Самуел Алыхьым сыт щыгъуи пэжу хуэлажьэрт

Самуе́л зэрыцІыкІунитІэ лъандэрэ Иеговэ и шэтырым щылажьэрт икІи абы и гъунэгъуу псэут. ЦІыхухэр а шэтырым кІуэт Иеговэ ягъэлъэпІэну. ПщІэрэ абы Самуел зэрыкІуа щІыкІэр? ЯпэщІыкІэ абы и анэ А́ннэ зэдгъэцІыхунщ.

Куэд щІауэ Аннэ сабий хуейт, ауэ иІэтэкъым. Абы къыхэкІыу ар Иеговэ елъэІут сабий къритыну. Аннэ псалъэ итащ къуэ къилъхумэ, Алыхьым и шэтырым ар щылэжьэну иритыну. Иеговэ абы и лъэІум жэуап къритри, Аннэ къуэ къилъхуащ. Абы Самуел фІищащ. Аннэ, псалъэ итам тету, Самуел илъэсищ-плІы хъууэ Алыхьым и шэтырым щылэжьэну иритащ.

А зэманым Алыхьым и шэтырым дин пашэ нэхъыщхьэу И́лий щылажьэрт. Абы и къуитІри дин пашэу щытт. А шэтырыр Алыхьым и унэу щытащ, абы щхьэкІэ абы щылажьэхэм Іуэху Іей ялэжь хъунутэкъым. Ауэ, абы емылъытауэ, Илий и къуэхэм Іуэхугъуэ Іей куэд ящІэт. Самуел а псор илъагъут. Илий и къуэхэм хуэдэу Самуел Іуэхугъуэ Іей ищІэу щыта?~ Хьэуэ. Ар цІыхуфІу щытащ — и адэ-анэм зэрагъэсам хуэдэу.

Илий и къуэхэм теухуауэ сыт хуэдэ унафэт ищІын хуейр? Уэ дауэ уеплърэ?~ Алыхьым и унэм афІэкІа щимыгъэлэжьэну унафэ ищІын хуейт. Ауэ Илий апхуэдэу ищІакъым. Абы щхьэкІэ Иеговэ Илийрэ абы и къуэхэмрэ хуэгубжьащ. Алыхьым мурад ищІащ абыхэм тезыр ятрилъхьэну.

Зы жэщ гуэрым, Самуел жейуэ, «Самуел!» жиІэу зыгуэр къеджэу зэхихащ: Ар Илий деж жащ, ауэ абы «Сыноджакъым» къыжриІащ. Апхуэдэу Самуел Илий деж иджыри тІэу кІуащ. Апщыгъуэ Илий Самуел жриІащ иджыри зэ а макъыр къеджэу зэхихмэ, мыпхуэдэу жиІэну: «ЖыІэ, Иеговэ, сынодаІуэ». Апхуэдэ дыдэу Самуел ищІащ. Иеговэ Самуел унафэ хуищІащ: «Илий жеІэ и унагъуэм я Іуэху Іейхэм щхьэкІэ тезыр зэрытеслъхьэнур». Дауэ уеплърэ, тыншу пІэрэт Самуел дежкІэ а унафэр игъэзэщІэну?~ ДауикІ тынштэкъым. Самуел, зэрышынэм емылъытауэ, Иеговэ зэрыжиІам хуэдэу ищІащ. ИкІи Иеговэ и псалъэхэр псори къэхъуащ! Илий и къуитІыр яукІащ, езы Илийи лІащ.

Самуел дэ щапхъэфІ тхуохъу. Самуел сыт щыгъуи Алыхьым едаІуэу щытащ, адрейхэм апхуэдэу ямыщІэми. Уэ-щэ? Самуел хуэдэу уэри жыІэдаІуэу ущытыну? Апхуэдэу пщІэмэ, Иегови уи адэ-анэри бгъэгуфІэнущ.