Whai Inievo nọ E Kpako No, Wha bi Fiobọhọ Evaọ Ukoko Na
Oniọvo jọ nọ ọ kpako te ikpe udhone-gbesa (83) no, nọ a re se Connie ọ ta nọ: “Obọnana mẹ kpako no, mẹ gbẹ be sai ru eware buobu hu. Rekọ nọ mẹ tẹ kareghẹhọ eware nọ me ru no evaọ egagọ Jihova evaọ okenọ mẹ jọ uzoge, eva e rẹ were omẹ gaga.”
Ẹsejọhọ fikinọ whọ kpako no whọ gbẹ be sai ru te epanọ who je ru vẹre he. U kri no nọ whọ be rọ gọ Jihova, rekọ ẹsejọhọ whọ be hai roro kpahe epanọ who je ru eware bu te vẹre. Whọ tẹ be ta nọ ‘Kọ mẹ ẹdẹ na?’ Yọ o sae jọ nọ who bi roro nọ whọ be daoma te he. Kọ otẹrọnọ who re roro ere ẹsejọ, eme u fo nọ who re ru?
EME JIHOVA Ọ GWỌLỌ MI OWHẸ?
Nọ omara nọ: ‘Eme Jihova ọ gwọlọ mi omẹ?’ Whọ te ruẹ uyo onọ na evaọ obe Iziewariẹ 6:5. Yọ ẹme nọ ọ rrọ etẹe o te lẹliẹ eva were owhẹ. O ta nọ: “Whọ rẹ rehọ udu ra kpobi gbe uzuazọ ra kpobi gbe ẹgba ra kpobi you Jihova Ọghẹnẹ ra hrọ.”
Oria Ebaibol na u dhesẹ nọ re whọ rọ udu ra kpobi, uzuazọ ra kpobi gbe ẹgba ra kpobi gọ Ọghẹnẹ họ oware nọ ọ gwọlọ mi owhẹ. Ọra Jihova ọ gwọlọ mi owhẹ, koyehọ onọ whọ rẹ sai ru. Whọ tẹ kareghẹhọ oware yena, whọ gbẹ te rọ omara kele ahwo nọ i kiọkọ họ, yọ whọ te rọ onọ whọ be sai ru enẹna kele onọ who je ru oke ẹdẹ hẹ.
Dai roro iei: Nọ whọ jọ uzoge, whọ jẹ rọ ẹgba ra kpobi gọ Jihova, o gbẹ rrọ ere? Idibo Jihova buobu a jẹ rọ ẹgba rai kpobi ru iruo kẹ Jihova okenọ a jọ uzoge. Who je ru eware buobu oke yena fikinọ oma ra o jọ gaga. Yọ onọ whọ rẹ sai ru kẹ Jihova oke yena oye. Kọ enẹna? Ma riẹ nọ onọ whọ rẹ sai ru kẹ Jihova enẹna who bi ru na, onọ ẹgba ra o te ọye. Who te gine rri ẹme na ere, whọ te ruẹ nọ epanọ who je ru onọ ẹgba ra o te kẹ Jihova oke ẹdẹ na, ere who gbe bi ru nẹnẹ na. Fikiere onọ whọ rẹ sai ru kẹ Jihova who bi ru na.
Okenọ whọ jọ uzoge, whọ jẹ rọ ẹgba ra kpobi gọ Jihova, yọ nọ whọ kpako no na, ẹgba ra kpobi whọ be rọ gọe re na
WHỌ SAE REHỌ EWARE NỌ WHỌ RIẸ NO FIOBỌHỌ KẸ AMỌFA
Oware ofa ona. Ukpenọ who roro kpahe eware nọ whọ rẹ sai ru hu, daoma roro kpahe eware nọ whọ sai ru enẹna. Binọ u wo eware jọ nọ whọ rẹ sai ru enẹna nọ whọ hae sai ru hu okenọ whọ jọ uzoge. Joma ta ẹme te eware itieye na jọ.
Whọ sai gbiku eware nọ whọ ruẹ no kẹ ahwo. Rri eme nọ ahwo jọ nọ a kpako no a ta nọ a kere fihọ Ebaibol:
Devidi ovie na: “Mẹ jọ ọmaha oke jọ rekọ obọnana mẹ kpako no, rekọ mẹ re ruẹ ohwo okiẹrẹe ọvuọvo nọ a kiukeku hu, hayo ruẹ emọ riẹ nọ e be gwọlọ emu bẹ hẹ.”—Ol. 37:25.
Joshua: “Whaọ enẹna, me te uwhu no, yọ wha jọ udu rai kpobi gbe uzuazọ rai kpobi riẹ nọ ẹme ọvo nọ o rugba ha ọ rrọ họ evaọ eyaa eware iwoma kpobi nọ Jihova Ọghẹnẹ rai ọ ya kẹ owhai na. Aikpobi i rugba kẹ owhai no. Ẹme ọvo nọ o rugba ha ọ rrọ họ.”—Jos. 23:14.
Ẹsejọhọ okenọ whọ jọ uzoge, whọ ta oghẹrẹ eme nọ Devidi avọ Joshua a ta na rọ tuduhọ ahwo jọ awọ no. Rekọ ẹme nọ aimava a ta na o wo ẹgba vi ọnọ whọ ta oke ẹdẹ. Fikieme? Keme okenọ Devidi avọ Joshua a rọ ta eme yena yọ a gọ Jihova te ikpe buobu no, a tẹ jẹ ruẹ eware buobu no evaọ uzuazọ rai nọ u dhesẹ nọ eme nọ a ta na ginọ uzẹme.
Otẹrọnọ u kri no nọ whọ be rọ gọ Jihova, whọ sai gbiku kẹ amọfa re. Whọ sae vuẹ ae eghale nọ i te owhẹ no fikinọ whọ be gọ Jihova. Ẹsejọhọ whọ ruẹ oghẹrẹ nọ Jihova o ro fiobọhọ kẹ idibo riẹ jọ evaọ oke jọ, yọ u gbe owhẹ unu gaga. Whọ sai gbiku riẹ kẹ amọfa. Ẹsejọhọ iku itieye na i ti duobọte ae udu gaga. O sae jọ nọ who gbiku itieye na kẹ ahwo no oke jọ, yọ whọ ruẹ nọ u duobọte ae gaga. Whọ tẹ be hai gbiku eware nọ whọ ruẹ no anwẹnọ whọ be rọ gọ Jihova na kẹ inievo ra, o te lẹliẹ ẹrọwọ inievo na ga.—Rom 1:11, 12.
Oware ofa họ, nọ oma ra u gbe si nẹ owhẹ gaga ha, hae daoma kpohọ ewuhrẹ evaọ obọ Ọgwa Uvie. Etẹe inievo na a te jọ sasa owhẹ oma, yọ eme nọ whọ te ta ze e te sasa ae oma re. Oniọvo nọ a re se Connie nọ ma fodẹ ẹsiẹ na ọ ta nọ: “Iwuhrẹ nọ mẹ be hai kpohọ e rẹ sasa omẹ oma. Inievo na a you omẹ gaga, fikiere nọ me te te obei no, eva ọvo e rẹ were omẹ, mẹ rẹ gbẹ ruawa oware ovo ho. Mẹ rẹ daoma kẹ amọfa omoware jọ ro yere ae kẹ obọ nọ a bi fihọ kẹ omẹ. Yọ mẹ rẹ daoma kuomagbe inievo mẹ gọ Jihova.”
EWARE NỌ WHO BI RU KẸ JIHOVA E DA RIẸ ẸRO FIA
A gbiku ahwo buobu fihọ Ebaibol na nọ eva rai e were Jihova gaga dede nọ a gbẹ jẹ sai ru te epanọ a je ru vẹre he evaọ egagọ Jihova. Ohwo jọ họ Simiọn. Ohwo Izrẹl ọ jọ, yọ ọ kpako no evaọ okenọ a ro yẹ Jesu. Simiọn ọ jẹ hai kpobọ etẹmpol na. Yọ ẹsejọhọ ọ jẹ hae ruẹ ezae nọ e re kpako ho nọ i bi ru iruo nọ i wuzou gaga evaọ etẹmpol na. Rekọ nọ o je rri omariẹ, ọ vẹ ruẹ nọ ọ kpako no. Ẹsejọhọ o je roro nọ fikinọ ọ gbẹ be sai ru te ahwo nọ i kiọkọ họ na, Jihova o gbe you rie tere he. Rekọ uzẹme riẹ họ, Jihova o you rie gaga. Jihova o rri rie nọ o “kiẹrẹe je se egagọ gboja.” Yọ Ọghẹnẹ ọ ginẹ ghale Simiọn keme o ru nọ Simiọn ọ rọ ruẹ Jesu okenọ a yẹe ze obọ. Jihova ọ tẹ jẹ rehọ Simiọn ruẹaro kpahe eware nọ Jesu o ti ru ẹdẹfa nọ o te zihe ruọ Mesaya na no. (Luk 2:25-35) Oware nọ Jihova o ru kẹ Simiọn na u dhesẹ nọ orọnikọ epanọ oma Simiọn u si iriẹ fihọ no oye Jihova o je rri hi. Rekọ Jihova o muẹrohọ nọ o wo ẹrọwọ gaga, yọ “ẹzi ọfuafo ọ jariẹ oma.”
Jihova ọ ghale Simiọn keme o ru nọ Simiọn ọ rọ ruẹ Jesu okenọ a yẹe obọ, ọ tẹ jẹ ruẹaro eware jọ nọ Jesu o ti ru ẹdẹfa nọ o te zihe ruọ Mesaya na no
Riẹ nọ Jihova o you owhẹ gaga re. Dede nọ whọ kpako no, utho nọ who bi ru na o da Jihova ẹro fia. Otẹrọnọ onọ ẹgba ohwo u te, oye o bi ru kẹ Ọghẹnẹ, “oyena Ọghẹnẹ ọ rẹ jẹrehọ wọhọ epaọ onọ ohwo o wo, orọnikọ onọ ohwo o wo ho ho.”—2 Kọr. 8:12.
Nọ whọ riẹ ere no na, who gbe roro kpahe onọ whọ rẹ sai ru hu hu, rekọ onọ whọ rẹ sai ru. Kọ idhere jọ e riẹ nọ whọ sae gbẹ rọ ta usi uwoma, o tẹ make rọnọ whọ te sae ta kri hi? Ẹsejọhọ whọ sae rọ ifonu se ohwo, whọ vẹ ta usi uwoma kẹe kpẹkpẹe. Hayo whọ sae kẹ ohwo ekade jw.org. U te no ere no, whọ sai ru omoware jọ kẹ oniọvo jọ ro dhesẹ nọ who you rie. Oware utioye na o sai duobọte oniọvo na gaga keme ọ riẹ nọ ohwo nọ ọ kpako no, nọ ọ gọ Jihova kri no, ọye o ru oware na kẹe na.
Inievo jọ e kpako no rekọ a gbe bi fiobọhọ kẹ amọfa. Iku oware jọ nọ o via evaọ ofẹ jọ Africa u dhesẹ nọ ere o ginẹ rrọ. Iku na e rrọ ẹkpẹti na “O Siwi Uzuazọ Riẹ.”
Kareghẹhọ nọ ahwo a tẹ ruẹ epanọ who gbe kru egagọ Ọghẹnẹ ga te anwọ ikpe buobu ze na, oyena ọvo dede u re fiobọhọ kẹ ae kru ẹrọwọ rai. A be ruẹ nọ who thihakọ gaga no. Kareghẹhọ nọ Ebaibol ọ ta nọ: “Ọghẹnẹ ọ rrọ ohwo nọ o kiẹrẹe he he nọ iruo rai gbe uyoyou nọ wha dhesẹ kẹ odẹ riẹ e rẹ rọ thọrọ iẹe ẹro, nọ wha rọ gbodibo jẹ be ruabọhọ gbodibo kẹ erẹri na.”—Hib. 6:10.
HAI GBE FIOBỌHỌ KẸ AMỌFA
Ahwo nọ a rẹ kiẹ kpahe oma ohwo-akpọ a muẹrohọ nọ ekpako soso nọ i re fiobọhọ kẹ amọfa a re wo emamọ oma gaga, a re roro oware te ziezi, yọ a rẹ tọ re.
Orọnikọ who te bi fiobọhọ kẹ amọfa, whọ te nwani zihe ruọ uzoge no ho. Ma riẹ nọ Uvie Ọghẹnẹ ọvo u ti si owho notọ. U ti si uzioraha nọ ma reuku riẹ na no omai oma keme oware nọ o be lẹliẹ omai who je whu na oye.—Rom 5:12.
Rekọ ẹme na họ, who te gbe bi fiobọhọ kẹ amọfa re a riẹ Jihova je bi ru eware efa kẹ Jihova, ẹruore ra u ti mu owhẹ ẹro gaga. Yọ eware nọ who bi ru na e sai ru oma sasa owhẹ. Whai inievo nọ e kpako no, wha kareghẹhọ nọ eware nọ wha bi ru kẹ Jihova e da riẹ ẹro fia, yọ inievo ukoko na a you owhai gaga keme wha gine wo ẹrọwọ.