Mũtavanyʼa
1 Ndeto sya mũmbanyʼa,* mwana wa Ndaviti, mũsumbĩ wa Yelusalemu.
2 “Nĩ mana* vyũ!” easya ũu mũmbanyʼa,
“Nĩ mana vyũ! Kĩla kĩndũ nĩ mana!”
3 Mũndũ atethekaa ata nĩ wĩa wake wʼonthe mũmũ
Ũla wĩtĩaa yuutĩa ungu wa sua?
6 Kĩseve kĩuutanaa kĩendete ngalĩko ya ĩtheo na kĩithyũlũlũka nginya ngalĩko ya ĩũlũ;
Kĩtindaa kĩthyũlũlũkĩte kĩte kũeka; kĩseve kĩendeeaa na ithyũlũlũ syakyo.
7 Tũlũsĩ twʼonthe* tũendaa nginya ũkanganĩ, ĩndĩ o na ũu wĩ o vo, ũkanga ũyusũaa.
Vala tũlũsĩ tũu tumaa, no vo tũsyokaa nĩ kana tũtheee ĩngĩ.
8 Maũndũ onthe nĩmanoasya mũno;
O na vai mũndũ ũtonya kũelesya ĩũlũ wa ũndũ ũsu.
Itho yĩyĩanĩawa nĩ kwona;
O na kũtũ kũyusũawa nĩ kwĩwʼa.
9 Ũndũ ũla wĩthĩĩtwe kwʼo nowʼo ũkethĩwa kwʼo,
Na ũndũ ũla wĩkĩtwe ũkeekwa ĩngĩ;
Vai ũndũ mweũ ungu wa sua.
10 Yo ve ũndũ o na ũmwe mũndũ ũtonya kwasya, “Sisya, ũndũ ũũ nĩ mweũ”?
Waĩ o kwʼo kuma ĩvindanĩ ya tene mũno;
Waĩ o kwʼo ĩvinda yitũ yĩtanamba kũvika.
11 Vai mũndũ ũlilikanaa andũ ala maĩ kwʼo ĩvindanĩ ya tene;
O na vai mũndũ ũkalilikana ala makoka;
O na maikalilikanwa nĩ ala makoka ĩtina wa vau.
12 Nyie, mũmbanyʼa, nĩthĩĩtwe nĩ mũsumbĩ wa Isilaeli nĩ Yelusalemu. 13 Natwie ngoonĩ yakwa nĩmanyĩsye na ndithiana na ũĩ kĩla ũndũ wĩkĩtwe ungu wa matu, wĩa wa thĩna ũla Ngai ũnengete ana ma andũ ũla ũtumaa methĩwa makwatene.
14 Nĩnoonie mawĩa onthe ala matethawʼa ungu wa sua,
Na sisya! kĩla ũndũ waĩ mana, waĩ kũsembanyʼa na kĩseve.
15 Kĩla kĩthyoeku kĩitonya kũlũngalwʼa,
Na kĩla kĩte vo kĩitonya kũtalwa.
16 Nĩvo ĩndĩ naisye ũũ ngoonĩ yakwa: “Sisya! Nĩngwatĩte ũĩ mwingĩ, kwĩ mũndũ o na wĩva ũla waĩ Yelusalemu mbee wakwa, na ngoo yakwa nĩyakwatie ũĩ na ũmanyi mwingĩ mũno.” 17 Nĩneekĩie kĩthito vyũ nĩmanye ũĩ na ndimanya ndũũka* na ndimanya ũtumanu, na ũndũ ũũ o nawʼo nĩ kũsembanyʼa na kĩseve.
18 Nĩkwĩthĩwa ũĩ mwingĩ ũtumaa mũndũ atũlĩka ngoo mũno,
Ũkethĩa mũndũ o na wĩva ũla wongelaa ũmanyi ongelaa woo.