Нэчыхьым пщІэ хуэфщІ

1, 2. Еврейхэм 13:4 ит псалъэхэм сытым дыхуагъэушрэ?

ДЭ ПСОМИ Иеговэ щІыхь хуэтщІыну дыхуейщ. Абы пщІэ хуэтщІыну хуэфащэщ икІи езыми пщІэ къытхуищІыжыну дыкъегъэгугъэ (1 Сам. 2:30; Прит. 3:9, Гъэсэпэтхыдэхэр; Апок. 4:11). Абы нэмыщІ ар хуейщ нэгъуэщІ цІыхухэм пщІэ яхуэтщІыну, псалъэм папщІэ къэрал унафэщІхэм (Рим 12:10; 13:7). Ауэ пщІэ зыхуэтщІын хуей нэгъуэщІ гуэри щыІэщ — ар нэчыхьыращ. Абы мыхьэнэшхуэ иІэщ.

² Апостол Паул итхат: «Нэчыхьыр цІыху псоми ирегъэлъапІэ, лІымрэ фызымрэ я пІэр къабзэу щрет» (Евр. 13:4). Мы едзыгъуэм ит Паул и чэнджэщым къегъэлъагъуэ Хьисэ и лъэужь ирикІуэ дэтхэнэми нэчыхьыр лъапІэу илъытэн зэрыхуейр. ФызэупщІыж: «Сэри апхуэдэу нэчыхьым сыхущыт?» Мы упщІэм мыхьэнэшхуэ иІэщ, псом хуэмыдэу щхьэгъусэ зиІэхэм дежкІэ.

3. Нэчыхьым теухуауэ Хьисэ сыт хуэдэ унафэ итар? (Статьям ипэм ит сурэтым феплъ.)

³ Нэчыхьым пщІэ хуэтщІмэ, дэ Хьисэ щапхъэ тыдох. Фарисейхэр Хьисэ къыбгъэдыхьэри зэщхьэгъусэхэр зэбгъэдэкІыж хъунрэ мыхъунрэ къеупщІат. Абдежым япэ унагъуэр зыухуа Алыхьым и псалъэхэр Хьисэ къихьащ: «ЛІыр и адэ-анэм яхэкІынурэ, и фызым щІыгъуу тІури зыпкъ хъунущ». ИкІи щІигъужащ: «Тхьэм гъусэ зэхуищІа цІыхуитІыр цІыхум зэбгъэдигъэкІыж хъунукъым». (Къеджэ Марк 10:2—12; ЩІэдз. 2:24).

4. Нэчыхьым теухуауэ Иеговэ сыт хуэдэ мурад иІа?

⁴ Хьисэ и псалъэхэмкІэ къигъэлъэгъуащ нэчыхьыр Алыхьым зэриухуар икІи зэщхьэгъусэхэр зэбгъэдэкІыж зэрымыхъунур. Алыхьым Іэдэмрэ Хьэуарэ яжриІакъым я нэчыхьыр якъутэж хъуну. Иеговэ и мурадымкІэ ахэр игъащІэ псокІэ зэдэпсэун хуейт.

ПІАЛЪЭ ГУЭРКІЭ НЭЧЫХЬЫМ ХЫХЬА ЗЭХЪУЭКІЫНЫГЪЭХЭР

5. ЦІыхухэр лІэуэ зэрыхъуам щхьэкІэ нэчыхьым сыт хуэдэ зэхъуэкІыныгъэ къыхыхьа?

⁵ Ауэ Іэдэм ищІа гуэныхьым цІыхухэм я гъащІэр ихъуэжащ. Арати, цІыхухэр лІэуэ зэрыхъуам щхьэкІэ нэчыхьым зэхъуэкІыныгъэ къыхыхьащ. Апостол Паул къызэрыдгуригъэІуамкІэ, Алыхьым и лэжьакІуэм и щхьэгъусэр лІауэ щытмэ, я нэчыхьыр мэкъутэ икІи нэгъуэщІ щхьэгъусэ зригъэгъуэтыжыну ар хуит мэхъу (Рим 7:1—3).

6. Алыхьыр нэчыхьым зэрыхущытым теухуауэ Мусэ и хабзэм сыт къыдгуригъаІуэр?

⁶ Алыхьым израил лъэпкъым ирита Хабзэм нэчыхьым теухуауэ унафэхэр итт. Псалъэм папщІэ, а зэманым цІыхухъум зы щхьэгъусэ нэхърэ нэхъыбэ иІэ хъуну Алыхьым яхуидат. Ауэ Алыхьым и лъэпкъым Хабзэр иримыт щІыкІи, цІыхухэм апхуэдэу ящІу щытащ. ИкІи а Хабзэм цІыхубзхэмрэ сабийхэмрэ къихъумэт. Псалъэм папщІэ, израил лъэпкъым щыщ цІыхухъум щхьэгъусэу пщылІ цІыхубз иІэу, етІуанэ къишэу щытми, япэ щхьэгъусэм хуэгъэзауэ лІым адэкІи и къалэнхэр игъэзэщІэн хуейт. Алыхьым цІыхухъум хуигъэувт а цІыхубзыр къихъумэну икІи зыхуэныкъуэу хъуар иритыну (Исх. 21:9, 10). Дэ нобэ Мусэ и хабзэм дытетын хуэмейми, абы къыдгурегъаІуэ Алыхьым нэчыхьыр лъапІэу зэрилъытэр. Абы дызэрегупсысыр къыддоІэпыкъу дэри апхуэдэу нэчыхьым дыхущытыну.

7, 8. 1) Нэчыхь къутэжыным теухуауэ сыт Второзаконие 24:1 итыр? 2) Зэщхьэгъусэхэр зэрызэбгъэдэкІыжым Иеговэ дауэ зэрыхущытыр?

⁷ Нэчыхь къутэжыным теухуауэ сытыт Хабзэм итыр? Нэчыхьым Иеговэ зэрыхущытым зимыхъуэжами, Хабзэм цІыхухъум хуидэт и щхьэгъусэр иригъэкІыжыну, абы «къемызэгъ гуэрхэр ищІэу дилъагъумэ». (Къеджэ Второзаконие 24:1a.) «Къемызэгъ гуэру» цІыхубзым ищІэнкІэ хъуным теухуауэ Хабзэм зыри щыжыІатэкъым. Ауэ абы зи гугъу ищІыр Іуэху цІыкІуфэкІу гуэртэкъым — ар унагъуэм и напэр тезых къуаншагъэшхуэу щытын хуейт (Втор. 23:14). Ауэ, ди жагъуэ зэрыхъунщи, Хьисэ щІылъэм щытета зэманым щыгъуэ журт куэдым я щхьэгъусэхэр «сыт хуэдэ щхьэусыгъуэкІи» ирагъэкІыж хъуну къалъытэт (Мт. 19:3). Дэ, дауикІ, дыхуейкъым нэчыхьым апхуэдэ еплъыкІэ худиІэну.

⁸ Зэщхьэгъусэхэр зэрызэбгъэдэкІыжым Алыхьыр зэрыхущытыр бегъымбар Малахие итхащ. Абы и зэманым цІыхухъухэм я щІалэгъуэм къаша я щхьэгъусэр ирагъэкІыжын я хьэлт. Ахэр хуейуэ къыщІэкІынт нэгъуэщІ лъэпкъхэм щыщ ныбжькІэ нэхъ щІалэ цІыхубзхэр къашэну. А Іуэхум теухуауэ Иеговэ жиІар Малахие итхащ: «Нэчыхь къутэжыныр слъагъу хъукъым» (Мал. 2:14—16). А гупсысэр хуокІуэ Иеговэ япэ дыдэ унагъуэр щиухуам щыгъуэ жиІа псалъэхэм: «ЛІыр... и фызым щІыгъуу, тІури зыпкъ хъунущ» (ЩІэдз. 2:24). Хьисэ и Адэм и еплъыкІэм хуэдэ иІэт. Абы жиІащ: «Тхьэм гъусэ зэхуищІа цІыхуитІыр цІыхум зэбгъэдигъэкІыж хъунукъым» (Мт. 19:6).

НЭЧЫХЬЫР ЩІЭПКЪУТЭЖ ХЪУНЫМ ЗЫ ЩХЬЭУСЫГЪУЭЩ ИІЭР

9. Марк 10:11, 12 ит Хьисэ и псалъэхэм сыт къикІыр?

⁹ Зыгуэрым мыпхуэдэ упщІэ иІэнкІэ хъунущ: «Иеговэ и лэжьакІуэм нэчыхьыр икъутэжу, нэгъуэщІ щхьэгъусэ зригъэгъуэтыну щхьэусыгъуэ иІэ?» Хьисэ жиІащ: «Зи фыз изыгъэкІыжу нэгъуэщІ фыз къэзышэж дэтхэнэми япэрей фызымкІэ зинэ ищІауэ мэхъу. Фызри и лІым бгъэдэкІыжу нэгъуэщІ лІым дэкІуэжмэ, абыи зинэ ищІауэ мэхъу» (Мк. 10:11, 12; Лк. 16:18). ГурыІуэгъуэщ, Хьисэ нэчыхьым пщІэ зэрыхуищІу щытар икІи адрейхэми апхуэдэу ящІэну зэрыхуеяр. ЦІыхухъум къыхуэпэж и щхьэгъусэр зы щхьэусыгъуэ гуэркІэ иригъэкІыжу нэгъуэщІ къишэжмэ, иригъэкІыжам епцІыжауэ жыпІэ хъунут. Апхуэдэ дыдэу жыпІэ хъунущ цІыхубзыр къыхуэпэж и щхьэгъусэм бгъэдэкІыжмэ. Ар апхуэдэу щІыщытыр зэщхьэгъусэхэр зэрызэбгъэдэкІыжым нэчыхьыр икъутэжкъым — Алыхьым и дежкІэ ахэр адэкІи «тІури зыпкъыу» щытщ. Абы нэмыщІ Хьисэ зэрыжиІамкІэ цІыхухъум къыхуэпэж и щхьэгъусэр иригъэкІыжмэ, зинэ ищІэну хуигъэушу жыпІэ хъунущ. Дапхуэдэу? А зэманым ирагъэкІыжа цІыхубзыр зэрыпсэун имыІэжу къэмынэн щхьэкІэ нэгъуэщІ цІыхухъум дэкІуэжын хуей хъут. Абы щыгъуэ ар и япэ щхьэгъусэм епцІыжауэ жыпІэ хъунут.

10. Иеговэ и лэжьакІуэм нэчыхьыр икъутэжу, нэгъуэщІ щхьэгъусэ зригъэгъуэтыну сыт хуэдэ щхьэусыгъуэ иІэр?

¹⁰ Ауэ Хьисэ жиІащ нэчыхьыр щІэпкъутэж хъуным зы щхьэусыгъуэ иІэу. Ар къыбгурагъаІуэ абы и псалъэхэм: «И фыз зинэ имыщІауэ [алыдж. порне́йа] ар изыгъэкІыжу нэгъуэщІ фыз къэзышэж дэтхэнэми зинэ ищІауэ мэхъу» (Мт. 19:9). Хьисэ Іуащхьэм тету псалъэ щыжиІам щыгъуэ ар дыдэм и гугъу ищІащ (Мт. 5:31, 32). ТІум щыгъуэми Хьисэ «зинэ щІэныр» къыхигъэщащ. Зинэ щІэным куэд хеубыдэ: и щхьэгъусэм епцІыжыныр, къэхьпагъэр, нэчыхь зимыІэ цІыхухэр зэгъусэныр, цІыхухъуитІ е цІыхубзитІ зэгъусэныр е цІыхумрэ псэущхьэмрэ зэгъусэныр. Псалъэм папщІэ, щхьэгъусэ зиІэ цІыхухъум зинэ ищІауэ щытмэ, цІыхубзым унафэ ищІыну хуитщ абы бгъэдэкІыжынрэ бгъэдэмыкІыжынрэ. Я нэчыхьыр якъутэжмэ, Алыхьым ахэр зэщхьэгъусэу афІэкІа къилъытэжынукъым.

11. Иеговэ и лэжьакІуэм и щхьэгъусэм зинэ ищІами, абы бгъэдэмыкІыжыну сыт унафэ щІищІынкІэ хъунур?

¹¹ Гу лъыфтэ: Хьисэ жиІакъым уи щхьэгъусэм зинэ ищІамэ (порне́йа), абы Іэмал имыІэу убгъэдэкІыжын хуейуэ. Псалъэм папщІэ, цІыхубзым и щхьэгъусэм бгъэдэмыкІыжмэ нэхъыфІу илъытэнкІэ хъунущ. Сыт щхьэкІэ? Къэхъуам емылъытауэ, абы и лІыр фІыуэ илъагъуу къыщІэкІынщ, абы къыхэкІкІэ я зэхуаку дэлъа зэхущытыкІэр зэтригъэувэжыну мурад ищІынкІэ хъунущ. Абы нэмыщІ цІыхубзым къыгурыІуэу къыщІэкІынщ и щхьэгъусэм бгъэдэкІыжрэ нэгъуэщІым дэмыкІуэжмэ, гугъуехь гуэрхэм зэрыпэщІэхуэнур. Псалъэм папщІэ, и щхьэр езым ипІыжыфыну пІэрэ? Зыгуэрым иригъусэну и Іэпкълъэпкъым и хъуэпсэныгъэхэм ебэныфыну? Закъуэныгъэ зыхимыщІэну пІэрэ? ЗэрызэбгъэдэкІыжар сабийхэм зэран хуэхъуну? Ахэр Библием ит пэжхэм хуригъэджэну нэхъ гугъу хъуну? (1 Кор. 7:14). Пэжщ, зэщхьэгъусэхэр зэрызэбгъэдэкІыжым гугъуехь куэд кърикІуэфынущ.

12, 13. 1) Хьошеа и унагъуэм сыт къыщыхъуар? 2) Хьошеа Гомерь сыт унэм къыщІишэжар икІи зэщхьэгъусэхэм абы сыт хуэдэ дерс хахыфыну?

¹² Алыхьыр нэчыхьым зэреплъыр къыдгурыІуэн щхьэкІэ Хьоше́а (Осие) бегъымбарым и щапхъэр зэпкърытхынщ. Иеговэ абы унафэ хуищІащ: «Зинэ зыщІэу щытыну цІыхубз щхьэгъусэу къашэ». Абы нэмыщІ жриІащ: «ЗинэкІэ къалъхуа бынхэр уиІэнущ». Хьошеа Гомерь къишэри, абы «къуэ къыхуилъхуащ» (Ос. 1:2, 3). ИужькІэ абы нэчыхьыншэу къуэрэ, пхъурэ къилъхуащ. Ауэ Гомерь мызэ-мытІэу и щхьэгъусэм зэрепцІыжам емылъытауэ, Хьошеа ар иригъэкІыжакъым. ИкІэм-икІэжым Гомерь и щхьэгъусэ бегъымбарыр къигъанэри, пщылІыпІэ ихуащ. Ауэ Хьошеа ар къищэхужащ (Ос. 3:1, 2). Хьошеа и щапхъэмкІэ Иеговэ дигъэлъэгъуащ израил лъэпкъыр куэдрэ абы епцІыжами, мызэ-мытІэу къазэрыхуигъэгъуар. Сытым дэ абы дыхуигъасэрэ?

¹³ Иеговэ и лэжьакІуэм и щхьэгъусэр къепцІыжамэ, абы унафэ ищІын хуейщ. Зы лъэныкъуэкІэ, Хьисэ жиІам тепщІыхьмэ, абы щхьэусыгъуэ иІэщ нэчыхьыр икъутэжу, нэгъуэщІ унагъуэ иухуэну. НэгъуэщІ лъэныкъуэкІэ, и щхьэгъусэм къыхуигъэгъунуи хуитщ. Абы зыри Іей хэлъкъым. Хьошеа Гомерь унэм къишэжри, афІэкІа зинэ имыщІэну жриІащ. Зы зэман гуэркІэ Хьошеа абы иригъусакъым, ауэ иужькІэ иригъусэн щІидзэжащ. Абы хуэдэу Иеговэ хьэзырт и лъэпкъым ищІар къыхуигъэгъуну икІи я зэхуаку дэлъа зэхущытыкІэр иухуэжыну (Ос. 1:11; 3:3—5). Зэщхьэгъусэхэм абы сыт хуэдэ дерс хахыфыну? Иеговэ и лэжьакІуэм къепцІыжа и щхьэгъусэм иригъусэн щІидзэжмэ, абы зэрыхуигъэгъуар къегъэлъагъуэ (1 Кор. 7:3, 5). Абы иужькІэ абы щхьэусыгъуэ иІэжкъым нэчыхьыр икъутэжыну. Иджы зэщхьэгъусэхэр зэдэІэпыкъужурэ нэчыхьым пщІэ хуащІу икІи абыкІэ Алыхьым щапхъэ трахыу зрагъэсэн хуейщ.

ЗЭЩХЬЭГЪУСЭХЭР ГУГЪУЕХЬХЭМ ЩЫПЭЩІЭХУЭМ ДЕЖ

14. 1 Коринф 7:10, 11 зэритымкІэ, сыт унагъуэм къыщыхъункІэ хъунур?

¹⁴ Иеговэрэ Хьисэрэ хуэдэу, Алыхьым и лэжьакІуэхэм нэчыхьым пщІэ хуащІын хуейщ. Ауэ гуэныхь зэрытхэлъым къыхэкІкІэ ар языныкъуэхэм дежкІэ гугъущ (Рим 7:18—23). Абы къыхэкІкІэ дэ дгъэщІэгъуэн хуейкъым япэ лІэщІыгъуэм псэуа языныкъуэ Алыхьым и лэжьакІуэ зэщхьэгъусэхэм гугъуехьхэр яІэу зэрыщытар. Паул итхат: «Фызыр и лІым бгъэдэкІыж хъунукъым». Ауэ иныкъуэм деж апхуэдэ къэхъут. (Къеджэ 1 Коринф 7:10, 11.)b

15, 16. 1) Зэщхьэгъусэхэм я зэхуаку гугъуехь гуэрхэр къыдыхьауэ щытмэ, сыт абыхэм ящІэн хуейр икІи сыт щхьэкІэ? 2) Иеговэ и Щыхьэтым и щхьэгъусэр Алыхьым хуэмылажьэмэ икІи я унагъуэм гугъуехь гуэр илъу щытмэ, Библием ит сыт хуэдэ чэнджэщым ар тетын хуей?

¹⁵ ЦІыхубзым и щхьэгъусэр къигъанэу щхьэхуэу псэуну унафэ щІищІынкІэ хъунур Паул жиІакъым. Ауэ абы и щхьэусыгъуэр и лІыр къызэрепцІыжаратэкъым, армыхъумэ абы нэчыхьыр икъутэжу нэгъуэщІым дэкІуэжыну хуит хъунут. Паул итхат, зи щхьэгъусэр къэзыгъанэ цІыхубзыр зыми дэкІуэж зэрымыхъунур е и щхьэгъусэм екІужын зэрыхуейр, сыт щхьэкІэ жыпІэмэ Алыхьым и дежкІэ ахэр иджыри зэщхьэгъусэу щытщ. Паул и псалъэхэм къызэрыхэщымкІэ, зэщхьэгъусэхэм я зэхуаку гугъуехь гуэрхэр къыдыхьауэ щытми, зинэ ямыщІауэ зыр зым хуэпэжмэ, ахэр зэкІужын хуейщ. Абыхэм зэхуэсым и нэхъыжьхэм зыхуагъазэ хъунущ, ахэр къадэІэпыкъун щхьэкІэ. Зэхуэсым и нэхъыжьхэм зыми и лъэныкъуэ ямыубыду, Библием тегъэщІа чэнджэщхэр абыхэм иратыфынущ.

¹⁶ Ауэ Иеговэ и Щыхьэтым и щхьэгъусэр Алыхьым хуэмылажьэмэ-щэ? Я унагъуэм гугъуехь гуэр илъу щытмэ, Иеговэ и лэжьакІуэр щхьэхуэу псэуну хуит? Ипэм зэрыжытІащи, Библием зэритымкІэ зэщхьэгъусэхэр щызэбгъэдэкІыж хъунур зым зинэ ищІауэ щытмэщ, ауэ ахэр щхьэхуэу псэу щІэхъунум и щхьэусыгъуэхэр иткъым. Паул итхащ: «Фыз гуэрым фІэщхъуныгъэ зимыІэ лІы иІэмэ, лІыри абы дэпсэуну хуеймэ, фызым и лІыр зыбгъэдигъэкІыж хъунукъым» (1 Кор. 7:12, 13). А чэнджэщым ноби дытетын хуейщ.

17, 18. Алыхьым и лэжьакІуэ языныкъуэхэм, я Іуэхур дапхуэдэу гугъуу щымытами, я щхьэгъусэр къамыгъэнэну сыт унафэ щІащІыр?

¹⁷ Ауэ «фІэщхъуныгъэ зимыІэ лІым» и щхьэгъусэм дэпсэуну зэрыхуэмейр и щытыкІэмкІэ къыщигъэлъагъуэ къохъу. Псалъэм папщІэ, и щхьэгъусэр хуабжьу иукІынкІэ хъунущ икІи фызым илъытэнкІэ хъунущ ар и узыншагъэм зэран хуэхъуу икІи и гъащІэр фІэкІуэдынкІэ шынагъэ щыІэу. Абы нэмыщІ къэхъункІэ хъунущ цІыхухъум и унагъуэр зыхуей хуигъэзэн имыдэу е Иеговэрэ фызымрэ я зэхуаку дэлъ зэхущытыкІэм зэран хуэхъуу. Апхуэдэм деж Иеговэ и лэжьакІуэ цІыхубзым унафэ ищІынкІэ хъунущ и щхьэгъусэм имыгъусэу щхьэхуэу псэуну, и лІым абы дэпсэуну хуэмейуэ жимыІауэ щытми. Ауэ апхуэдэ Іуэхугъуэ ихуа иужь, языныкъуэ шыпхъухэм мурад ящІ я щхьэгъусэм и гъусэу къанэу, я зэхущытыкІэр зэтрагъэувэжыну. Сыт щхьэкІэ?

¹⁸ ЛІымрэ фызымрэ щхьэхуэу псэуну мурад ящІми, ахэр зэщхьэгъусэу къэнэнущ икІи ипэкІэ дызытепсэлъыхьа гугъуехьхэм хуэдэ тІури пэщІэхуэнущ. Зэщхьэгъусэхэр зэгъусэу къэнэн щІыхуейм иджыри и зы щхьэусыгъуэр апостол Паул жиІащ: «Сыт щхьэкІэ жыпІэмэ фІэщхъуныгъэ зимыІэ лІыр фызым и хьэтыркІэ Тхьэм ейщ. Апхуэдэуи, фІэщхъуныгъэ зимыІэ фызри лІым и хьэтыркІэ Тхьэм ейщ. Армыхъумэ фэ фи бынхэр мыкъабзэу хъунт, ауэ иджы ахэри Тхьэм ейщ» (1 Кор. 7:14). Алыхьым и лэжьакІуэ куэдым, я Іуэхур дапхуэдэу гугъуу щымытами, Иеговэ хуэмылажьэ я щхьэгъусэр къамыгъэнэну унафэ ящІащ. Ахэр гугъу ехьами, иужькІэ я щхьэгъусэр Иеговэ и Щыхьэт зэрыхъуам щыгуфІыкІыжащ. (Къеджэ 1 Коринф 7:16; 1 Пет. 3:1, 2.)

19. Сыт зэхуэсхэм унагъуэ насыпыфІэ куэд щІыхэтыр?

¹⁹ Хьисэ къыдгуригъэІуащ нэчыхьыр щІэпкъутэж хъунум сыт хуэдэ щхьэусыгъуэ иІэми. Абы нэмыщІ апостол Паул щхьэхуэу псэуным теухуауэ чэнджэщ къыдитащ. Хьиси Паули хуейт Алыхьым и лэжьакІуэхэм нэчыхьым пщІэ хуащІыну. Нобэ дуней псом ди зэхуэсхэм унагъуэ насыпыфІэ куэд хэтщ. ЦІыхухъухэм я щхьэгъусэхэр фІыуэ ялъагъу, цІыхубзхэми ялІхэм пщІэ хуащІ. Фэри фи зэхуэсым апхуэдэ унагъуэхэр хэт хъунщ. Абыхэм я щапхъэмкІэ къагъэлъагъуэ нэчыхьым пщІэ хуэпщІу узэрыпсэуфынур. Дэ догуфІэ мелуан бжыгъэ хъу зэщхьэгъусэхэм Иеговэ жиІа псалъэхэр зэрыпэжыр я гъащІэмкІэ къызэрагъэлъагъуэм щхьэкІэ: «ЛІыр и адэ-анэхэм яхэкІынурэ, и фызым гъусэ хуэхъунурэ, а тІур зыпкъ хъунущ» (Еф. 5:31, 33).