Mavinda Onthe Ngai wa Ũwʼo Nĩwĩanĩasya Kĩeleelo Kyake

1. Kwosana na ĩandĩko ya Aevelania 6:18, nĩkĩ tũtonya kũĩkĩĩa Yeova?

TWĨKALĨTE nthĩnĩ wa nthĩ ĩsumbĩkĩtwe nĩ Satani. Andũ aingĩ ĩũlũ wa nthĩ nĩmakengaa na makavũnyanĩa ala angĩ. Kĩu kĩtumaa vethĩwa ve vinya kũmanya nũũ ũtonya kũmũĩkĩĩa. Kwa ngelekanyʼo, akũni aingĩ ma viasala nĩmatũmĩaa nzĩa sya ũseleke nĩ kana masinde akũni ala angĩ ma viasala. Namo ala makathĩaa syĩndũ nĩmakothaa kũkengana ĩũlũ wasyo nĩ kana andũ maithooe. O na andũ amwe nĩmesĩte kwĩthĩa kana anyanya moo ti ma kwĩkwatwʼa. Ĩndĩ o na vailye ũu, kũmanya kana mavinda onthe no tũmũĩkĩĩe Yeova nĩkũtwĩkĩaa vinya. We nĩ “Ngai ũtesa kũneena ũvũngũ.” (Soma Aevelania 6:18.) Mavinda onthe aneenaa ũwʼo. Eka ũu, maũndũ onthe ala ũwetaa na wĩkaa nĩ ma kwĩkwatwʼa.

2. Twĩneenea kyaũ ĩsomonĩ yĩĩ?

² Ĩsomonĩ yĩĩ, twĩamba kwona maũndũ amwe matonya kũtuma tũmũĩkĩĩa Yeova na ngoo yitũ yonthe. Na ĩndĩ nĩtũkwona ũndũ Ngai wa ũwʼo ũkamina nthĩ ĩno nthũku ya Ndevili na kĩla ũendeee kwĩka oyu nĩ kana eanĩsye kĩeleelo kyake. Kũneenea maũndũ asu nĩkũũtũtetheesya kwĩthĩwa na ũkũmbaũ na kwĩthĩwa tũte na wia twĩ Ngũsĩ sya Yeova.

KĨLA KĨTUMAA TŨĨKĨĨA NGAI WA ŨWʼO

3. Nĩkĩ tũtonya kũmũĩkĩĩa Yeova vyũ?

³ No tũmũĩkĩĩe Yeova nũndũ nĩwe Mũmbi. Nĩwe watwʼĩkĩthisye ĩtu na nthĩ na nĩwe Mwambĩlĩĩlya wa thayũ. (Mwa. 1:1; Sav. 36:9; Ũvu. 4:11) O na ĩngĩ, nĩwe ũtumaa syũmbe syonthe iendeea kwĩkala thayũ. Twĩasya ũu nũndũ oombie nthĩ yĩ na syĩndũ syonthe ila syendekaa nĩ kana syũmbe iendeee kwĩkala thayũ. Nĩwʼe wĩthĩawa na ũkũmũ ĩũlũ wa nthĩ yonthe. Kwoou no tũmũĩkĩĩe atũtongoesye oyu na ĩvindanĩ yũkĩte nũndũ e Mũmbi witũ, nĩwĩsĩ maũndũ onthe na ethĩawa na vinya ũte maela.

4. Twĩsĩ ata kana Yeova nũtwendete?

⁴ No tũmũĩkĩĩe Yeova nũndũ nũtwendete. Yeova oombie andũ nũndũ endaa matanĩe thayũ o take. Yeova aielesya kĩeleelo kyake aisye: “Nĩtũmbe mũndũ na mũvwʼano witũ, kwosana na kĩtutya kitũ.” (Mwa. 1:26) Nĩwatũnengie ũthasyo wa kwĩyĩkĩa motwi. O na ĩngĩ, nĩwoombie nthĩ mbanake kwondũ witũ. (Sav. 115:16) O na nĩwanengie asyai maitũ ma mbee kĩanda kya mwanya mũno kya kũtwʼĩkĩthya nthĩ valatiso. (Mwa. 1:28; 2:15) Nĩwamanengie lĩu mwingĩ na mũseo, mĩtĩ na nyamũ syĩ kĩvathũkanyʼo, na syĩndũ ingĩ mbingĩ. Eekie ũu nĩ kana methĩwe matonya kũtanĩa thayũ. Kwa wʼo, maũndũ asu onthe metũĩkĩĩthya kana “Yeova nĩwonasya ala mamũkĩaa wendo ũtathelaa kuma tene na tene kũvika tene na tene.”—Sav. 103:17, NWT.

5. (a) Yĩla Atamu na Awa maleile kũmwĩwʼa Yeova, we nĩwaekanie na kĩeleelo kyake kwondũ wa nthĩ? (b) Nĩ mawatho amwe meva Ngai wĩanĩĩtye? (Sisya ĩsandũkũ “Mavinda Onthe Ngai Aneenaa Ũwʼo.”)

⁵ No tũmũĩkĩĩe Yeova nũndũ mavinda onthe nĩwĩanĩasya kĩla wathanĩte. Yeova ndaaũmba nthĩ ‘yĩ nthei, [ĩndĩ] amyũmbie yĩthĩwe ya kũtũa andũ.’ (Isa. 45:18, 19, BK) Yĩla Atamu na Awa maleile kũmwĩwʼa Yeova, nĩmasilĩilwe kĩkwʼũ. Kwoou vaĩ vatonya kwonekana kĩeleelo kya Ngai ta kĩteanĩa. Ĩndĩ mavinda onthe nĩwĩanĩasya maũndũ onthe ala wathanĩte. (Isa. 46:10, 11) Kĩeleelo kyake kya kusũsya nthĩ aũme na aka alũngalu kĩyaalyũka. Nĩkyo kĩtumi weetĩkĩlilye Atamu na Awa methĩwe na syana. O na nĩkyo kĩtumi waumisye Mwana wake e ũmwe ta nthembo ya wovosyo nĩ kana ovosye nzyawa syonthe sya Atamu na ayiinenga wĩkwatyo mũseo wa kwĩkala tene na tene.—Yoa. 3:16.

NGAI WA ŨWʼO NĨWĨANĨASYA KĨELEELO KYAKE

6. Nĩ kyaũ Yeova wathanie ĩtina wa ũlei ũla waumĩlile Eteni?

⁶ “Ĩla nzoka ngũũ, ĩla yĩtawa Ndevili na ĩngĩ Satani,”a nĩyo yatumie Atamu na Awa maema kũmwĩwʼa Ngai. (Ũvu. 12:9; Mwa. 3:4, 5; Yoa. 8:44) Nũndũ wa kĩu Satani weekie, Yeova nĩwamũsilĩile kwĩsa kwanangwa. (Mwa. 3:15) Kĩu kĩyĩsa kũtwʼĩka nĩkyeekĩka, aingĩ maĩ mamũatĩĩe Satani na mayĩka maũndũ mathũku, o take. Ĩndĩ o na vailye ũu, amwe maĩ malũmanyʼe na Yeova me aĩkĩĩku.

7. Naaũ maatĩĩaa Ndevili, na nĩ kyaũ kĩkamakwata?

⁷ Ala mamũatĩĩaa Satani, ũla nĩwe Ndevili, nĩ alaĩka ala maleanile na Yeova na andũ ala matendaa kũmwĩwʼa Ngai. Nũndũ nĩmavĩngaa kĩeleelo kya Ngai, metusaa kĩlungu kya ũsyao wa Satani. Ĩndĩ ĩvinda yĩla Ngai ũtwʼĩte yavika, Satani na ala mamũatĩĩaa makaanangwa.—Nda. 2:44; Alo. 16:20.

8. Nĩ ĩtambya yĩva Yesũ woosie mwaka wa 1914? (O na ĩngĩ, sisya visa.)

⁸ Nĩ ũndũ wĩva ũtũĩkĩĩthasya kana kĩeleelo kya Ngai kya kũmina Satani na ala mamũkwataa mbau kĩkeanĩa? Mwaka wa 1914, Yesũ nĩwookitie na Satani, ũla nĩwe Ndevili, na ndaimoni syake na amekya vaa ĩũlũ wa nthĩ. (Ũvu. 12:7-9) O na kũtwʼĩka kaũ ũsu wokitĩiwe ĩtunĩ, ala mekalaa vaa ĩũlũ wa nthĩ nĩmathĩnaa nũndũ wa maũndũ mathũku ala maumĩlile ĩtina wa kaũ ũsu. Mbivilia yaĩtye: “Kyeva nĩ kwa nthĩ na ũkanga, nũndũ Ndevili nĩwatheea kũla mũĩ, e na ũthatu mwingĩ, nũndũ nĩwĩsĩ e na kavinda o kanini.” (Ũvu. 12:12) Kuma mwaka wa 1914, kĩeleelo kĩnene kya Satani kĩthĩĩtwe ne kũtuma andũ aingĩ ũndũ vatonyeka mamũatĩĩa na kĩu nĩkĩtumĩte kwĩthĩwa na mathĩna maingĩ ĩũlũ wa nthĩ. Ĩndĩ o mĩtũkĩ, Yesũ ‘nũkũminũkĩlya ũsindi wake.’ Akamwova Satani myaka 1,000 na ayananga andũ onthe ala mamũkwataa mbau. (Ũvu. 6:2) Mũthya, Yesũ akathesya ĩsyĩtwa ya Yeova tene na tene. (Sav. 45:4-6) Ĩvindanĩ yĩu, kĩla mũndũ nũkamanya kana Yeova nĩwe Ngai wa ũwʼo!—Esek. 38:23.

World War I: U.S. National Archives photo; bomb: USAF photo; pandemic: blvdone/stock.adobe.com; riot: inhauscreative/E+ via Getty Images

NGAI WA ŨWʼO NĨWŨMBANASYA ONTHE ALA MENDETE ŨWʼO

9. Naaũ Yeova ũendeee kũmbanyʼa ũmũnthĩ?

⁹ Yeova ethĩĩtwe ayũmbanyʼa “syĩndũ syonthe nthĩnĩ wa Klĩsto, syĩndũ ila syĩ ĩtunĩ na syĩndũ ila syĩ ĩũlũ wa nthĩ.” (Avs. 1:10) “Syĩndũ ila syĩ ĩtunĩ” nĩ Aklĩsto etĩkĩwʼa mauta ala Yeova ũnyuvĩte nĩ kana mesumbĩka vamwe na Klĩsto ĩtunĩ. Nasyo “syĩndũ ila syĩ ĩũlũ wa nthĩ” nĩ ala makekala tene na tene nthĩnĩ wa nthĩ nzaũ. Athaithi asu onthe ma Yeova nĩmethĩawa na kĩthito maivuanyʼa ũvũngũ wa Satani na nĩmatetheeasya ala me na ngoo nzeo mamanye ũwʼo.

10. Yeova aendeee kũtetheesya andũ ata memanyĩsye ũwʼo? (Ũvuanyʼo 14:6, 7)

¹⁰ Yeova nũendeee kũmbanyʼa ala mendete ũwʼo, na nũnengete andũ make kĩanda kya kumya ũkũsĩ ĩũlũ wa nthĩ yonthe. Na wĩa ũsu ũtethetwʼe kwĩ ĩvinda yĩngĩ o na yĩva. (Soma Ũvuanyʼo 14:6, 7.) O na kũtwʼĩka Yeova atũmĩaa andũ kũtavya angĩ ũvoo mũseo, alaĩka nĩmethĩawa na kĩanda kya vata kya kũmbanyʼa ala me na ngoo nzeo kĩkundinĩ kya Kĩklĩsto. Wĩa ũsu wa kumya ũkũsĩ nũvuanasya ũvũngũ ũla Ndevili wĩthĩĩtwe ainyaĩĩkya kwa myaka mingĩ ĩũlũ wa Yeova atũmĩĩte Mbaviloni Ĩla Nene, ĩla nĩ ndĩni syonthe sya ũvũngũ. (Ũvu. 18:2, 4) O mĩtũkĩ, ndĩni syonthe sya ũvũngũ nikwanangwa vyũ, na onthe ala mendete Ngai wa ũwʼo makamũnenga nguma ĩla ĩmwaĩle.—Ũvu. 17:16.

11. Tũtonya kũmanya ata athaithi ma wʼo ma Yeova?

¹¹ Ala mendete ũwʼo methĩawa maumĩte mbaĩnĩ syĩ kĩvathũkanyʼo, syĩthĩonĩ syĩ kĩvathũkanyʼo, na methĩawa na ũkwati wĩ kĩvathũkanyʼo. (Ũvu. 7:9, 10) Yĩla meewie “ũvoo mũseo” ya mbee, nĩmamanyie kana ũsu nĩwʼo ũwʼo na matwʼĩka andũ ma Yeova. (Mlko. 13:10) O ũndũ ĩvinda yĩvĩtĩte, nĩ ũndũ wĩ ũtheinĩ naaũ mamũthaithaa Ngai kwa nzĩa ĩla wĩtĩkĩlaa na naaũ matekaa ũu. Mwathani Malaki athanie atĩĩ: “Nĩvo ĩndĩ mũkasyoka na kũvathũkanʼya katĩ wa ala alũngalu na ala athũku, ũla ũthũkũmaa Ngai na ũla ũtamũthũkũmaa.” (Mki. 3:18, BK) Kwoou athũkũmi ma Yeova nĩmonanasya kana mamũthũkũmaa Ngai wa ũwʼo kwĩsĩla mwĩkalĩle woo na wĩa wa kũtavanyʼa.

12. Wĩa wa kũtavanyʼa ũtetheeasya ata kwĩanĩsya kĩeleelo kya Yeova?

¹² Yĩla tũũtavanyʼa ‘ũvoo mũseo wa Ũsumbĩ,’ twĩthĩawa tũiatĩĩa mwĩao wa Yesũ, na ĩvindanĩ o yĩu, twĩthĩawa tũianĩsya wathani. (Mt. 24:14; 28:18-20) Nũndũ wa wĩa ũsu, andũ ĩũlũ wa nthĩ nĩmaendeee kũtwʼĩka amanyĩwʼa ma Klĩsto me na wĩkwatyo wa kũmũthaitha Ngai wa ũwʼo tene na tene. Nĩ kĩanda kya mwanya ta kĩ kwona Yeova atũtũmĩaa kwĩanĩsya kĩeleelo kyake!

NO TWETEELE ĨVINDA YŨKĨTE TŨTE NA NZIKA

13. Naaũ Satani ũthĩnasya mũno mũno, na nĩkĩ?

¹³ Satani, ũla nĩwe Ndevili, nĩ mũthatu mũno nũndũ nĩwĩsĩ kana “e na kavinda o kanini” nthĩ ĩno ĩtanamba kwanangwa. (Ũvu. 12:12, 13) Athĩnasya mũno mũno etĩkĩwʼa mauta “ala makwataa mĩao ya Ngai, na me na wĩa wa kumya ũkũsĩ ĩũlũ wa Yesũ.” (Ũvu. 12:17; 14:12) Na mũndũ o na wĩva ũla ũmakwataa mbau na ũkwataa mbau wĩa wa kũtavanyʼa o nake nũmũthĩnasya.

14. Yĩla Satani ũkavithũkĩa andũ ma Yeova, nĩ kyaũ kĩkekĩka? (O na ĩngĩ, sisya visa.)

¹⁴ Ĩtina wa Mbaviloni Ĩla Nene kwanangwa, Satani na onthe ala mamũkwataa mbau makavithũkĩa andũ ma Yeova mate na tei. Kĩu nĩkyo kĩkatuma kaũ wa Alimaketoni wambĩĩa. (Ũvu. 16:13, 14, 16) Yesũ na ita sya ĩtunĩ maketaana athaithi ma Yeova na mayananga vyũ kĩndũ o na kĩva kĩla kĩkethĩwa kĩtiele kya nthĩ ĩno ya Ndevili. (Ũvu. 19:19-21) Andũ ala maneenaa ũvũngũ, o na andũ athũku maikethĩwa vo ĩngĩ. (Ũvu. 21:8) Ĩvindanĩ yĩu, kĩla mũndũ akamanya kana Yeova ekaa kĩla kyaĩle na aneenaa ũwʼo mavinda onthe.

15. Nĩkĩ tũtonya kweteela ĩvinda yũkĩte tũte na nzika? (Isaia 65:16, 17) (O na ĩngĩ, sisya visa.)

¹⁵ Ũmũnthĩ, nthĩ nĩyaanĩkĩte kwĩ ĩvinda yĩngĩ o yĩva. Ĩndĩ Yeova nũtetheeasya athũkũmi make maendeee kwĩthĩwa na ngwatanĩo. Wĩa wa kũmbanyʼa ala mendete ũwʼo nũendeee. Na vai kĩndũ kĩtonya kũmũsiĩĩa Yeova aiathima andũ make o vamwe na wĩa ũla maendeee kũtethya. (Soma Isaia 65:16, 17.) No tweteele ĩvinda yũkĩte tũte na nzika. Ndeto sya mũtũmwa Vaũlo ila syĩ nthĩnĩ wa Alomi 8:38, 39 itũĩkĩĩthĩtye “kana o na kĩkwʼũ, kana thayũ, kana alaĩka, kana silikalĩ, kana maũndũ ala me kwʼo yu, kana ala makoka, kana mokũmũ, kana ũtũlu, kana ũliku, kana syĩndũ ila syoombiwe, vaiĩ kĩndũ kĩtonya kũtũvathana na wendo wa Ngai ũla wĩ nthĩnĩ wa Klĩsto Yesũ, Mwĩaĩi waitũ.”

16. Nĩkĩ ũmũĩkĩĩe Yeova na ngoo yaku yonthe?

¹⁶ Tũi na kĩtumi o na kĩmwe kya kũema kũmũĩkĩĩa Yeova, Ngai wa ũwʼo. Nĩwe Mũmbi witũ. Na nũtwendete mũno vyũ. Ĩkomano ĩnene nĩyĩendeee kwongeleka na mĩtũkĩ o ũndũ andũ kuma mbaĩnĩ syonthe maendeee na kũka kũmũthaitha Yeova. (Isa. 60:22; Nzek. 8:23) Nĩtwĩsĩ kana mavinda onthe nĩwĩanĩasya mawatho make na kana o mĩtũkĩ, nũkũmina Satani na ũvũngũ wʼonthe. Tũvoyaa o ta Ndaviti, ũla wavoyie atĩĩ: “Nataĩwe Yeova Ngai, . . ũla wĩkaa maũndũ ma ũsengʼya weka: Na syĩtwa yake ĩtheu yĩtaĩwe tene na tene; na nthĩ yonthe nĩyusũwe nĩ ũtheu mũtisu wake.”—Sav. 72:18, 19, BK.