7-НЭ УРОК
Уи закъуэу къыщыпщыхъу икІи ущышынэ къэхъурэ?
Сурэтым тет щІалэ цІыкІум еплъыт. Болъагъу, абы и закъуэу къэнауэ къызэрыщыхъур икІи зэрышынэр. Уэри апхуэдэу къыщыпщыхъу къэхъурэ?~ Апхуэдэ гупсысэхэр иныкъуэхэм деж дэтхэнэ зыми дигу къокІ. Шынэ икІи закъуэныгъэ зыхэзыщІэу щыта Иеговэ и ныбжьэгъу гуэрхэм теухуауэ Библием къыдегъащІэ. Абыхэм щыщ зыт Иля́с. ИІэ, абы теухуауэ нэхъыбэ къэдгъащІэ.
Езавел Иляс иукІыну хуейт
Хьисэ Мэссихь къалъхуным зэман куэд иІэу, Иляс Изра́илым щыпсэуащ. Аха́вкІэ зэджэ Израилым и пащтыхьыр Алыхь пэж Иеговэ хуэлажьэтэкъым. Ахаврэ абы и щхьэгъусэ Езаве́лрэ тхьэ нэпцІ Ваа́лыр ягъэлъапІэт. Абы щхьэкІэ Израилым щыщ куэд Ваалым хуэлажьэу щІадзащ. Езавел Іейуэ бзаджэт икІи Иеговэ хуэлажьэ псори иукІыну хуейт, Иляси хэту. ПщІэрэ Иляс ищІар?~
Ар губгъуэ нэщІым жэри бгъуэнщІагъым зыщигъэпщкІуащ. Дауэ уеплърэ, сыт абы апхуэдэу щІищІар?~ Ар шынати аращ. Ауэ ар шынэн хуейтэкъым. Сыт щхьэкІэ? Абы ищІэт Иеговэ къызэрыдэІэпыкъуфынур. Иеговэ и къарур Иляс япэми иригъэлъэгъуат. Зэ апхуэдэу Иеговэ абы и лъэІум жэуап къритри, уафэм мафІэ къригъэхат. Иджыи Иеговэ хузэфІэкІынут абы дэІэпыкъуну!
Дауэ Иеговэ Иляс зэрыдэІэпыкъуар?
Иляс бгъуэнщІагъым щІэсу, Иеговэ абы зыкъыхуигъазэри къеупщІащ: «Сыт мыбы щыпщІэр?» Иляс жиІащ: «Уи лэжьакІуэхэм щыщу сэ зыращ къэнар. ИкІи сэри саукІынкІэ сошынэ». Иляс игугъэт Иеговэ и лэжьакІуэхэр псори яукІауэ. Ауэ Иеговэ Иляс жриІащ: «Умышынэ! Уи закъуэкъым къэнар. Иджыри сэ схуэлажьэу цІыху 7 000 къэнащ. Сэ Іуэху гуэр уэзгъэщІэну сыхуейщ!» Дауэ уеплърэ, гуфІа Иляс ар щызэхихам?~
Иляс и щапхъэм сытым дыхуригъасэрэ?~ Умышынэ икІи уи закъуэу уимыгугъэ. Иеговэрэ уэрэ фІыуэ зылъагъу ныбжьэгъу узэриІэр уигу игъэлъ. Иеговэ къаруушхуэ зэриІэр икІи сыт щыгъуи къызэрыбдэІэпыкъуныр зыщомыгъэгъупщэ. Узэримызакъуэр пщІэну фІыщ, пэжкъэ?~