Kũnaa Visa Kĩlĩkonĩ Yĩla Ũũsoma Ngewa Ila syĩ Mbivilianĩ

Mbivilia yĩthĩawa na ngewa mbingĩ sya wʼo ikonetye maũndũ meekĩkie ila itũmanyĩasya maũndũ ma vata. Yĩla twakũna visa maũndũ asu ilĩkonĩ sitũ, kĩu no kĩtũtetheesye kũelewa nesanga kĩla tũũsoma na tũitetheka mũnango. Kwoona maũndũ amwe matonya kũũtetheesya kwĩka ũu.

• Soma na wasya. Kũsoma Mbivilia na wasya no kũũtetheesye ũkũne visa wa kĩla kĩendeee nesanga kĩlĩkonĩ kyaku. Na yĩla mũũsoma Mbivilia mwĩ vamwe ta mũsyĩ, no mũtume ngewa ĩsu yumĩla nesanga mwaaĩa kĩla ũmwe asome ndeto sya mũndũ wĩ kĩvathũkanyʼo.

• Kũna visa kĩla kyaendeee. Tata kũelewa ũndũ ala mawetetwe ngewanĩ ĩsu masũanĩaa na ũndũ meewʼaa. Kwa ngelekanyʼo, no wĩkũlye-ĩ: ‘Nĩkĩ mũndũ ũũ waneenie kana eeka ũndũ ũũ? Ta keka ninyie nakwatiwe nĩ ũndũ ũsu, nĩthĩwa nasũanĩaa kana ngewʼa ata?’

• Sola visa. Kũsola visa sya maũndũ ala weemanyĩsya Mbivilianĩ no kũũtetheesye kũkũna visa na kũmalilikana nesanga, o na ethĩwa ndwĩsĩ kũsola nesa.