Сэ си нэкІэ слъэгъуащ Алыхьым хуэпэжхэм ехъулІэныгъэ зэраІэр

Сэ сыкъэдыхьэшхри, абы жэуап естыжащ: «Библием зыгуэр хэпщІыкІыу жомыІэ иджы!». Абы занщІэу зыри жиІакъым, ауэ тІэкІу дэкІри, и анэр Иеговэ и Щыхьэту зэрыщытыр икІи абы зыгуэрхэр къызэрыжриІэжар къызжиІащ. Нэхъыбэ къэсщІэну сыхуейти, Библием итым теухуауэ нэхъыбэ къызжиІэжыну си ныбжьэгъум селъэІуащ.

Абы щыгъуэ дэ нэху щыху жыхуаІэм хуэдэу дызэдэуэршэращ. Си ныбжьэгъум къызгуригъэІуащ, Библием зэритымкІэ, мы дунейр ШейтІаным и ІэмыщІэ зэрилъыр (Ин. 14:30). Уэ ар игъащІэ лъандэрэ пщІэуэ къыщІэкІынщ, ауэ сэ япэу зэхэсхыу арат икІи а гупсысэм сигъэпІейтеящ. Сэ сыт щыгъуи къызжаІэт фІыгъуэу щыІэр къызыбгъэдэкІ икІи захуагъэ зыхэлъ Алыхьым дунейр и ІэмыщІэ илъу. Ауэ а гупсысэмрэ гъащІэм щыслъагъумрэ схузэхуэгъакІуэтэкъым. Илъэс 26 фІэкІа сымыхъуми, сэ сигу иримыхь, сызыгъэнэщхъей куэд слъэгъуат.

Си адэр США-м и ВВС-м щылажьэти, сызэрыцІыкІурэ сщІэт ядернэ бомбэ къагъэуэнкІэ шынагъэ зэрыщыІэр икІи «кнопкэ плъыжьым» тракъузэну военнэхэр сыт щыгъуи хьэзыру зэрыщытыр. Калифорнием дэт колледжым сыщеджэм, Вьетнамым зауэ щекІуэкІт. Абы щхьэкІэ зыкъэзыІэта студентхэм сэри сахэтт. Полицием дубинкэкІэрэ «слезоточивый газ» жыхуаІэмкІэрэ дызэбгырихужт. Зэрызехьэ куэд къыщекІуэкІ зэмант ар. Къэрал унафэщІхэм я унафэкІэ куэдыр яукІт, цІыхухэм зыкъаІэтт икІи зэрызехьэт. ЕплъыкІэ куэдыІуэ а зэманым щыІэти, Іуэхум и пэжыпІэр зыми къыбжиІэфынутэкъым.

1970-нэ гъэм Аляскэм и ищхъэрэ лъэныкъуэмкІэ лэжьапІэфІ къыщызгъуэтри, ахъшэ хъарзынэ къыщызлэжьащ. ИужькІэ Лондон сылъатэщ, мотоцикл къэсщэхури, абы сытесу ипщэ лъэныкъуэмкІэ сежьащ. Мазэ зыбжанэ дэкІат сэ Африкэм сыщынэсам. Си гъуэгуанэм сэ сыщыхуэзэт, сэр хуэдэу, зыщІыпІэ щІэпхъуэжыну хуей цІыхухэм. Я гъащІэр хьэлъэ зыщІ гугъуехьхэм къаІэщІэкІыну ахэр ехъуапсэт.

Пэжыр жысІэнщи, сэ си нэгум Іей куэд щІэкІат. Абы къыхэкІкІэ мы дунейр Иблисым и ІэмыщІэ илъу Библием зэрыжиІэм акъыл хэлъу къэслъытэт. Ауэ «Сыт-тІэ Алыхьым илэжьыр?» жысІэу сегупсыст.

КъыкІэлъыкІуэ мазэ зыбжанэм къриубыдэу си упщІэм и жэуапыр къэзгъуэтащ. Иджыри зэман гуэр дэкІри, гугъуехь яІэхэм емылъытауэ, Алыхьым пэжу хуэлажьэ ныбжьэгъу куэд зэзгъэгъуэтащ.

ИЩХЪЭРЭ ИРЛАНДИЕ: «БОМБЭХЭМРЭ ШЭХЭМРЭ Я ЩІЫНАЛЪЭ»

Лондон зэрызгъэзэжу, си ныбжьэгъум и анэм сыхуэзэри, абы Библиер къызитащ. ИужькІэ, Амстерда́м сыщыщыІэм щыгъуэ, уэрамым къыщыблэ фонарым и лъабжьэ сыщІэту Библием сызэреджэр ди зы къуэшым къилъагъури, а тхылъым теухуауэ нэхъыбэ къэсщІэну къыздэІэпыкъуащ. ИтІанэ сэ Ду́блин къалэм сыкІуэри, абы дэт ди филиалыр къэзгъуэтащ. Абы щызэзгъэцІыхуащ Іущагъышхуэ зыбгъэдэлъ ди къуэш А́ртур Ма́ттьюз. Библием сригъэджэну а къуэшым селъэІуати, абы «хьэуэ» къызжиІакъым.

Библиемрэ абы тегъэщІа тхыгъэхэмрэ сыкъэмыувыІэу седжэт, икІи абыхэм къыщысщІэм хуабжьу сыдихьэхт! Ижь-ижьыж лъандэрэ цІыху акъылыфІэ куэдым къагурымыІуэ упщІэхэм я жэуапхэр зэІущІэхэм къакІуэ сабийхэм зэращІэр сэ згъэщІагъуэт. Псалъэм папщІэ: «Іейр щІыщыІэр сыт? Хэт хъуну Алыхьыр? ЦІыхум лІа нэужь сыт къыщыщІыр?» А къэралым сэ зыри щысцІыхутэкъыми, Иеговэ и Щыхьэтхэм нэмыщІ сэ зыми сепсалъэтэкъым. Ахэр сэ къыздэІэпыкъуащ Иеговэ фІыуэ слъагъуу икІи абы и мурадыр згъэзэщІэну гукъыдэж сиІэу сыхъуну.

1972-нэ гъэм сэ псым зыщІэзгъэуащ. Илъэс дэкІри, общэ пионер сыхъуащ икІи Нью́ри къалэм (Ищхъэрэ Ирландием) щыІэ зэхуэс цІыкІум сыдэлажьэу щІэздзащ. Сэ бгы джабэм тет мывэ унэм фэтэру сыщІэст. Спэмыжыжьэу губгъуэм жэмхэр щыхъуакІуэти, абыхэм я пащхьэ гъэхьэзыра псалъэхэр щыжысІэт. Жэмхэр жьэгъуашхэурэ Іейуэ набдзэгубдзаплъэу къызэдаІуэу къысщыхъут. Пэжщ, абыхэм чэнджэщ гуэр къызатыфынутэкъым, ауэ абыхэм псалъэр зыжесІэхэм сеплъыфу срагъэсащ. 1974-нэ гъэм сэ специальнэ пионер сащІащ. Ди къуэш На́йджел Питт а лэжьыгъэм си гъусэу хэтыну къызатащ, икІи дэ тІур зэныбжьэгъушхуэ дыхъуащ.

А зэманым Ищхъэрэ Ирландием зауэ щекІуэкІт икІи языныкъуэхэр а къэралым «бомбэхэмрэ шэхэмрэ я щІыналъэкІэ» еджэт. ЦІыхухэр уэрамхэм щызэзауэт, хэти Іэщэ къигъэсэбэпт. Снайперхэм цІыхухэр щаукІ къэхъут, зыгуэрхэм я машинэхэри къагъауэт. Диным и лэжьакІуэхэр къэрал Іуэхухэм хуабжьу хэІэбэми, протестантхэмрэ католикхэмрэ ящІэт Иеговэ и Щыхьэтхэр политикэм зэрыхэмыІэбэр. Абы къыхэкІкІэ зыми дыщымышынэу хъыбарыфІыр дгъэІут. Дызэпсалъэхэм къыджаІэ хабзэт дапщэщ икІи сыт хуэдэ щІыпІэм зауэ-банэ къыщыхъеинуми. Абы и фІыгъэкІэ дэ шынагъэ гуэр къытщыщІыным дыщыхъумат.

Ауэ узыгъэгужьеин гуэри къытщыщІт. Зэгуэр пионеру лажьэ Де́нис Ка́рриганрэ сэрэ ди къалэм пэмыжыжьэу щыІэ къалэ цІыкІум хъыбарыфІыр щыдгъэІут. А къалэм Иеговэ и лэжьакІуэхэм щыщ зыри дэстэкъым икІи япэм дэ абы зэ закъуэ дыщыІауэ арат. Абы зы цІыхубз гуэрым и гугъащ дэ Великобританием дыкъикІыу тІасхъэщІэхыу дыкъэкІуауэ. Апхуэдэу дыщІигъэкъуэншам и щхьэусыгъуэр Ирландием щыпсэухэм яІэ акцентым хуэдэ дызэримыІэрауэ къыщІэкІынут. Абы и псалъэхэм дэ дагъэгужьеят, сыт щхьэкІэ жыпІэмэ бийуэ ялъытэ сэлэтым гуапэу узэрыхущыта къудейм щхьэкІэ е уаукІыфынут е фочкІэ къеуэу уи лъэгуажьэр пхраудыфынут. ЩІыІэм дисыжауэ автобус къэувыІэпІэм дытетыхукІэ, а цІыхубзым дыщыхуэза кафем машинэ къыІухьащ. ЦІыхубзыр къыщІэкІри, машинэм ис цІыхухъуитІым жыджэру епсалъэу щІидзащ, ди лъэныкъуэмкІэ и Іэхэр ищІыурэ. ИужькІэ а цІыхухъухэр хуэмурэ машинэмкІэ къыдбгъэдыхьэри, автобусыр зэрызекІуэм теухуауэ упщІэ зыбжанэ къыдатащ. Автобусыр къэса нэужь, ахэр рулым дэсым епсэлъащ. Абыхэм я псалъэмакъыр дэ зэхэтхатэкъым икІи автобусым дэр нэмыщІ зыри истэкъым. Абы къыхэкІкІэ дэ дегупсыст къалэм дызэрыдэкІыу абыхэм даукІыну. Ауэ зыри къыдэІусакъым. Автобусым дыкъыщикІыжым рулым дэсым сэ сеупщІащ: «А щІалэхэм дэрат зи Іуэху зэрахуэр?» Абы мыпхуэдэ жэуап къызитыжащ: «Фэ хэту фыщытми сэ сощІэ, икІи абыхэм ар яжесІащ. Фымыгузавэ. Зыми фи гугъу къищІынукъым».

1976-нэ гъэм Дублин къалэм щекІуэкІа областной конгрессымa Англием специальнэ пионеру щылажьэ ди шыпхъу Полинэ Ло́макс щызэзгъэцІыхуащ. Абы Иеговэ фІыуэ илъагъут, Іэдэбагъ хэлът, теплъэкІи ар дахащэт. Абырэ и дэлъху Рейрэ пэжыр зэрыцІыкІурэ ящІэт. Илъэс дэкІри, Полинэрэ сэрэ дызэрышащ икІи адэкІэ зэгъусэу специальнэ пионеру дыщылэжьащ Ищхъэрэ Ирландием щыІэ Баллими́на къалэм.

Зэман гуэркІэ дэ районнэ лэжьыгъэм дыхэтащ. Ди районым зауэ щекІуэкІ къалэ зыбжанэ хыхьэт, псалъэм папщІэ, Бе́лфаст, Лондонде́рри, нэгъуэщІхэри. А щІыпІэхэм щыпсэу ди къуэш, ди шыпхъухэм я фІэщхъуныгъэм ди гур хигъахъуэт. Иеговэ арэзы ящІын щхьэкІэ, ахэр хьэзырт дин нэпцІым зыхуригъаджэр къагъанэну икІи лъагъумыхъуныгъэр я гум ирахыну. Алыхьым ахэр къызэрихъумэр икІи и нэфІ абыхэм зэрыщыхуэр наІуэт.

Ирландием сыкъызэрыІэпхъуэрэ илъэсипщІ дэкІауэ, 1981-нэ гъэм си щхьэгъусэмрэ сэрэ Галаад Школым и 72-нэ классым дыщеджэну дыкърагъэблэгъащ. А Школыр къэдуха нэужь, дэ Сьерра-Леоне (КъухьэпІэ Африкэм) дагъэкІуащ.

СЬЕРРА-ЛЕОНЕ: ТХЬЭМЫЩКІАГЪЭМ ЕМЫЛЪЫТАУЭ, ДИ КЪУЭШХЭР АЛЫХЬЫМ ХУЭПЭЖЩ

Миссионерхэр дыщыпсэу унэм дэр нэмыщІ иджыри къуэш, шыпхъуу 11 щыпсэут. Дэ диІэт зы пщэфІапІэ, псыунищ, душитІ, зы телефон, зэрыжьыщІэ мэшинэу зы, абы нэмыщІ яжьыщІар зыгъэгъущыж зы машинэ. Токыр щІэх-щІэхыурэ Іуачт, унащхьэм дзыгъуэшхуэхэм шыгъажэ щащІт, ди щІыунэми блащхъуэхэр (кобрэхэр) изт.

Ди гъащІэр мытыншми, хъыбарыфІ гъэІуным гуфІэгъуэшхуэ къытхуихьт. ЦІыхухэм Библием пщІэ хуащІти, яфІэгъэщІэгъуэну абы итым къедаІуэт. Куэдыр Библием едгъаджэу щІэддзащ икІи абыхэм пэжыр къащтащ. А щІыпІэм щыпсэухэр сэ «мистер РоберткІэ» къызэджэт, Полинэ щхьэкІэ «миссис Роберт» жаІэт. Ауэ филиалым сызэрыдэІэпыкъум къыхэкІкІэ хъыбарыфІ гъэІуным нэхъ мащІэу сыхэту щыхъуам щыгъуэ, ахэр Полинэ «миссис ПолинэкІэ» еджэт, сэр щхьэкІэ «мистер Полинэ» жаІэт. Полинэ ар хуабжьу игу ирихьт!

Ди къуэш, ди шыпхъу куэдыр хуэмыщІауэ псэуми, Иеговэ сыт щыгъуи и нэІэ абыхэм ятригъэтт, телъыджэ гуэр щахуищІи къэхъут (Мт. 6:33). Ди зы шыпхъум, езымрэ и сабийхэмрэ щхьэкІэ, шхын къызэрищэхун ахъшэ мащІэ дыдэ иІэр ди къуэш сымаджэм иритауэ щытащ. А къуэшым малярие уз къефыкІт икІи хущхъуэ къызэрищэхун ахъшэ хурикъутэкъым. Дауэ къыфщыхъурэ, а махуэ дыдэм ди шыпхъум и деж зы цІыхубз гуэр и щхьэцыр иригъэщыну къэкІуащ. Абы и фІыгъэкІэ ди шыпхъум ахъшэ тІэкІу къилэжьыфащ. Апхуэдэ гуэр зэкъым-тІэукъым къызэрыхъуар.

НИГЕРИЕ: КЪЭРАЛЫМ И КУЛЬТУРЭР ЗЫЗОГЪЭЦІЫХУ

Дэ Сьерра-Леоне илъэсибгъукІэ дыщылэжьащ. ИужькІэ Нигерием щыІэ Вефилым дагъэкІуащ. А филиалыр инышхуэт икІи сэ абы щызгъэзащІэр Сьерра-Леоне щызгъэзащІэу щытам хуэдэ лэжьыгъэт. Ауэ дызэрыІэпхъуар Полинэ къытехьэлъащ, сыт щхьэкІэ жыпІэмэ мазэ къэс сыхьэт 130 хуэдизкІэ хъыбарыфІ гъэІуным хэту ар есат. Абы Библием иригъаджэхэм щыщ куэдым Алыхьым гъунэгъу хуэзыщІын лъэбакъуэхэр ячт. Иджы Нигерием абы нэгъуэщІ лэжьыгъэ къратат: пщэдджыжьым щыщІэдзауэ пщыхьэщхьэ хъуху адрейхэм я щыгъыныр идыжыну икІи зэригъэпэщыжыну. И къалэныщІэм есэн щхьэкІэ зэманыфІ дэкІами, си щхьэгъусэм къыгурыІуащ къуэш, шыпхъухэм абы и лэжьыгъэр лъапІэу зэралъытэр. Полинэ и къаруми и зэманми щымысхьу Вефилым щылажьэхэр игъэгушхуэу щІидзащ.

Нигерием и культурэм десатэкъыми, дэ куэд къэтщІэн хуейт. Зэгуэр къыздэлажьэ къуэшым си офисым зы шыпхъу къыщІишащ. Ар Вефилым кърагъэблэгъа къудейти, къуэшым дызэригъэцІыхуну хуейт. Си Іэр хуэсшийуэ сэлам есхыну сыкъызэрытэджу, абы си лъабжьэм зыщІидзэри, си лъакъуэхэм деж зыкъридзыхащ. Сэ абы Іэнкун сищІат! Абдежым занщІэу сигу къэкІыжащ Апостолхэм 10:25, 26, Апокалипсис 19:10 ит псалъэхэр. «Апхуэдэу имыщІэну жесІэмэ, мынэхъыфІу пІэрэ?» — жысІэу сегупсыст. НэгъуэщІ лъэныкъуэкІэ сэ къызгурыІуэт Вефилым къыщрагъэблэгъакІэ, а шыпхъум Библием зыхуригъаджэм фІы дыдэу зэрыхищІыкІыр.

А шыпхъум сепсэлъэхукІэ къэхъуам сигъэгузавэти, иужькІэ а Іуэхур зэхэзгъэкІыну мурад сщІащ. Сэ къызэрызгурыІуамкІэ, ди шыпхъум а щІыпІэм къыщекІуэкІ хабзэр игъэзащІэу арат. ЦІыхухъухэми апхуэдэ сэламхыкІэ яІэт. Апхуэдэу зэращІымкІэ цІыхум щхьэщэ хуащІу аратэкъым, атІэ абы пщІэ зэрыхуащІыр къагъэлъагъуэу арат. Библиер зытепсэлъыхьыжхэми апхуэдэу ящІэу щытащ (1 Сам. 24:8). Абы щыгъуэ си шыпхъу лъапІэм зыри зэрыжезмыІам икІи ар Іэнкун зэрызмыщІам сыщыгуфІыкІыжащ.

Нигерием дэ щызэдгъэцІыхуащ илъэс куэд хъуауэ Алыхьым пэжу хуэлажьэ къуэш, шыпхъу куэд. Псалъэм папщІэ, Айза́я Адагбо́наb и щІалэгъуэм пэжыр къищІат. Ауэ иужькІэ абы уэшын уз къеуэлІати, ар апхуэдэ сымаджэхэр здэщыІэм ягъэкІуащ. А сымаджэщым щыІэхэм щыщу а зырат Иеговэ хуэлажьэр. Жагъуэгъухэр къызэрыпэщІэтым емылъытауэ, уэшын уз зэфыкІхэм щыщу цІыху 30-м щІигъум пэжыр къащтэну ди къуэш Айзая ядэІэпыкъуащ икІи а сымаджэщым зэхуэс щызэригъэпэщащ.

КЕНИЕ: МЫБЫ ЩЫІЭ КЪУЭШХЭР ШЫІЭНЫГЪЭ ЯХЭЛЪУ КЪЫСХУЩЫТАЩ

1996-нэ гъэм дэ Кением щыІэ филиалым дагъэкІуащ. Мы статьям и щІэдзапІэ дыдэм зи гугъу сщІа псалъэмакъым иужь, сэ а къэралым сыщыІатэкъым. Дэ Вефилым дыщыпсэут икІи щІэх-щІэхыурэ номин удзыфэ цІыкІухэр «хьэщІэу» къытхуэкІуэт. Абыхэм ди шыпхъу гуэрым пхъэщхьэмыщхьэхэр ихьу къалъэгъуамэ, занщІэу ар «яхъунщІэт». Зэгуэр ди шыпхъум щхьэгъубжэр Іухауэ къигъэнати, и пэшым къыщигъэзэжам номинхэр ІэфІу шхэуэ, щІэзу щІэсу илъэгъуащ. Шыпхъур кІийуэ пэшым къыщІэжыжащ, номинхэри нэхъ иныжу кІийуэ щхьэгъубжэмкІэ щІэпхъуэжахэщ.

Полинэрэ сэрэ суахи́ли бзэмкІэ екІуэкІ зэІущІэхэм дыкІуэу щІэддзащ. Куэд дэмыкІыу сэ къысхуагъэфэщащ книгоизучениер езгъэкІуэкІыну (иджыпсту абы зэреджэр «Библиер зэхуэсым щыджын»). Ауэ бзэр иджыри зэзгъэщІатэкъым, къызгурыІуи щыІэтэкъым. ЗэІущІэхэм фІыуэ зэрызыхуэзгъэхьэзырым и фІыгъэкІэ сэ упщІэхэм сыкъеджэфт, ауэ жэуап ятхэр тхылъым итым темыхуэмэ, сэ зыри къызгурыІуэтэкъым. КІэщІу жыпІэмэ, Іуэхур щІагъуэтэкъым икІи къуэш, шыпхъухэр сэ сфІэгуэныхь хъут. Сэ хуабжьу си гум дыхьащ а къуэш, шыпхъухэр шыІэныгъэрэ Іэдэбагърэ яхэлъу къызэрысхущытар.

США: МЫЛЪКУШХУЭ ЗЭРАБГЪЭДЭЛЪЫМ ЕМЫЛЪЫТАУЭ, ДИ КЪУЭШХЭР АЛЫХЬЫМ ХУЭПЭЖЩ

Дэ Кением илъэси дыщыІакъым. 1997-нэ гъэм Бруклин (Нью-Йорк) щыІэ Вефилым дыкърагъэблэгъащ. Мы къэралыр къулейт, ауэ мылъкушхуэм гугъуехь гуэрхэри къыпхуихьфынут (Прит. 30:8, 9). Абы емылъытауэ, мыбы щыпсэу къуэш, шыпхъухэм фІэщхъуныгъэ быдэ ягъэлъагъуэт. Абыхэм я зэманри я мылъкури зытрагъэкІуадэр нэхъ къулей зэрыхъуныратэкъым, атІэ Иеговэ и организацэм иригъэкІуэкІ лэжьыгъэр зэрагъэкІуэтэнырат.

Ди гъащІэм къриубыдэу дэ мызэ-мытІэу тлъэгъуащ, зэрыт Іуэхугъуэ гугъухэм емылъытауэ, ди къуэш, ди шыпхъухэр Иеговэ хуэпэжу къызэрынэр: Ирландием залымыгъэ къызэрыщекІуэкІым емылъытауэ, Африкэм Алыхьым и лэжьакІуэхэр зэрымащІэм икІи хуэмыщІауэ зэрыпсэум емылъытауэ, США-м къулеягъэ зэрыщыІэм емылъытауэ. Иеговэ хуабжьу егъэгуфІэ зыри зэран зыхуамыгъэхъуу и лэжьакІуэхэр пэжу къызэрыхуэлажьэм!

Зэрыдэ машинэр зэрылажьэм нэхърэ нэхъ псынщІэжу гъащІэр макІуэ (Иов 7:6). Иджыпсту дэ Уо́рвик щыІэ дунейпсо ІуэхузехьэпІэм дыщолажьэ. Лъагъуныгъэ пэж зи зэхуаку дэлъхэм дахэту Алыхьым дызэрыхуэлажьэм ди гур хегъахъуэ. Ди къарум къызэрикІкІэ ди Пащтыхьым дызэрыдэІэпыкъуфым насыпыфІэ дещІ. Куэд мыщІэу Хьисэ Мэссихь Алыхьым хуэпэжхэм фІыгъуэ куэд яхуищІэнущ (Мт. 25:34).