Ди тхыгъэхэм еджэхэм я упщІэхэр

Щхьэгъусэ къагъуэтын щхьэкІэ цІыхухэр щызэрыцІыху сайтхэр къэбгъэсэбэпыным Иеговэ и Щыхьэтхэр дапхуэдэу зэрыхущытыр?

Иеговэ хуейщ зэрышэ цІыхуитІыр насыпыфІэу щытыну икІи зэи зэбгъэдэмыкІыжыну (Мт. 19:4—6). Унагъуэ дыухуэну дыхуейуэ щытмэ, щхьэгъусэфІ къэдгъуэтыну сыт къыддэІэпыкъунур? ДыкъэзыгъэщІа Иеговэ псом нэхърэ нэхъыфІу ещІэ дызэрышэн ипи дызэрыша иужьи сыт тщІэн хуейми. Абы къыдит принципхэр къэдгъэсэбэпу щытмэ, дэ насыпыфІэу дыщытынущ. А принципхэм щыщ зыбжанэ зэпкърытхынщ.

Япэрауэ, дэ ттеухуауэ мыхьэнэшхуэ зиІэ гупсысэ дигу идгъэлъын хуейщ: «Гур псом нэхърэ нэхъ бзаджэщ икІи Іейуэ зэІыхьащ» (Иер. 17:9). ЩІалэмрэ хъыджэбзымрэ зэпсэлъэн щыщІадзэм деж я гурыщІэхэм я щхьэр ягъэуназэу унафэ тэмэм къащтэну зэран яхуэхъуфынущ. ГурыщІэ закъуэхэм тезыщІыхьу зэрышэну унафэ зыщІахэм ящыщ куэдыр иужькІэ абы хущІегъуэжащ (Прит. 28:26, Гъэсэпэтхыдэхэр). Абы къыхэкІкІэ Іущагъ хэлъкъым гурыщІэхэм зыдрагъэхьэхыу фІыуэ зэрымыцІыхуа цІыхуитІым псалъэ гуэрхэр зратыну.

Притчи 22:3 щыжыІащ: «Іущым шынагъуэ зыпэщІэхуэнур елъагъури зыщехъумэ, ауэ акъылыншэр къэмыувыІэу макІуэри гугъуехь куэдым пэщІохуэ». Ди жагъуэ зэрыхъунщи, языныкъуэхэм я щхьэмкІэ зыхащІащ сайтхэм е приложениехэм щхьэгъусэ пхуэхъун гуэр къыщыплъыхъуэм деж дапхуэдиз гуауэ абы къыпхуихьми. ИнтернетымкІэ зрагъэцІыхуа цІыхум хуэзэн щІадза иужь абыхэм къагурыІуащ ахэр къызэрагъэпцІар. Абы нэмыщІ апхуэдэ сайтхэр къагъэсэбэпурэ гъэпцІакІуэхэм цІыху мысакъхэм я ахъшэр къыІэщІагъэкІ. Иныкъуэхэм деж апхуэдэ цІыху напэншэхэм Иеговэ и Щыхьэту щыт хуэдэу фэ зытрагъауэ.

Абы нэмыщІ иджыри зы шынагъэ а Іуэхум пылъщ. Языныкъуэ сайтхэм зы цІыхур адрейм хуэкІуэрэ хуэмыкІуэрэ къащІэн щхьэкІэ математическэ формулэхэр къагъэсэбэп. Ауэ абы дзыхь щІыхуэпщІ хъун щхьэусыгъуэ зыри щыІэкъым. Щхьэгъусэ къыщыхэпхым деж цІыхухэм къагупсыса формулэхэм дзыхь хуэпщІыну Іущагъ хэлъу пІэрэ? Ахэр Библием ит принципхэм хуэбгъадэ хъуну пІэрэ? (Прит. 1:7; 3:5—7, Гъэс.).

Притчи 14:15 итщ: «ГъэпцІэгъуафІэм сытри и фІэщ мэхъу, губзыгъэм лъэбакъуэу ичым и нэІэ тригъэкІкъым» (Гъэс.). Шэч хэмылъу, цІыхур щхьэгъусэ тщІын ипэ дэ ар фІыуэ къэтцІыхуну дыхуейщ. Ауэ апхуэдэ сайтхэм цІыхур фІыуэ къыщыпцІыхуну егъэлеяуэ гугъущ. А цІыхур уэ птеухуа информацием еджэну хуит пщІамэ икІи куэдрэ фызэдэтхэу щытмэ, фэ фІыуэ фызэрыцІыхуу жыпІэ хъуну? ИнтернетымкІэ зи насыпыр къэзыгъуэтауэ зи гугъэхэр а цІыхум хуэзэу епсэлъа иужь и нэхъыбэм егъэлеяуэ хущІогъуэж.

Псаломым мыпхуэдэ псалъэхэр итщ: «Сэ пцІыупсхэм сабгъэдэсакъым икІи зэрыщытыр щІэзыхъумэхэм саригъусакъым» (Пс. 26:4). Куэдым Іей лъэпкъ халъагъуэкъым апхуэдэ сайтхэм я щхьэм теухуауэ пцІы гуэр иратхэну. НэхъыфІу зыкъагъэлъэгъуэн щхьэкІэ абыхэм зыгуэр ябзыщІыфынущ е зэрыщымыт гуэр жаІэфынущ. Языныкъуэхэм ятх ахэр Иеговэ и Щыхьэту щыту. Ауэ ар пэжу пІэрэ? Абыхэм псым зыщІагъэуауэ пІэрэ? Ахэр Иеговэ и еплъыкІэ зиІэ цІыхуу щыту пІэрэ? Иеговэрэ абыхэмрэ я зэхуаку зэхущытыкІэфІ дэлъу пІэрэ? Зэхуэсым щыщхэм абыхэм теухуауэ сыт жаІэр? Сыт хуэдэ щапхъэ абыхэм ягъэлъагъуэр: фІы хьэмэрэ Іей? Ахэр «ныбжьэгъу Іейуэ» щымыту пІэрэ? (1 Кор. 15:33; 2 Тим. 2:20, 21). Алыхьым и еплъыкІэкІэ щхьэгъусэ зрагъэгъуэтыну абыхэм хуитыныгъэ яІэу пІэрэ? Мы упщІэхэм я жэуапхэр пщІэным мыхьэнэшхуэ иІэщ. Ауэ ахэр къыпхуэщІэнукъым уигу ирихьар зыцІыху къуэш, шыпхъухэм уемыпсэлъауэ (Прит. 15:22). Абы нэмыщІ Иеговэ хуэпэж цІыхур «фІэщхъуныгъэ зимыІэхэм... зы бжьым» дэщІэувэнукъым (2 Кор. 6:14; 1 Кор. 7:39).

Зэрытлъагъущи, щхьэгъусэ къэбгъуэтын щхьэкІэ апхуэдэ сайтхэр къэбгъэсэбэпыным шынагъэ пылъщ. Дэнэ-тІэ щхьэгъусэ пхуэхъун цІыхур къыщыбгъуэт хъунур? ЦІыхухэм зэхуэсыну хуитыныгъэ щаІэм деж Иеговэ и Щыхьэтхэм Іэмал яІэ мэхъу зэІущІэхэм, конгрессхэм икІи нэгъуэщІ зэхуэсхэм щызэрыцІыхуну.

Ауэ цІыхухэм зэхуэсыну хуитыныгъэ щамыІэм деж, псалъэм папщІэ, COVID-19 пандемиер щекІуэкІым щыгъуэ, дызэІущІэн щхьэкІэ дэ электроннэ Іэмэпсымэхэр къыдогъэсэбэп. Абыхэм я фІыгъэкІэ унагъуэ зыухуэну хуей Иеговэ и Щыхьэтхэм нэгъуэщІ къуэш, шыпхъухэр зрагъэцІыхуну Іэмал яІэ мэхъу. Абыхэм заданиехэр зэрагъэзащІэр икІи жэуапхэр зэратыр тлъэгъуфынущ (1 Тим. 6:11, 12). Абы нэмыщІ зэІущІэ нэужьым дэ гуп цІыкІуурэ сессионнэ залхэм дыщызэдэуэршэрыну Іэмал диІэщ. ЗэІущІэхэм нэмыщІ видеосвязькІэ Иеговэ и Щыхьэтхэр щызэхуэзэм дежи цІыхум теухуауэ куэд къэтщІэфынущ. Псалъэм папщІэ, абы и щытыкІэмрэ ар нэгъуэщІхэм зэрепсалъэмрэ щытлъагъум деж дэ а цІыхур зэрыщыт дыдэр къыдощІэ (1 Пет. 3:4). Зэман гуэр дэкІа иужь фэ къывгурыІуэнущ фи мурадхэмрэ фи дежкІэ лъапІэу щытымрэ зэтехуэрэ зэтемыхуэрэ икІи зэщхьэгъусэфІ фыхъунрэ фымыхъунрэ.

Иеговэ и Щыхьэтхэм щхьэгъусэ къыщалъыхъуэм деж Библием ит принципхэр къагъэсэбэпу щытмэ, абыхэм я унагъуэр насыпыфІэ хъуну къыщІэкІынщ. Апхуэдэ унагъуэм «Тхьэуэ Зиусхьэным и нэфІи къыщыхуэнущ» (Прит. 18:22, Гъэс.).