Rehọ Okẹ nọ Ọghẹnẹ Ọ Kẹ Owhẹ na Ru Iruo Ziezi

Eva e be were omai gaga inọ mai kpobi nọ ma be gọ Jihova na ma kẹle ohwohwo ziezi, gbe nọ ma be bọ ohwohwo ga. Orọnikọ nọ ma tẹ rrọ kugbe inievo mai no ọvo yọ ma tuduhọ ohwohwo awọ no ho. Ebaibol ọ vuẹ omai nọ ma tuduhọ ohwohwo awọ re ẹrọwọ mai ọ ga. Ebaibol dede ọ ta nọ oyena yọ ‘okẹ nọ u no obọ Ọghẹnẹ ze.’ (Rom 1:​11, 12) Kọ ẹvẹ ma sae rọ tuduhọ ahwo awọ?

Ma ẹme ra te. Nọ ma tẹ be kẹ uyo evaọ obọ ewuhrẹ, ma rẹ ta ẹme kpahe omamai gaga ha. Jihova gbe Ebaibol na gbe idibo riẹ ma rẹ mae ta ẹme kpahe. Yọ nọ ma te bi lele inievo mai gbiku, eme nọ e rẹ lẹliẹ ẹrọwọ rai ga ma rẹ ta.

Ru eware nọ e rẹ bọ amọfa ga. Ọvuọ ẹbẹbẹ riẹ ma wo, rekọ avọ ere ghele na ahwo jọ a ta nọ a re ru iruo odibọgba oke-kpobi. Ahwo ọfa a riẹ nọ ewuhrẹ udevie-oka o re vo ho dede nọ a be mọ gaga hayo iruo rai e be jọ ae wo uvẹ hẹ.

Kọ eware nọ who bi ru gbe eme nọ whọ be ta e be bọ inievo na ga? Kọ who bi muẹrohọ eme jọ nọ i re no inievo na unu ze nọ e rẹ sae bọ owhẹ ga re?