Wektu Nduwé Bojo sing Ora Setya

”Rasané aku péngin mati waé wektu bojoku ngomong nèk dhèwèké selingkuh karo wong wédok sing luwih enom. Aku ora trima, apamanèh nèk kèlingan kabèh pengorbananku kanggo dhèwèké.”—Maria, Spanyol.

”Rasané uripku kaya ora ana artiné manèh wektu bojoku ninggalké aku. Kadhang, aku isa nglalèkké masalahku. Tapi, ngerti-ngerti aku kèlingan lan dadi strès manèh.”—Bill, Spanyol.

WONG sing bojoné selingkuh biasané lara ati banget. Dhèwèké mungkin isa ngapura lan rukun manèh karo bojoné.a Tapi, embuh cerai apa ora, dhèwèké bakal tetep lara ati. Piyé carané ngatasi perasaan kuwi?

AYAT-AYAT ALKITAB SING ISA DIRENUNGKÉ

Wong sing bojoné selingkuh isa terhibur nèk maca Alkitab. Wektu maca Alkitab, dhèwèké bakal ngerti nèk Gusti Allah perduli karo dhèwèké.—Maléakhi 2:13-16.

”Wektu aku ngrasa kuwatir banget, Njenengan nggawé aku tenang lan bahagia.”—Mazmur 94:19.

Bill ngomong, ”Wektu maca ayat kuwi, aku ngrasa nèk Yéhuwah kaya bapak sing nguwatké aku.”

”Njenengan setya karo wong sing setya.”—Mazmur 18:25.

Carmen, sing bojoné tau selingkuh selama pirang-pirang sasi, ngomong, ”Bojoku ora setya karo aku. Tapi, aku ngerti nèk Yéhuwah tetep setya karo aku. Dhèwèké ora bakal nggawé aku kecéwa.”

”Aja nguwatirké apa waé. Tapi, ing kabèh keadaan, kowé kudu terus ndonga njaluk tuntunané Gusti Allah . . . Nèk kowé nindakké kuwi, Gusti Allah bakal mènèhi kowé rasa ayem sing ora isa dipahami manungsa. Terus, liwat Kristus Yésus, Gusti Allah bakal njaga ati[mu].”—Filipi 4:6, 7.

Sasha ngomong, ”Aku bola-bali maca ayat iki. Merga terus ndonga, aku isa ngrasa ayem.”

Kabèh wong sing disebutké mau awalé ngrasa ora nduwé semangat urip manèh. Tapi, wong-wong kuwi percaya karo Yéhuwah lan ngrasa dikuwatké wektu maca Alkitab. Bill ngomong, ”Merga nduwé iman, aku ngrasa isih nduwé harapan meskipun mauné aku ngrasa nèk uripku wis ora ana artiné. Aku ngrasa nèk Gusti Allah nguwatké aku meskipun aku ’mlaku ing lembah sing peteng banget’.”—Mazmur 23:4.

a Deloken Sedarlah! 22 April 1999 sing judhulé ”Bila Teman Hidup Berselingkuh” sing ngrembug soal saran-saran sing isa dipikirké sakdurungé nggawé keputusan arep cerai utawa ora.

Saran-Saran sing Isa Mbantu

Maca lan ngrenungké Alkitab.

Bill ngomong, ”Aku maca buku Ayub lan Mazmur. Bar kuwi, aku nggarisi kabèh ayat sing cocog karo keadaanku. Aku ngrasa nèk wong-wong sing critané ditulis ing Alkitab kuwi ya tau ngrasakké sing padha karo aku.”

Ngrungokké musik.

Carmen ngomong, ”Pas ora isa turu, aku ngrungokké musik. Kuwi nggawé aku tenang.” Daniel ngomong, ”Aku sinau main gitar. Aku isa ngrasa ayem wektu ngrungokké musik sing tak mainké.”

Nyritakké soal perasaané njenengan.

Daniel ngomong, ”Nèk ana apa-apa, biasané aku ora crita karo kabèh wong. Tapi, aku ngupaya nyritakké perasaanku karo kanca-kancaku liwat surat utawa omong-omongan langsung. Kuwi nggawé aku ngrasa lega.” Sasha ngomong, ”Keluargaku bener-bener mbantu aku. Ibuku mesthi gelem ngrungokké critaku. Bapakku ya sayang lan terus ndhukung aku.”

Terus ndonga.

Carmen ngomong, ”Aku terus ndonga. Aku ngrasa nèk Gusti Allah ora ninggalké aku. Dhèwèké ngrungokké lan mbantu aku. Wektu ngadhepi masalah kaya ngéné, aku ngupaya tambah akrab karo Gusti Allah.”