Nĩkĩ Andũ Aingĩ Matakuaa Ala Angĩ Ũndũ Vaĩle?—Mbivilia Ĩmanyĩasya Ata?

No andũ anini vyũ makuaa ala angĩ nesa. Nĩtwĩwʼĩte awau amwe angʼendu maikũthũkĩa matakĩtalĩ; andũ mate na ndaĩa maingʼendea ala meũthũkũma mĩkaawanĩ; andũ ngalĩnĩ kana ndekenĩ maineenyʼa naĩ athũkũmi ma kũu; syana syĩ kĩvũthya iyĩumanga, kũtĩsya, kana kũvithũkĩa alimũ; na atongoi amwe ma siasa makelikya maũndũnĩ me na nthoni na angĩ mayĩkathĩĩa ũndũ mwĩkalĩle woo ũtaumwʼa kaũvavathĩ.

No twĩkwatye Mbivilia ĩtũelesye ũndũ mũndũ wĩ na mwĩkalĩle waĩle wĩthĩawa ailye. O na nĩyĩeleetye nĩkĩ ũmũnthĩ andũ aingĩ makuaa ala angĩ naĩ.

Nĩkĩ andũ aingĩ matakuaa ala angĩ ũndũ vaĩle?

Nĩ ũndũ wĩ ũtheinĩ kana andũ aingĩ ĩũlũ wa nthĩ maikuaa ala angĩ nesa, kana kwa ndeto ingĩ, mayĩthĩawa na mwĩkalĩle ũla waĩle, mũseo, na wĩtĩkĩlĩka.

• Livoti ĩmwe ya kũĩkĩĩka yonanĩtye kana andũ ma Amelika maĩkĩĩaa kana ũmũnthĩ andũ nthĩnĩ wa nthĩ yoo me na mwĩkalĩle mũthũku kwĩ ĩvinda yĩngĩ o na yĩva kwa ĩvinda ya myaka 22 mĩvĩtu.

• Kwosana na ũkunĩkĩli ũngĩ weekiwe nthĩnĩ wa nthĩ 28, andũ 32,000 nĩmaumisye mawoni na 65 ĩũlũ wa ĩana maisye kana ũmũnthĩ, kwĩ ĩvinda yĩngĩ o na yĩva, nĩ andũ anini vyũ makuaa ala angĩ nesa.

Mbivilia nĩyathanie ĩũlũ wa mwĩkalĩle ũtaĩle ũla wĩkwʼo ũmũnthĩ.

• “Kũkeethĩwa na mavinda momũ mĩthenyanĩ ya mũminũkĩlyo. Andũ makeethĩwa meyendete, me na ĩtomo, mayĩkathĩĩa, na mayĩyona me ma vata; makeethĩwa me aumani, matewʼaa asyai moo, mate mũvea, . . . mate tei, [na] angʼendu.”—2 Timotheo 3:1-3, Good News Translation.

Nĩ kana ũmanye maũndũ maingangĩ ĩũlũ wa ũndũ wathani ũsu ũendeee kwĩanĩa, soma kĩlungu “Je, Biblia Ilitabiri Mitazamo na Matendo ya Watu Leo?”

Mbivilia no ĩtũtetheesye tũkethĩwa na mwĩkalĩle mũseo

O na kau andũ nthĩ ĩno maendeee kwĩthĩwa mate na mwĩkalĩle ũla waĩle, andũ milioni mbingĩ nĩmamanyĩte kana Mbivilia nĩtonya kũmatongoesya nesa vyũ makethĩwa na mwĩkalĩle mũseo. Motao mayo ĩũlũ wa mwĩkalĩle “nĩmalũlũmĩlwʼe tene na tene.” (Savuli 111:8) Kwasũanĩa ngelekanyʼo imwe:

• Ũndũ Mbivilia yaasya: “Maũndũ onthe ala mũkwenda andũ mamwĩke, o nenyu no nginya mũmeke o ta ũu.”—Mathayo 7:12.

  Kĩla Yonanasya: Twaĩlĩte kũkua ala angĩ nesa na twĩ na ndaĩa, o tondũ tũtonya kwenda tũkuwe.

• Ũndũ Mbivilia yaasya: “Nũndũ yu nĩmũvetete ũkengani, kĩla ũmwe nĩ aneene ũla wʼo na mũtũi wake.”—Aeveso 4:25.

  Kĩla Yonanasya: Twaĩlĩte kwĩthĩwa twĩ aĩkĩĩku maũndũnĩ onthe ala tũkwĩka kana kũneena.

Nĩ kana ũkwate ũvoo mwingangĩ, soma:

• Ĩkaseti ya Mũsyaĩĩsya yĩ na kyongo, “Kĩla Kĩtonya Kũũtongoesya Ũmanye Ũla Ũseo na Ũla Ũthũku.”

• Kĩlungu kĩ na kyongo, “Kũmĩĩasya Ala Angĩ—Ũndũ Mbivilia Ĩtonya Kũtetheesya.”