэреджэмрэ къывдэІэпыкъунущ гъэунэхуапІэхэм фыпэщІэтыну, гуфІэгъуэр зыфІэвмыгъэкІуэдыну е къалэн гугъу гуэрым фыпэлъэщыну. АдэкІэ Иеговэ Инус бегъымбарым зэрыдэІэпыкъуу щытам деплъынщ.

5. Бегъымбар Инус Иеговэ къыдэІэпыкъуным щІыхуэныкъуэр сытыт?

⁵ Инус бегъымбарыр Іуэхугъуэ шынагъуэ пэщІэхуат. Иеговэ абы къалэн гугъу къыщритам щыгъуэ, ар апхуэдизкІэ шынати, кхъухьым итІысхьэри щІэпхъуэжащ. Кхъухьыр борэнышхуэм щыхэхуам, Инуси адрей цІыхухэри хэкІуадэ пэтащ. Инус псым хадза иужь ар бдзэжьеишхуэм иригъэлъэтэхащ. ДауикІ, абы зэи и гугъауэ къыщІэкІынкъым шынагъуэу икІи кІыфІу щыт щІыпІэм — бдзэжьейм и кІуэцІым — къыщыхутэну. Сыт абы и гум щыщІар? Абы и лІэгъуэр къэсауэ и гугъэу пІэрэт? Иеговэ ар ІэщІыб ищІауэ къыщыхъуу пІэрэт? ДауикІ, Инус и Іуэхур гужьеигъуэт.

6. Инус бдзэжьейм и кІуэцІым щисам щыгъуэ, къару къезытар сыт? (Иона 2:1, 2, 7).

⁶ ДауикІ, Инус хуабжьу закъуэныгъэ зыхищІэт. Сыт абы къару къыхэзылъхьар? ТхьэлъэІуращ. (Къеджэ Иона 2:1, 2, 7.) Инус Иеговэ емыдэІуами, шэч къытрихьэтэкъым ищІам зэрыхущІегъуэжар Алыхьым зэрилъагъум икІи и тхьэлъэІур зэрызэхихым. Абы нэмыщІ Инус Алыхьым и Псалъэм итым егупсыст. Сыт апхуэдэу жыпІэ щІэхъунур? Абы итхыжа тхылъым и 2-нэ псалъащхьэм ит тхьэлъэІум Псалом тхылъым щыщ псалъэ куэд хэтщ. (Псалъэм папщІэ, Иона 2:2, 5 итыр Псалом 69:1; 86:7 итым евгъапщэ.) Зэрытлъагъущи, Инус а едзыгъуэхэр фІы дыдэу ищІэт. Абыхэм щегупсысым Инус къыгурыІуащ Иеговэ и дежкІэ хэкІыпІэншэ Іуэху зэрыщымыІэр икІи Іэмал имыІэу ар абы къызэрыдэІэпыкъунур. ИужькІэ, Инус къыщелам щыгъуэ, ар хьэзырт Иеговэ кърита къалэныр игъэзэщІэну (Иона 2:10—3:4, Инус, 2009).

7, 8. Тайвань щыщ ди зы къуэшым сыт къыдэІэпыкъуар зыпэщІэхуа гъэунэхуапІэм пэлъэщыну?

⁷ Дэ гъэунэхуапІэ зэмылІэужьыгъуэхэм дыщыпэщІэхуэм деж Инус бегъымбарым и щапхъэр къыддэІэпыкъуфынущ. Псалъэм папщІэ, Тайвань щыщ ди къуэш Чжими́нb узыфэ хьэлъэ къоуз. Иджыри Иеговэ зэрыхуэлажьэм щхьэкІэ и Іыхьлыхэр къыпэщІоувэ. Ди къуэш Чжимин тхьэлъэІумрэ Библие джынымрэ къару къыхалъхьэ. Ар къыддогуашэ: «Гугъуехь сыщыхэтым деж сызыгъэгузавэ гупсысэ куэд си щхьэм къихьэу щІедзэ. Абыхэм я ягъэкІэ Библие джыным си гур тезухуэфкъым». Ауэ абы и Іэр ирихьэхкъым. Чжимин пещэ: «ЯпэщІыкІэ сэ Иеговэ тхьэлъэІукІэ зыхузогъазэ. ИужькІэ наушникхэр зыІузолъхьэри ди уэрэдхэм содаІуэ. Иныкъуэхэм дежи си гум гупсэхугъуэ къихьэжыху абыхэм хуэмурэ сыдожьу. Абы иужь Библиер джын щІызодзэ».

⁸ Чжимин ди публикациехэр зэриджыр щІэх-щІэхыурэ сэбэп къыхуохъу. Ар операцэшхуэ ящІауэ сымаджэщым щыщІэлъым щыгъуэ, медсестрам къыжриІащ абы и гемоглобиныр зэрылъахъшэм къыхэкІкІэ лъы хагъэлъэдэн зэрыхуейр. Чжимин операцэ ящІын ипэ, апхуэдэ операцэ дыдэ зыхуащІа ди шыпхъу гуэрым теухуауэ ди публикациехэм къыщеджат. А шыпхъум лъы зыхригъэкІакъым, и гемоглобиныр Чжимин ейм нэхърэ нэхъ лъахъшэу щыта пэтми икІи абы и узыншагъэр зэтеувэжащ. Абы и щапхъэм Чжимин къару къыхилъхьащ Алыхьым пэжу къыхуэнэну.

9. Гукъеуэ гуэрым уи къарур пщІихыу щытмэ, сыт пщІэ хъунур? (Сурэтми феплъ.)

⁹ Зыгуэрым хуабжьу ущигъэгузавэм деж, тхьэлъэІум уи акъылыр щыпхутемыухуа е публикациехэр бджыну къару щыпхуримыкъуа къэхъуа? Апхуэдэу щытмэ, зыщомыгъэгъупщэ: Иеговэ хуэдэу укъызыгурыІуэ зыри щыІэкъым. Аращи, уи тхьэлъэІур узэрыхуейм хуэдэу пхужымыІэми, Иеговэ узыхуэныкъуэ дыдэр къыуитынущ (Еф. 3:20). Гукъеуэ узэриІэм е зыгуэр къызэроузым къыхэкІкІэ уеджэну е узэджар куууэ зэпкърыпхыжыну гукъыдэж уимыІэмэ, Библием е ди публикациехэм я аудиозаписым едаІуэ. Абы нэмыщІ jw.org сайтым илъ уэрэд гуэр уедаІуэ е видео гуэр уеплъ хъунущ. Иеговэ тхьэлъэІукІэ зыхуэбгъазэмэ икІи абы и организацэм къыдиту хъуар зэпхьэлІэмэ, Иеговэ къару къыпхилъхьэну Іэмал ибот.

КЪУЭШ, ШЫПХЪУХЭМ КЪАРУ КЪЫФХАЛЪХЬЭФЫНУЩ

10. Ди къуэш, ди шыпхъухэр дапхуэдэу къызэрыддэІэпыкъуфынур?

¹⁰ Иеговэ къыддэІэпыкъун щхьэкІэ ди къуэш, ди шыпхъухэр къегъэсэбэп. ГъэунэхуапІэ дыщыпэщІэхуэм е къалэн гугъу къыщыдатым деж гупсэхугъуэ дгъуэтыжыну ахэр къыддэІэпыкъуфынущ (Кол. 4:10, 11). «Гузэвэгъуэ дихуа» иужь дэ псом хуэмыдэу ди ныбжьэгъухэм дахуэныкъуэщ (Прит. 17:17). Къарууншэ дыхъумэ къуэш, шыпхъухэр хьэзырщ къыддэІэпыкъуну, дагъэгушхуэну икІи сыт хуэдэ лъэныкъуэкІи зыкъытщІагъэкъуэну. Иджыпсту деплъынщ Хьисэ и анэ Мэрием нэгъуэщІхэр къызэрыдэІэпыкъуауэ щытам.

11. Мэрием Иеговэ и къарум щІыхуэныкъуэр сытыт?

¹¹ Мэрием Иеговэ и къарум хуэныкъуэт, абы кърита къалэныр игъэзэщІэн щхьэкІэ. ДжэбрэІил зи цІэ мелыІычым абы къыжриІащ ар хъыджэбздэсу уэндэгъу зэрыхъунур. Мэрием мыхьэнэшхуэ зиІэ къалэн игъэзэщІэн хуейуэ къыщыгурыІуам, абы и гум щыщІар фи нэгу къыщІэвгъэхьэт! Зэи сабий зимыІа хъыджэбзым Мэссихь хъун хуей щІалэ цІыкІур ипІын хуейт. А псом нэмыщІ абы къыпэщылът щхьэгъусэ хуэхъун хуей Исуф епсэлъэн хуейуэ. Мэрием зэи цІыхухъу иримыгъусами дагъуэ зэриІэр Исуф зыгуэрурэ къыгуригъэІуэн хуейт (Лк. 1:26—33).

12. Мэрием зыхуэныкъуэ къарур дапхуэдэу къызэрыІэрыхьар? (Лк. 1:39—45).

¹² Мыхьэнэшхуэ зиІэ а къалэныр игъэзэщІэн щхьэкІэ, Мэрием зыхуэныкъуэ къарур дапхуэдэу къызэрыІэрыхьар? Абы нэгъуэщІхэр зыдигъэІэпыкъут. Псалъэм папщІэ, Мэрием игъэзэщІэн хуейм теухуауэ нэхъыбэ къыжриІэну мелыІычым елъэІуащ (Лк. 1:34). Абы иужь куэд дэмыкІыу Мэрием и Іыхьлыуэ щыт Елизавет деж кІуащ. Ар «Іуащхьэлъэ хэкум щыщу ИудэкІэ зэджэ унагъуэ лъэпкъыр зыдэс жылэ гуэрым» щыпсэут. Мэрием абы зэрыкІуар сэбэп къыхуэхъуащ. Дапхуэдэу? Алыхьым и къару лъапІэм Елизавет хуигъэушащ Мэрием щытхъуну икІи абы къилъхуну сабийм теухуауэ къэхъун хуей псалъэхэр жиІэну. (Къеджэ Лука 1:39—45.) Мэрием мыпхуэдэу жиІащ: «[Иеговэ] Іуэху телъыджэхэр и ІэкІэ зэфІигъэкІащ» (Лк. 1:46—51). Апхуэдэу, Мэрием дэІэпыкъун щхьэкІэ, Иеговэ ДжэбрэІилрэ Елизаветрэ къигъэсэбэпащ.

13. Боливием щыщ ди зы шыпхъум къуэш, шыпхъухэр дапхуэдэу зэрыдэІэпыкъуар?

¹³ Мэрием хуэдэу, фэри къуэш, шыпхъухэр зыдэвгъэІэпыкъу хъунущ. Боливием щыщ ди шыпхъу Дасури́ апхуэдэ дэІэпыкъуэгъу хуэныкъуэт. Абы и адэм зэрылІыкІын узыфэ иІэу къахутат. Ар зыхуей хуигъэзэн щхьэкІэ, Дасури абы и гъусэу сымаджэщым щІэлъащ (1 Тим. 5:4). ДауикІ, ар тынштэкъым. Дасури къыддогуашэ: «Къару лъэпкъ сыщимыІэж мызэ-мытІэу къэхъуащ». Абы зыгуэр зыдигъэІэпыкъуауэ пІэрэ? ЯпэщІыкІэ зыдигъэІэпыкъуакъым. Абы мыпхуэдэу жеІэ: «Сэ дэлъху, шыпхъухэм закъытезгъэхьэлъэну сыхуейтэкъым. Сэ сегупсыст: Иеговэ сыщиІэкІэ нэгъуэщІ дэІэпыкъуэгъу сыт зэрысщІынур — жысІэу. Ауэ иужькІэ сэ къызгурыІуащ адрейхэм пэІэщІэ зэрызыхуэсщІымкІэ си гугъуехьхэм си закъуэу сыпэлъэщыну сызэрыхэтыр» (Прит. 18:1). Дасури мурад ищІащ и Іуэхур зыІутыр и ныбжьэгъухэм яжриІэну. Абы пещэ: «ПсалъэкІэ пхужыІэнкъым сэ дэлъху, шыпхъухэр щІэгъэкъуэн къызэрысхуэхъуар. Абыхэм сымаджэщым шхын къысхуашэт, Библием ит едзыгъуэхэмкІи сагъэгушхуэт. Узэримызакъуэр зыхэпщІэну сыту фІы! Иеговэ и унагъуэшхуэм щыщу ущытыну, уи ныбжьэгъухэр сыт щыгъуи къыбдэІэпыкъуну зэрыхьэзырыр къыбгурыІуэну, ахэр къыбдэгъыну икІи зэи укъызэрамыгъэнэнур пщІэну сыту насыпышхуэ!»

14. Зэхуэсым и нэхъыжьхэр зыдэдгъэІэпыкъун щІыхуейр сыт?

¹⁴ Иеговэ къыддэІэпыкъун щхьэкІэ, зэхуэсым и нэхъыжьхэри къигъэсэбэпыфынущ. Ар абы и тыгъэщ. Иеговэ хуейщ абыхэм я нэІэ дэ къыттрагъэтыну (Ис. 32:1, 2). Аращи, гукъеуэ гуэр фиІэмэ, фи зэхуэсым и нэхъыжьхэм фепсалъэ. Ахэр къызэрывдэІэпыкъур ІэщІыб фымыщІ, атІэ фІыщІэ фщІы. Абыхэм я фІыгъэкІэ Иеговэ къарууфІэ фищІыфынущ.

ГУГЪЭ ДАХЭ ДИІЭМ КЪАРУ КЪЫТХИЛЪХЬЭФЫНУЩ

15. Иеговэ и лэжьакІуэхэм сыт хуэдэ гугъэ дахэ яІэр?

¹⁵ Библием тегъэщІауэ диІэ гугъэ дахэм дэ къару къытхелъхьэ (Рим 4:3, 18—20). Иеговэ и лэжьакІуэхэм гъащІэ мыухыж яІэу псэуну гугъэ яІэщ: хэти жэнэт хъужа щІылъэм, хэти уафэм. А гугъэм и фІыгъэкІэ дэ къару диІэщ гъэунэхуапІэхэм дыпэщІэтыну, хъыбарыфІыр дгъэІуну икІи къалэн зэмылІэужьыгъуэхэр зэхуэсым щыдгъэзэщІэну (1 Фес. 1:3). Апостол Паули къару къыхэзылъхьэу щытар а гугъэ дыдэращ.

16. Апостол Паул Алыхьым и къарум щІыхуэныкъуэр сытыт?

¹⁶ Апостол Паул Алыхьым и къарум щІыхуэныкъуэр сытыт? Коринф щыІэ къуэш, шыпхъухэм письмо щахуитхым щыгъуэ, Паул зригъэщхьащ къутэгъуафІэу щыт ятІагъуэм къыхэщІыкІа хьэкъущыкъум. Абы итхащ ар «лъэныкъуэ псомкІи щІыпІэ зэв ираубыдам зэрыхуэдэр», «ищІэнур зэримыщІэр» икІи «цІыхухэм гугъуехь зэрырагъэшэчыр». Иныкъуэхэм дежи абы и гъащІэр фІэкІуэдынкІэ шынагъэ щыІэт (2 Кор. 4:8—10). Мы псалъэхэр Паул щитхар хъыбарыфІыр игъэІун щхьэкІэ ещанэу гъуэгу щытетам щыгъуэщ. Ауэ абы игу къэкІыххэтэкъым гугъуехь нэхъ иныж къызэрыпэщылъыр: цІыху гуп къызэрытеуэнур, тепщэныгъэ зиІэхэм зэраубыдынур, зэрыса кхъухьыр борэнышхуэм зэрикъутэнур, тутнакъми зэрагъэтІысынур.

17. Гугъуехьхэм пэщІэтыну сыт Паул къыдэІэпыкъуу щытар? (2 Коринф 4:16—18).

¹⁷ Паул гугъэ дахэ иІэм и акъылыр тригъэтти, аращ зыпэщІэхуэ гугъуехьхэм пэщІэтыну къару щІиІар. (Къеджэ 2 Коринф 4:16—18.) Паул Коринф дэс къуэш, шыпхъухэм яхуитхащ «и пкъыр кІуэд зэпытми», и гур зэрымыкІуэдыр. Абы и акъылыр зытриухуар къыпэщылъ гъащІэрат. Апостолым лъапІэу илъытэт уафэм щыпсэуну гугъэ иІэр икІи абы щхьэкІэ сыт хуэдэ гугъуехьри ишэчыну хьэзырт. Паул а гугъэм куууэ зэрегупсысым къару къыхилъхьэт.

18. Тихомиррэ абы и унагъуэмрэ гугъэ яІэм дапхуэдэу къару къазэрыхилъхьэр?

¹⁸ Болгарием щыщ ди къуэш Тихомир гугъэ дахэ иІэм къару кърет. Илъэс зыбжанэ ипэ абы и къуэш нэхъыщІэ Здра́вко машинэм иукІащ. Тихомир дежкІэ ар егъэлеяуэ гуауэшхуэт. А гуауэм пэлъэщын щхьэкІэ, и щхьэгъусэмрэ и къуэмрэ я гъусэу абы лІахэр къызэрытэджыжыныр нэхъыбэрэ я нэгу къыщагъэхьэу щІадзащ. Тихомир къыддогуашэ: «Псалъэм папщІэ, дэ дытопсэлъыхь Здравко дапхуэдэу къедгъэблэгъэжынуми, сыт хуэдэ шхыныгъуэ ІэфІхэр хуэтпщэфІынуми, хьэщІэу хэт къедгъэблэгъэнуми икІи иужьрей махуэхэм теухуауэ сыт жетІэжынуми». Тихомир жеІэ а гугъэм и фІыгъэкІэ абыхэм гуфІэгъуэ зэрызыфІамыгъэкІуэдыр икІи и къуэшыр Иеговэ къыщигъэтэджыжыну зэманым ахэр зэрыпэплъэр.

19. Гугъэ диІэр дапхуэдэу нэхъ быдэ зэрытщІынур? (Сурэтми феплъ.)

¹⁹ Гугъэ диІэр дапхуэдэу нэхъ быдэ зэрытщІынур? Псалъэм папщІэ, уэ гъащІэ мыухыж уиІэу щІылъэм ущыпсэуну гугъэ уиІэу щытмэ, абы теухуауэ Библием итым еджэ (Ис. 25:8; 32:16—18). Жэнэтым ущыпсэууэ уи нэгу къыщІэгъэхьэ. Хэт плъагъур? Сыт зэхэпхыр? Сыт зыхэпщІэр? Ар нэхъыфІу уи нэгу къыщІэбгъэфын щхьэкІэ, ди публикациехэм жэнэтыр къыщыгъэлъэгъуа сурэтхэм еплъ. Макъамэ зыщІэт видеохэми еплъ, псалъэм папщІэ, «Мы ждём новый мир», «Этот день очень близко!», «ГъащІэ дахэр уи нэгу къыщІэгъэхьэ!» жыхуиІэхэм. Гугъэ диІэм ди акъылыр сыт щыгъуи тедгъэтыу щытмэ, дызыпэщІэхуэ гугъуехьхэр «мащІэу икІи кІэщІу» къытщыхъунущ (2 Кор. 4:17). Иеговэ а гугъэр къыщІыдитар къарууфІэу дыщытын щхьэкІэщ.

20. Къарууншэ ухъуауэ зыхэпщІэу щытмэ, сыт къару къыпхэзылъхьэнур?

²⁰ Къару уимыІэжу зыхэпщІэу щытмэ, уи Іэр йомыхьэх. Иеговэ Іэмал имыІэу къару къыпхилъхьэнущ (Пс. 108:13). Къару зэрыдгъуэтыжыну Іэмалхэр абы къыдитакІэщ. Аращи, къалэн гугъу гуэр бгъэзэщІэн, гъэунэхуапІэм упэщІэтын е гуфІэгъуэр зыфІомыгъэкІуэдын щхьэкІэ, сыт пщІэн хуейр? ТхьэлъэІу гуащІэкІэ Иеговэ зыхуэгъазэ икІи абы и чэнджэщыр къэбгъуэтын щхьэкІэ, Библиер куууэ джы. Къуэш, шыпхъухэр зыдэгъэІэпыкъу. ЩІэх-щІэхыурэ дунеищІэм щыІэну гъащІэм егупсыс. Абы щыгъуэ «сыт ищІысымкІи теубыдагъэрэ шыІэныгъэрэ уиІэн щхьэкІэ, щІыхьышхуэ зиІэ и лъэкІыныгъэ псомкІэ уи гур Тхьэм игъэбыдэнущ» (Кол. 1:11).