Ĩthĩwa na Ũkũmbaũ na Ũilũmanyʼa na Angĩ, o ta Mbenaia

Mbenaia aĩ ngũmbaũ ya kaũ na athũkũmaa ungu wa Mũsumbĩ Ndaviti na ĩtina, Mũsumbĩ Solomoni. O na kaũ we aĩ mwana wa mũthembi na athembi na Alivai mayakothaa kũkita kana kũtũmĩa mĩio ya kaũ, we nĩwokitie makaũnĩ me kĩvathũkanyʼo ma Yeova. Makaũnĩ asu, nĩwoonanisye ũkũmbaũ mwingĩ. Kwa ngelekanyʼo, nĩwooaie mũnyambũ waĩ ĩimanĩ yaĩ na kĩwʼũ na asinda ĩmũndũ ĩnene yeevotoete na mĩio ya kaũ. Ndaviti amũĩkĩĩe Mbenaia mũno nginya amũnyuva aũngamĩe asungi make.—2 Sam. 23:​20-23.

Mbenaia nĩwaendeeie kũlũmanyʼa na Ndaviti ĩvinda yĩla Avisalomu wambĩĩisye ũlei, o na ĩtina nĩwalũmanilye nake yĩla Atoniya waleanile nake. (2 Sam. 8:18; 15:18; 1 Asu. 1:8) O na yĩla Ndaviti waĩ mũkũũ, Mbenaia nĩwaendeeie kũlũmanyʼa nake kwa kũtetheesya Solomoni atwʼĩke mũsumbĩ. (1 Asu. 1:​32-40) Kwa wʼo, Mbenaia nĩwalũmanilye na Yeova na etĩkĩwʼa mauta make o na yĩla andũ angĩ maekie kwĩka ũu.

O naitũ nĩtwaĩle kwĩthĩwa na ũkũmbaũ wa kũkitana na mũmaitha witũ mũnene, Satani, na ala mamũkwataa mbau. Na nĩtwaĩle kũtwʼa vyũ kũendeea kũatĩĩa myolooto ya Yeova. (Avs. 6:11; 1 Vet. 5:​8, 9) Na ethĩwa amwe nĩmatwʼa kũmũtia, tũkalũmanasya nake twĩ na mũĩkĩĩo kana nũkũtũtuva.—2 Sam. 22:26.