«Иеговэ сэ зэи сыщыгъупщакъым»

Сэ 1983-нэ гъэм сыкъалъхуащ икІи сабий узыншэу сыкъэхъуащ. Ауэ илъэсипщІ сыщыхъум си Іэпкълъэпкъ псор хуабжьу къызэузу щІидзащ. ИлъэситІ хуэдиз дэкІауэ зысхуэмыгъэхъейуэ сыхъуащ: пщэдджыжь гуэрым сыкъэушри, сыт сымыщІами си лъакъуэхэр схуэгъэхъеякъым. Абы лъандэрэ сэ къысхуэкІухькъым. Абы нэмыщІ узым и ягъэкІэ хэхъуэн щызгъэтати, сыщыцІыкІуам сызэрыщытам хуэдэу сыкъэнащ.

Зэгуэр ди деж Иеговэ и Щыхьэт цІыхубзитІ къэкІуат. Абы щыгъуэ сэ мазэ зыбжанэ хъуауэ унэм сыкъыщІэкІатэкъым. Сэ цІыхухэм закъезгъэлъагъутэкъым, ауэ абы щыгъуэ мурад сщІащ абыхэм сепсэлъэну. Ахэр жэнэтым къысхутепсэлъыхьат икІи абы сигу къигъэкІыжащ илъэситху хуэдиз сыщыхъум зэхэсхауэ щытар. Абы щыгъуэ Сурина́м къикІыу ди къуажэм мазэм зэ Дже́тро зицІэ миссионер къакІуэт. Абы си адэр Библием иригъаджэт. Джетро сэ сыт щыгъуи гуапэу къысхущытт икІи ар сэ хуабжьу сигу ирихьт. Абы нэмыщІ ди къуажэм Иеговэ и Щыхьэтхэм я зэхуэсым си адэшхуэмрэ си анэшхуэмрэ кІуэти, абыхэм иныкъуэм деж сэри сыкъыздащтэт. Абы къыхэкІкІэ цІыхубз къэкІуахэм щыщ зыр (абы и цІэр Флоре́нст) пэжым теухуауэ нэхъыбэ къэсщІэну сыхуейрэ сыхуэмейрэ къыщызэупщІам щыгъуэ, сызэрыхуейр жесІащ.

ИужькІэ Флоренс и щхьэгъусэ Джа́стус и гъусэу къэкІуащ икІи абыхэм Библием срагъаджэу щІадзащ. Сэ сызэремыджэфым гу лъата иужь, абыхэм еджэкІэ срагъасэу щІадзащ икІи зэман гуэр дэкІри, сэ еджэкІэ зезгъэсащ. ИужькІэ Джастусрэ Флоренсрэ Суринам хъыбарыфІыр щагъэІуну ягъэкІуащ, абы къыхэкІкІэ Библием сезыгъэджэн зыри Ореаллэ къыщынакъым. Ауэ си насыпти, Иеговэ сэ зэи сыщыгъупщакъым.

Куэд дэмыкІыу Ореаллэ Флойд зи цІэ пионер къэкІуащ. ХъыбарыфІыр игъэІуурэ ар ди дежи къыІухьащ. Библием сригъэджэну абы къыщызжиІам щыгъуэ, сэ сыкъыпыгуфІыкІащ. «Сыт ущІэгуфІэр?» — къызэупщІащ ар. Сэ абы жесІащ «Сыт къытхуигъэувыр Алыхьым?» жыхуиІэ брошюрэр зэрызджар, «Мыухыж гъащІэм ухуэзышэ щІэныгъэ»a жыхуиІэ тхылъри джын зэрыщІэздзар икІи Библие джыныр щІызэпыуам и щхьэусыгъуэр къыгурызгъэІуащ. «ЩІэныгъэ» тхылъым къэнэжа псалъащхьэхэм Флойд сригъэджэжащ, ауэ иужькІэ ари хъыбарыфІыр нэгъуэщІыпІэ щигъэІуну ягъэкІуащ. Апхуэдэу сэ аргуэру сезыгъэджэн симыІэу сыкъэнащ.

Ауэ 2004-нэ гъэм Ореаллэ специальнэ пионеритІ къагъэкІуащ, Гра́нвиллрэ Джо́шуарэ. ХъыбарыфІыр щагъэІум щыгъуэ ахэр си деж къыІухьащ икІи Библиер зджыну сыхуейрэ сыхуэмейрэ къызэупщІащ. Сэ аргуэру сыкъыпыгуфІыкІри, «ЩІэныгъэ» тхылъым ипэм щыщІэдзауэ срагъэджэну селъэІуащ. Сэ къэсщІэну сыхуейт япэм Библием сезыгъэджахэм сызыхурагъэджам хуэдэ дыдэ мыбыхэм срагъэджэнрэ срамыгъэджэнрэ. Гранвилл къызжиІащ къуажэм зэІущІэхэр зэрыщекІуэкІыр. Сэ илъэсипщІым нэблагъэкІэ унэм сыкъыщІэкІатэкъым, ауэ а зэІущІэм сэ зыкІэ сыкІуэну сыхуейти! Гранвилл сэ къыздэІэпыкъуащ: ар си деж къакІуэри, инвалиднэ креслэм сригъэтІысхьэри, Иеговэ и Щыхьэтхэр щызэхуэс Унэм сишащ.

ИужькІэ Гранвилл «Школа теократического служения» жыхуиІэм зыхезгъэтхэну сыхуигъэушащ. Абы къызжиІащ: «Уэ къэпкІухьыфкъым, ауэ уопсэлъэф. Зэгуэр гъэхьэзыра псалъэ уэ жыпІэнущ. Іэмал имыІэу жыпІэнущ!» Абы и псалъэхэм сэ гушхуэныгъэ къысхалъхьащ.

Сэ Гранвилл и гъусэу хъыбарыфІыр згъэІуу щІэздзащ. Ауэ инвалиднэ креслэм сису ди гъуэгу быркъуэшыркъуэм сыкъыщрашэкІыну гугъути, сэ хэкІыпІэ къэзгъуэтащ — Гранвилл селъэІуащ гу цІыкІум сису сыкъришэкІыну. 2005-нэ гъэм, мэлыжьыхьым сэ псым зыщІэзгъэуащ. Абы иужь куэд дэмыкІыу къуэшхэм срагъэсащ ди тхыгъэхэмрэ зэхуэсым щІэт аппаратурэмрэ сыкІэлъыплъу.

2007-нэ гъэм ди унагъуэм гузэвэгъуэшхуэ къылъэІэсащ: си адэр кхъуафэжьейм къихури удынышхуэ игъуэтати, махуэ зытІущ дэкІри лІащ. Ди унагъуэм ар егъэлеяуэ къыдэхьэлъэкІащ. Гранвилл ди гъусэу Иеговэ лъэІукІэ зыхуигъазэт икІи Библием щыщ псалъэхэмкІэ гупсэхугъуэ къыдитт. ИлъэситІ дэкІри, иджыри зы гуауэшхуэ къэхъуащ — Гранвилл зис кхъуафэжьейр псым щІилъафэри, ар итхьэлащ.

Ди зэхуэс цІыкІум щыщхэм псоми къэхъуа Іуэхугъуэр хуабжьу я гум къеуащ. Зэхуэсым и дэІэпыкъуэгъу закъуэм фІэкІ, зэхуэсым и нэхъыжь димыІэжу дыкъэнащ. Гранвилл и лІэныгъэр сэ хуабжьу къызэхьэлъэкІащ, сыт щхьэкІэ жыпІэмэ ар сэ ныбжьэгъу пэж схуэхъуат. Ар сыт щыгъуи къыздэІэпыкъут, Алыхьым и лэжьыгъэм пыщІа ІуэхухэмкІи, нэгъуэщІ ІуэхухэмкІи. Ар лІа иужь япэу екІуэкІа зэІущІэм сэ «ХъумакІуэ чэщанэм» щыщ статьям сыкъеджэн хуейт. Япэ абзацитІым сыкъеджа иужь, си гур къызэфІэзэрыхьри, си нэпсхэр къысфІыщІэжащ — адэкІэ седжэну къару сиІэтэкъым.

Зэман гуэр дэкІри нэгъуэщІ зэхуэсым щыщ къуэшхэр ди зэхуэсым къэкІуащ икІи абы сэ сигъэгушхуэжащ. Абы нэмыщІ специальнэ пионеру лажьэ ди къуэш Ко́джо филиалым Ореаллэ къытхуигъэкІуащ. Си анэмрэ си къуэш нэхъыщІэмрэ Библие джын щІадзэри псым зыщІагъэуати, сэ абы икъукІэ сригуфІащ. 2015-нэ гъэм, гъатхэпэ мазэм сэ зэхуэсым и дэІэпыкъуэгъу сащІащ. Зэман гуэр дэкІри, сэ си япэ гъэхьэзыра псалъэр жысІащ. А махуэм сэ сыгуфІэу икІи гуфІэгъуэ нэпсхэр къысфІыщІэжу илъэс зыбжанэ ипэ Гранвилл къызжиІа псалъэхэр сигу къэзгъэкІыжащ: «Зэгуэр гъэхьэзыра псалъэ уэ жыпІэнущ. Іэмал имыІэу жыпІэнущ!»

JW Broadcasting^® программэхэм я фІыгъэкІэ сэ сызыпэщІэхуэ гугъуехьхэм хуэдэ пэщІэхуэ Иеговэ и Щыхьэтхэм теухуауэ къэсщІащ. А къуэш, шыпхъухэм узыншагъэм пыщІа гугъуехь куэд яІэми, абыхэм мыхьэнэ зиІэ гъащІэ насыпыфІэ ирахьэкІ. Абыхэм хуэдэуи, сэри си къарууэ хъуар Иеговэ хуэлэжьэным тезгъэкІуэдэну сыхуейти, общэ пионер сыхъуащ. Абы нэмыщІ 2019-нэ гъэм, фокІадэм сызэмыжьауэ мыхьэнэшхуэ зиІэ Іуэхугъуэ къэхъуащ — сэ зэхуэсым и нэхъыжь сащІащ! ИкІи иджы къуэш, шыпхъу плІыщІ зыхэт зэхуэсым сыдоІэпыкъу.

Библием сезыгъэджа икІи хъыбарыфІыр згъэІуну къыздэІэпыкъуа къуэш, шыпхъухэм сэ фІыщІэшхуэ яхузощІ. Ауэ псом нэхърэ нэхъыбэу сэ Иеговэ фІыщІэ хузощІ, абы сэ зэи сыщыгъупщакъым.