Ahwo Buobu A Mu Ebaibol na Họ Ewuhrẹ Fiki Uwuhrẹ Ebaibol Ọvo

Marta yọ omọvo Isẹri Jihova jọ nọ ọ be rria orẹwho Guatemala, yọ o bi wuhrẹ ẹvẹrẹ Kekchi re ọ sae ta usi uwoma kẹ ahwo nọ a be ta ẹvẹrẹ yena. Ẹdẹ jọ, ọ tẹ ruẹ ọzae jọ nọ o bi no ẹsipito gwọlọ kpo. Marta o muẹrohọ nọ ọzae na o tho ahwo nọ a no iwhre Kekchi jọ ze, enọ e rrọ eria igbehru nọ Isẹri Jihova a rẹ kake ta usi uwoma te he. Ọ tẹ nyabru ọzae na, ọ tẹ rọ umutho ẹvẹrẹ Kekchi nọ ọ riẹ rọ ta ẹme kẹe.

Marta ọ tẹ ta kẹ ọzae na nọ ọ gwọlọ nọ o re wuhrẹ iẹe Ebaibol na. Eva e were ọzae na fikiere ọ tẹ rọwo, rekọ ọ tẹ ta nọ o wo ugho nọ ọ te rọ hwosa kẹe he. Marta ọ tẹ ta kẹ ọzae na nọ Isẹri Jihova a re wuhrẹ ahwo Ebaibol na ọvọvẹ. Ọ tẹ jẹ ta kẹe nọ ọ sae rọ ifonu sei re a jọ ifonu wuhrẹ Ebaibol na, yọ ahwo uviuwou riẹ a sai kuomagbei. Ọzae na ọ tẹ rọwo. Fikinọ ọzae na o re se jẹ ta ẹvẹrẹ Spanish, Marta ọ tẹ kẹe Ebaibol Efafa Akpọ Ọkpokpọ ọrọ Ikereakere Efuafo Na evaọ ẹvẹrẹ Spanish. Ọ tẹ jẹ kẹe obe nọ o rẹ sai fiobọhọ kẹe wuhrẹ Ebaibol na nọ uzoẹme riẹ o ta nọ Eme Ebaibol na O Gine Wuhrẹ? Evaọ oka nọ u lele i rie, Marta o te mu ọzae na avọ aye riẹ gbe emọ ivẹ rai Ebaibol na họ ewuhrẹ evaọ ifonu. Isiava a jẹ hai wuhrẹ evaọ oka. Marta ọ ta nọ: “Fikinọ mẹ riẹ ẹvẹrẹ Kekchi tere he, ẹvẹrẹ Spanish ma jẹ hai ro wuhrẹ Ebaibol na, kẹsena ọzae na ọ vẹ fa ẹme na fihọ ẹvẹrẹ Kekchi kẹ aye riẹ, rekọ emọ rai na a re yo ẹvẹrẹ Spanish.”

Epastọ ọzae nana ọ rrọ evaọ ichọche riẹ, fikiere ọ tẹ be hae rọ eware nọ o bi wuhrẹ evaọ Ebaibol na wuhrẹ ahwo ichọche na. Eware nọ ahwo ichọche na a je wuhrẹ na e were rai gaga, fikiere a tẹ nọe oria nọ ọ be jọ wuhrẹ eware ekpokpọ nana. Nọ ọ vuẹ ae nọ ohwo jọ ọ be hai wuhrẹ iẹe Ebaibol na, a te mu oma họ ekugbe ewuhrẹ na omomọvo. U kri hi, ahwo 15 soso a tẹ be hai kuomagbei koka koka nọ Marta o te bi wuhrẹ Ebaibol na kugbei evaọ ifonu. Nọ oke o be nyaharo na, a tẹ be hai fi ọgba họ kẹle ifonu na re ahwo na kpobi a sai yo ẹme na vevẹ.

Nọ Marta ọ vuẹ ekpako ukoko nọ ọ rrọ kpahe ahwo nana nọ o bi wuhrẹ Ebaibol na, ọkpako jọ o te weze kpohọ iwhre nọ ahwo nana nọ a bi wuhrẹ Ebaibol na a rrọ na. O te zizie ai re a kpohọ iwhre ọfa jọ nyae gaviezọ kẹ ovuẹ nọ ọsẹro okoghoa ọ te kẹ. Re ohwo o te te iwhre na, ọ rẹ rọ auwa ọvo ruọ omoto, kẹsena ọ vẹ rọ euwa ivẹ nya owotọ. Ahwo na a tẹ rọwo nọ a rẹ nya, yọ ahwo 17 soso ae nya.

Nọ eka jọ e vrẹ no, ọsẹro okogho na avọ Isẹri Jihova efa a tẹ nya kpohọ iwhre na bru ahwo nana nọ a bi wuhrẹ Ebaibol na, yọ a rria edẹ ene soso. Evaọ ohiohiẹ, a re rri ividio nọ e rrọ jw.org nọ a jọ gbiku eware nọ e rrọ Ebaibol na evaọ ẹvẹrẹ Kekchi, kẹsena a ve wuhrẹ ibroshọ na Amono A Bi Ru Oreva Jihova Nẹnẹ? Evaọ oke uvo, a ve rri ividio nọ e rrọ JW Broadcasting. Ọsẹro okogho na o te je ru re omomọvo o wo ohwo nọ o re wuhrẹ iẹe Ebaibol na.

Evaọ edẹ ene na, Isẹri Jihova na a je kpohọ iwhre Kekchi efa nọ e kẹle ọnọ a rrọ na nyae ta usi uwoma na re, yọ a je zizie ahwo re a nyaziọ ewuhrẹ obọdẹ jọ. Ahwo nọ a nyaziọ ewuhrẹ na a bu te 47, yọ a ta kẹ ae nọ a gwọlọ wuhrẹ aikpobi na Ebaibol na omomọvo. Iviuwou ikpegbọvo soso a tẹ rọwo nọ a re wuhrẹ Ebaibol na.

Nọ emerae jọ e vrẹ no, ekpako ukoko na a te ru ọruẹrẹfihotọ re a hae jọ iwhre ọsosuọ na ru ewuhrẹ evaọ urere oka kpobi. Enẹna, ahwo nọ a bu te oware wọhọ 40 a rẹ ziọ ewuhrẹ na ẹsikpobi. Evaọ etoke Ekareghẹhọ uwhu Jesu, ekpako na a te ru re a ru Ekareghẹhọ na evaọ iwhre na, yọ eva e were rai gaga nọ ahwo nọ a bu te 91 a rọ nyaze.

Nọ Marta o roro kpahe epanọ eware nana kpobi i ro muhọ gbe emamọ iyẹrẹ nọ i bi noi ze, ọ tẹ ta nọ: “Me yere Jihova gaga. Ẹsejọ o rẹ jọ omẹ oma nọ mẹ sai ru emamọ oware ovo ho, rekọ mai yọ ekwakwa nọ e rrọ obọ Ọghẹnẹ nọ o bi ro ru iruo. Jihova ọ riẹ oware nọ o jọ udu ahwo nọ a rrọ iwhre na, yọ o ru re a kuomagbe ahwo riẹ gọe. Jihova o you rai.”