Yovu
5 “Mwa, ĩtana! Yo ve ũmwe ũkũũsũngĩa?
Ũkeethyũũĩa ũũ katĩ wa ala atheu?
2 Nĩkwĩthĩwa kwoveea ũthatu ngoonĩ kũkooaa ũla mũtumanu,
Na kĩwĩu kyai kĩkooaa ũla ũtasũanĩaa maũndũ kwa ũliku.
3 Nĩnonete ũla mũtumanu aimesya mĩi,
Ĩndĩ atataĩĩe wĩkalo wake ũyĩumanĩwa.
4 Ana make methĩawa vaasa vyũ na ũsũvĩo,
Na nĩmatumbatumbangĩawa mũvĩanĩ wa ndũa, mate na o na ũmwe wa kũmatangĩĩa.
5 Ũla wĩ na nzaa aĩsaa kĩla waketha,
Akyumasya o na mĩwʼanĩ,
Na malĩ yoo nĩkwatawʼa.
6 Nĩkwĩthĩwa maũndũ ma kũũmĩsya maimeaa kĩtoonĩ,
Na mathĩna mayumĩlaa mũthanganĩ.
7 Nĩkwĩthĩwa mũndũ asyaĩwe thĩna,
O ũndũ vate nzika ngala sya mwaki italĩkaa syambatĩte.
8 Ĩndĩ nyie nĩmwĩsũva Ngai,
Na nĩtwaĩa Ngai ĩkoani yakwa,
9 Nĩyĩtwaĩa Ũla wĩkaa maũndũ manene na matamanthĩka,
Maũndũ ma kũsengyʼa matatalĩka.
10 Nĩwuasya mbua ĩũlũ wa nthĩ
Na aiete kĩwʼũ mĩũndanĩ.
11 Nĩwũkĩlasya mũthĩni ĩũlũ vyũ,
Na nĩwũkĩlasya ũla ũtũlĩkĩte ngoo akamũtangĩĩa.
12 Nũvũavũanasya mĩvango ya nzeleke,
Nĩ kana wĩa wa moko masyo ndũkaĩle.
13 Nũkwatĩasya ala oĩ maũĩnĩ moo,
Nĩ kana mĩvango ya ala oĩ ĩvalaanĩke.
14 Makomanaa na kĩvindu kwĩ mũthenya,
Na mavavataa mũthenya katĩ ta kwĩ ũtukũ.
15 Nũtangĩĩaa kuma ũvyũnĩ wa makanywʼa moo,
Nũtangĩĩaa ngya kuma kwʼokonĩ kwa ala me vinya,
16 Nĩ kana vethĩwe wĩkwatyo kwa mũthĩni,
Ĩndĩ kanywʼa wa ũla ũte mũlũngalu nũtumawʼa.
17 Sisya! Nĩ mũtanu mũndũ ũla Ngai ũkanasya;
Kwoou ndũkalee kũlũngwa nĩ Mwene Vinya Wʼonthe!
18 Nĩkwĩthĩwa nĩwĩwʼĩthasya woo, ĩndĩ nĩwovaa kĩtau;
Nũtũlaa, ĩndĩ nũvoasya na moko make mwene.
19 Akaũtangĩĩa kuma mĩisyonĩ thanthatũ,
O na wa mũonza ndũkakũũmĩsya.
20 Ĩvindanĩ ya yũa akakwovosya kuma kĩkwʼũnĩ,
Na kuma vinyanĩ wa ũvyũ ĩvindanĩ ya kaũ.
21 Ũkasũvĩanwa na ũĩmĩ ũla ũkũnaa ta mũtalisa,
Na ndũkakĩa wanangĩko yĩla wĩũka.
22 Ũkathekeea wanangĩko na nzaa,
Na ndũkakĩa nyamũ sya kĩthekanĩ sya nthĩ.
23 Nĩkwĩthĩwa mavia ma mũũndanĩ maikakũũmĩsya,*
Na nyamũ sya kĩthekanĩ ikekalanasya naku na mũuo.
24 Ũkamanya kana ĩeema yaku nĩ ĩsũvĩĩku,*
Na vai kĩndũ kĩkethĩwa kĩte vo yĩla wĩsisya nesa isesi syaku.
25 Ũkatanĩa kwĩthĩwa na syana mbingĩ,
Na nzyawa syaku ikeethĩwa mbingĩ vyũ ta mĩmea ya nthĩ.
26 Ũkeethĩwa wĩ o na vinya ũithi mbũanĩ,
Ta syove sya lĩu wa mbaa ngetha syũmbanĩtwʼe ĩvindanĩ yasyo.
27 Sisya! Nĩtũkunĩkĩlĩte ũndũ ũsu, na ũu nĩwʼo vailye.
Ĩthukĩĩsye na ũiwĩtĩkĩla.”