Yovu
19 Yovu asũngĩie asya atĩĩ:
2 “Mwĩendeea kũthĩnyʼa thayũ wakwa* nginya ĩndĩĩ,
Mũindumbatumba na ndeto?
3 Nĩmũnganĩtye* mavinda aa ĩkũmi;
Mũyĩwʼaa nthoni mũinthĩnyʼa.
4 Na ethĩwa kwa wʼo nĩnĩvĩtĩtye,
Ĩvĩtyo yakwa yĩkala o nakwa.
5 Mwaendeea kwĩnenevya ĩũlũ wakwa,
Mũyasya kana kĩvũthya kĩla nonetwʼe nĩkĩmbaĩle,
6 Manyai ĩndĩ, kana nĩ Ngai ũmbelelũkĩtye,
Na nũngwatĩtye netinĩ yake ya kũsyĩma.
7 Sisyai! Ndindĩaa kũĩa na wasya mũnene ndyasya, ‘Nĩ ũngʼendu!’ ĩndĩ ndisũngĩawa;
Ndindĩaa kũĩa nĩtethwʼe, ĩndĩ vai ũsili wa katĩ.
8 Nũvingĩte kasĩla kakwa na ũkũta wa mavia, na nditonya kũvĩta;
Nũvwʼĩkĩte nzĩa syakwa na kĩvindu.
9 Nũmbenete ũkumyo wakwa
Na akambumya ngovia ya ũsumbĩ.
10 Ambomboangaa kĩla ngalĩko nginya ngathela;
Akũaa wĩkwatyo wakwa ta mũtĩ.
11 Ũthatu wake nũmbakanĩaa,
Na ambonaa ta mũmaitha wake.
12 Ita syake syumbanaa na iindwʼĩkanĩsya,
Na syambaa kambi ithyũlũlũkĩte ĩeema yakwa.
13 Nũlũngĩtye ana-a-ĩthe makwa mwene makathi vaasa vyũ nakwa,
Na ala mambĩsĩ nĩmethyũũĩte makandia.
14 Anyanyawa ala twĩ ndũũ mũno* nĩmandiĩte,
Na ala neesĩ nesa nĩmolĩtwe ninyie.
15 Ala nthoketye nyũmbanĩ yakwa na eĩtu makwa ngombo mambonaa ta nĩ mũeni;
Methonĩ moo, nĩ mũndũ wa nthĩ ĩngĩ.
16 Nĩnĩtũmanaa mũthũkũmi wakwa, ĩndĩ nũleaa kũka;
Nĩmwĩsũvaa na kanywʼa wakwa ambĩwʼĩe ĩnee.
17 Mĩthũmũ yakwa nĩmenawa mũno nĩ kĩveti kyakwa,
Na nĩthĩĩtwe mũuke mũthũku kwa ana-a-ĩthe makwa mwene.*
18 O na syana nini nimbũthasya;
Naũngama, syambĩĩaa kũnthekeea.
19 Anyanya makwa onthe ala twĩ ndũũ mũno nĩmamenete,
Na ala nendete nĩmambĩndũkĩĩte.
20 Mavĩndĩ makwa nĩmakwatanaa na kĩkonde kyakwa na nyama yakwa,
Na nĩvonokaa na kĩkonde kya maeo makwa.
21 Mbĩwʼĩei tei, anyanyawa, mbĩwʼĩei tei,
Nũndũ kwʼoko kwa Ngai nĩkũngiitĩte.
22 Nĩkĩ mũendeeaa kũnthĩnyʼa o ta Ngai,
Mũimbũkita mũte kũeka?*
23 Ta keka ndeto syakwa niandĩkwa vandũ,
Ta keka niandĩkwa ĩvukunĩ!
25 Nũndũ nĩnĩsĩ nesa kana mwovosya wakwa e thayũ;
Nũkwĩsa kũka na ayĩũngama ĩũlũ wa nthĩ.*
26 Ĩtina wa kĩkonde kyakwa kwĩthĩwa kyanangĩtwe ũu,
Nĩ o mwĩĩnĩ wakwa, ngamwona Ngai,
27 Ũla ngamwona ne inyie mwene,
Ũla metho makwa mwene makamwona, na ti ma mũndũ ũngĩ.
Ĩndĩ ngoonĩ yakwa nĩĩwʼa nĩemeewe!*
28 Nĩkwĩthĩwa mwĩasya, ‘Twĩmũthĩnyʼa kwa nzĩa yĩva?’
Nũndũ ninyie kĩtina kya thĩna ũsu.
29 Inywʼĩ ene kĩai ũvyũ,
Nĩkwĩthĩwa ũvyũ ũsilĩlaa eki ma naĩ;
Nĩmwaĩlĩte kũmanya kana ve mũsili.”