Kũkeethĩwa Mũuo Ĩũlũ wa Nthĩ

Kĩla mũndũ nĩwendaa kwĩkala nthĩ yĩ mũuo. Kwa ĩvinda ya myaka ngili mbingĩ asumbĩ ma nthĩ nĩmethĩĩtwe mayĩkĩa kĩthito mamine ithokoo na maiete mũuo. Na nĩmavotete kwĩka ũu kwa kavinda. Ĩndĩ ũndũ wa kũmakya, nĩ kana nĩkwĩthĩawa na ithokoo ĩngĩ. Yo ve ĩvinda nthĩ ĩkethĩwa na mũuo? Ĩĩ! Ekai twona kĩla Yesũ ũkeka na maũndũ ala wamanyĩisye.

Kĩla Yesũ ũkeka

Mbivilia nĩyonanĩtye kĩla Yesũ ũkwĩka o mĩtũkĩ nĩ kana aete mũuo ĩũlũ wa nthĩ.

• “[Yesũ] akeetwa . . . Mũnene wa Mũuo. Wingĩvo wa ũsumbĩ wake na wa mũuo ndũkethĩwa na mũminũkĩlyo.” (Isaia 9:6, 7) Nũndũ Yesũ nĩwe Mũsumbĩ wa Ũsumbĩ wa Ngai, akaĩkĩĩthya nthĩ nĩyeethĩwa na mũuo tene na tene.

• “Akavonokasya mũthĩni yĩla wĩkayaa . . . na ngya ĩla ĩte mũtethya.” (Savuli 72:12-14) Yesũ akatũmĩa ũkũmũ ũla wĩ nawʼo kũmina makaũ, ũngʼendu, mathĩna, na ũsili ũte wa katĩ.

• “Mbaĩ ndĩkokĩlĩlya mbaĩ ũvyũ, na itikemanyĩsya kaũ ĩngĩ.” (Isaia 2:4) Yĩla Yesũ ũkasumbĩka nthĩ, andũ onthe makeemanyĩsya kwĩkala na mũuo vandũ va kũkita.

Nĩ kana ũmanye ũndũ Yesũ ũkaete mũuo ĩũlũ wa nthĩ na ũndũ ũtonya kũtanĩa kwĩkala nthĩ ta ĩsu, ĩloele vitio nguvĩ yĩ na kyongo Ũsumbĩ wa Ngai Nĩ Kyaũ?

Kĩla Yesũ wamanyĩisye

O na ũmũnthĩ, momanyĩsyo ma Yesũ nĩmatetheesye andũ milioni mbingĩ kwĩkala na mũuo. Ũtavanyʼanĩ wake wa Kĩĩmanĩ nĩwamanyĩisye myolooto ĩla ĩtonya kũtetheesya andũ kwĩkala na mũuo. Ekai twone ngelekanyʼo imwe.

• “Nĩ atanu ala mamanthaa mũuo.” (Mathayo 5:9) Yesũ ekĩĩe vinya atĩĩ make mevathane na ithokoo na mayĩkala na mũuo.

• ‘Thi wambe kwĩwʼana na mwana-a-asa waku. Na ĩndĩ ũisyoka ũkaumye mũthĩnzĩo waku.’ (Mathayo 5:23, 24) Yesũ eeie ethukĩĩsya make maminae ithokoo na mĩtũkĩ ũndũ vatonyeka. Amanyĩisye nĩ kana twĩthĩwe na ngwatanĩo nzeo na Ngai no nginya twĩkalanasye na ala angĩ nesa

• “Ekai kũsilĩla nĩ kana mũikasilĩlwe.” (Mathayo 7:1) Yesũ nũtũkanĩtye tũikasilĩlae ala angĩ nũndũ kĩu no kĩete ithokoo. O na nĩwamanyĩisye atĩĩ make “maendeee kũekea” ala angĩ vandũ va kwonaa mawonzu moo kĩla ĩvinda.—Luka 6:37.

Andũ aingĩ ĩũlũ wa nthĩ nĩmaatĩĩa kĩla Yesũ wamanyĩisye. O na isionĩ ila syĩ makaũ kana mũaanĩko, nĩmeemanyĩĩtye ũndũ matonya kũmina ithokoo kwa nzĩa ĩla yaĩle ,kũekeanĩa na kwenda angĩ o na yĩla mameka maũndũ mate maseo.

Nĩ kana ũmanye ũndũ momanyĩsyo ma Yesũ matetheesye andũ makethĩwa na mũuo ,soma kĩlungu kĩ na kyongo “Kwĩthĩwa na Mũuo o na kau kwĩ na Kaũ na Ithokoo.”