“Mũkeewʼa Ĩũlũ wa Makaũ”

“Nĩthĩĩtwe nĩ mũtangaasi wa maũvoo kwa myaka ta 60, na kuma nambĩĩa ndangaasĩte maũvoo mbee wa 40 makonetye kaũ ĩũlũ wa nthĩ yonthe. Nĩnoonie ĩvinda yĩla silikalĩ sya Amelika na Soviet Union syaemaniwe mũno, na ĩtina ũndũ ũsu wesa kũthela vyũ. Ĩndĩ ndyaaona mwaka ũilyĩ mwaka wa 2025, na kĩtumi nũndũ kwĩthĩĩtwe na makaũ maingĩ. O na ĩngĩ, makaũ amwe katĩ wa asu maetete wasyo mũnene mũno ĩũlũ wa nthĩ kwĩ ĩvinda yĩngĩ o na yĩva.”—John Simpson, mũtangaasi wa maũvoo BBC.

Andũ nĩmathĩnĩkaa mũno nũndũ wa makaũ maingĩ ala maendeee ĩũlũ wa nthĩ. Aingĩ moo mekũlasya ethĩwa kwa wʼo maũndũ makesa kũseũva. We Yesũ amanyĩisye kyaũ?

Kĩla Yesũ Wamanyĩisye

Yesũ nĩwathanie ĩũlũ wa maũndũ ala twonaa ũmũnthĩ. Eeie aatĩĩi make ũũ: “Na mũkeewʼa ĩũlũ wa makaũ na kũwetangwa kwa makaũ.”—Mathayo 24:6.

O na kau makaũ na maũndũ ma ũngʼendu ala twonaa ũmũnthĩ nĩmatũũmĩasya mũno, twĩ na kĩtumi kĩseo kya kwĩthĩwa na wĩkwatyo. Nĩkĩ? Nũndũ Yesũ amanyĩisye kana makaũ o vamwe na maũndũ angĩ ala makwataa andũ ũmũnthĩ makeethĩwa “wonanyʼo” wa “mũminũkĩlyo wa ĩvinda yĩĩ.” (Mathayo 24:3; Lũka 21:7) Ũu nĩ kwonanyʼa kana ĩvinda yũkĩte Yesũ akamina makaũ vyũ. Akeeka ũu ata?

Kĩla Yesũ Ũkeka

Ĩvinda yũkĩte yĩte vaasa, Yesũ, Mũsumbĩ wa Ũsumbĩ wa Ngai, ‘akamina makaũ kũvika kĩtulu kya nthĩ.ʼ—Savuli 46:9.

Nĩ kana wĩmanyĩsye maũndũ maingĩ ĩũlũ wa ũndũ kũkethĩwa kũilye ĩvindanĩ yĩu, na ũndũ kũmanya ũu kũtonya kũũtethya, soma kĩlungu kĩ na kyongo “Ũndũ Kaũ na Ithokoo Ikathela .”