Uyoyou Ọghẹnẹ O rẹ Jọ Bẹdẹ Bẹdẹ

1-2. Eme ọ be via kẹ Ileleikristi buobu?

ẸKPORO o te bi fi gaga evaọ abade, ẹvẹ u re ru okọ nọ u bi bi abade na vrẹ? A gbẹ rọ umuokọ kru okọ na daji hi, ẹkporo na o re fi okọ na kpenẹ kpenẹ epa kpobi nọ u je rie. Umuokọ u re ru nọ ẹkporo na o gbẹ rọ wọ okọ na kpohọ obojọ no ho.

² Nọ oghẹrẹ ẹbẹbẹ jọ o te zere owhẹ, whọ sae wọhọ okọ nọ ẹkporo ọ be wọ kpenẹ kpenẹ. Ẹsejọ whọ rẹ dina wereva, u ri kri hi na, who mu iroro họ eroro no. Ẹsejọ whọ rẹ kareghẹhọ nọ Jihova o you owhẹ je bi fiobọhọ kẹ owhẹ evaọ ẹbẹbẹ na, rekọ u ri kri hi na, who muhọ ẹvro no sọ Jihova ọ be tubẹ ruẹ oware nọ o be via kẹ owhẹ na. (Ol. 10:1; 13:1) Ẹsejọ ogbẹnyusu ra jọ ọ rẹ ta ẹme jọ nọ ọ rẹ sasa owhẹ oma, eva e vẹ be ginẹ were owhẹ evaọ okioke yena. (Itẹ 17:17; 25:11) Rekọ u ri kri hi na, who je mu avro họ ewo no. Ẹsejọ dede, whọ sai roro nọ Jihova o gbe you owhẹ hẹ. Kọ ẹbẹbẹ o te te owhẹ, eme who re ru re u mu owhẹ ẹro ẹsikpobi inọ Jihova o you owhẹ yọ o bi fiobọhọ kẹ owhẹ?

3. Nọ a jọ Olezi 31:7 gbe 136:1 fodẹ uyoyou nọ o rẹ hiẹ hẹ na, eme họ otọ ẹme na, kọ eme o dhesẹ nọ ohwo ọvo o wo uyoyou nọ o rẹ hiẹ hẹ te Jihova ha? (Rri uwoho na re.)

³ Oware jọ nọ u re kru owhẹ udu ga nọ ẹbẹbẹ o te te owhẹ họ, nọ whọ tẹ kareghẹhọ nọ Jihova o wo uyoyou nọ o rẹ hiẹ hẹ kẹ owhẹ. (Se Olezi 31:7; 136:1.) A tẹ fodẹ “uyoyou nọ o rẹ hiẹ hẹ,” yọ a be ta ẹme kpahe epanọ ohwo o re you ohwo gaga, uyoyou nọ o wo kẹ ohwo na u re kiekpo ho, o re gbe you rie vrẹ ọvo. Ohwo ọvo o wo uyoyou nọ o rẹ hiẹ hẹ kaka Jihova ha. Ebaibol ọ ta nọ Jihova “ọ vọ avọ uyoyou nọ o rẹ hiẹ hẹ.” (Ọny. 34:6, 7) Ebaibol ọ tẹ jẹ ta kpahe Jihova nọ: “Whọ vọ avọ uyoyou nọ o rẹ hiẹ hẹ kẹ enọ i bi bo se owhẹ kpobi.” (Ol. 86:5) Eme Ebaibol ọ be vuẹ omai na? Ẹme nọ Ebaibol ọ be ta na họ, Jihova ọ rẹ nyasiọ idibo riẹ ba vievie he. Nọ ẹbẹbẹ o te te owhẹ, whọ tẹ kareghẹhọ nọ uyoyou nọ Jihova o wo kẹ owhẹ o rẹ hiẹ hẹ, who ti kru udu ga.—Ol. 23:4.

UYOYOU JIHOVA YỌ OWARE NỌ U WUZOU NỌ EBAIBOL O WUHRẸ OMAI

4. Fodẹ eware jọ nọ i wuzou gaga nọ whọ jọ Ebaibol wuhrẹ, gbe ẹjiroro nọ whọ gbẹ rọ vro eware nọ who wuhrẹ na ha.

⁴ Oware jọ nọ u re kru owhẹ udu ga nọ ẹbẹbẹ o te te owhẹ họ, whọ rẹ kareghẹhọ nọ oware nọ Ebaibol o wuhrẹ omai inọ Jihova o you omai na, o rrọ usu eware nọ i wuzou gaga nọ ma jọ Ebaibol wuhrẹ. A tẹ ta nọ eware jọ i wuzou gaga nọ Ebaibol o wuhrẹ omai, eware vẹ iroro ra i re kpohọ? Ẹsejọhọ whọ te kareghẹhọ eware jọ nọ whọ kaki wuhrẹ evaọ Ebaibol. Eware itieye na jọ họ, odẹ Ọghẹnẹ họ Jihova, Jesu họ Ọmọ ọvo riẹ, ahwo nọ a whu no a riẹ oware ovo ho, yọ akpọ na soso u ti zihe ruọ aparadase nọ ahwo a te rria bẹdẹ bẹdẹ. (Ol. 83:18; Ọtausi. 9:5; Jọn 3:16; Evia. 21:3, 4) Nọ who wuhrẹ eware yena no, whọ jẹ rọwo nọ uzẹme no, ohwo jọ ọ tẹ make ta kẹ owhẹ nọ eware yena uzẹme he, whọ te rọwo kẹe he. Fikieme? Keme whọ kiẹ eware na ziezi, whọ tẹ ruẹ nọ uzẹme ọvo. Obọnana ma te ta kpahe oware nọ u ro fo re whọ kareghẹhọ nọ oware nọ Ebaibol o wuhrẹ omai inọ Jihova o you omai na u wuzou gaga. Yọ u re fiobọhọ kẹ owhẹ si avro no udu nọ iroro ra e tẹ be vuẹ owhẹ nọ Jihova ọ be daezọ ebẹbẹ nọ i bi te owhẹ hẹ.

5. Dhesẹ oghẹrẹ nọ ohwo nọ ọ rrọ egagọ erue ọ rẹ rọ riẹ nọ eware nọ a bi wuhrẹ iẹe na e thọ.

⁵ Okenọ a je wuhrẹ owhẹ Ebaibol, eme u ru nọ whọ rọ ruẹ nọ kpakọ eware nọ a wuhrẹ owhẹ vẹre e thọ? Ẹsejọhọ who roro kpahe eware nọ a jẹ jọ obọ egagọ ra wuhrẹ owhẹ, who te rri ẹme nọ Ebaibol ọ ta, whọ tẹ ruẹ nọ kpakọ a bi wuhrẹ owhẹ thọ anwẹdẹ. Joma ta ẹme te oware utioye na jọ. Ma rehọ iẹe nọ taure who te ti kurẹriẹ, who je roro nọ Jesu họ Ọghẹnẹ Erumeru na. Rekọ nọ a je bi wuhrẹ owhẹ Ebaibol na, whọ tẹ nọ omara nọ, ‘Hẹrẹ tao, oware nọ mẹ rọwo na ginọ uzẹme?’ Nọ who ti roro kpahe oware nọ Ebaibol ọ ta ziezi, whọ tẹ ruẹ nọ kpakọ ọnọ whọ riẹ vẹre na uzẹme he. Whọ tẹ ruẹ nọ uzẹme na họ ọnọ Ebaibol ọ ta na inọ Jesu họ “ọmọ ọsosuọ evaọ emama kpobi,” ọye họ “Ọmọ ọvo Ọghẹnẹ.” (Kọl. 1:15; Jọn 3:18) Ma riẹ nọ iwuhrẹ erue nọ a wuhrẹ ohwo e sae “dowọ muotọ gaga” evaọ udu riẹ, yọ o rẹ lọhọ tere he re ọ rọwo nọ e thọ. (2 Kọr. 10:4, 5) Rekọ nọ u ti mu owhẹ ẹro no inọ eware nọ a je wuhrẹ owhẹ vẹre na e thọ, whọ gbẹ rehọ ae nọ uzẹme ofa ha.—Fil. 3:13.

6. Fikieme u ro mu owhẹ ẹro nọ ‘uyoyou Jihova nọ o rẹ hiẹ hẹ o rẹ jọ bẹdẹ bẹdẹ’?

⁶ Oware nọ who ru okenọ a je wuhrẹ owhẹ Ebaibol na, oye u fo nọ who re ru re kpahe ẹme uyoyou nọ Jihova o wo kẹ owhẹ nọ ma be ta na. Nọ ẹbẹbẹ o te te owhẹ, udu ra o jẹ be vuẹ owhẹ nọ Jihova o gbe you owhẹ hẹ, nọ omara nọ, ‘Kọ ginọ uzẹme nọ Jihova o gbe you omẹ hẹ?’ Who ve roro kpahe ẹme nọ Olezi 136:1 o ta kpahe uyoyou Jihova. Etẹe a rehọ uzoẹme nana no ze. Gine roro iei: Fikieme Jihova ọ rọ jọ oria Ebaibol yena ta nọ uyoyou riẹ “o rẹ hiẹ hẹ”? Kọ fikieme ẹme na “uyoyou riẹ nọ o rẹ hiẹ hẹ o rẹ jọ bẹdẹ bẹdẹ,” o rọ romavia te isia udhegbezeza (26) soso evaọ olezi yena? Ma ta no vẹre nọ oware jọ nọ u wuzou gaga nọ Ebaibol o wuhrẹ omai họ, Jihova o wo uyoyou nọ o rẹ hiẹ hẹ kẹ idibo riẹ. U wuzou gaga wọhọ epanọ eware efa jọ nọ who wuhrẹ evaọ Ebaibol nọ whọ rọwo na i wuzou gaga na. Udu ra o tẹ be vuẹ owhẹ nọ Jihova o rri owhẹ fihọ ohwo ọvo ho hayo inọ o you owhẹ hẹ, riẹ nọ udu ra o be gwọlọ viẹ owhẹ họ. Who du rọwo ẹme otiọye na ha nwane wọhọ epanọ whọ te rọwo ho na nọ ohwo jọ ọ tẹ be vuẹ owhẹ oware nọ o rọwokugbe ẹme Ebaibol ho.

7. Dhunu te eria Ebaibol jọ nọ i dhesẹ nọ Jihova o you omai gaga.

⁷ Eme buobu e rrọ Ebaibol nọ i dhesẹ nọ Jihova o you omai gaga. Jesu ọ ta ẹme otiọye na jọ kẹ ilele riẹ inọ: “Wha ghare vi imuedi buobu.” (Mat. 10:31) Jihova ọvo ọ tẹ jẹ ta kẹ ahwo riẹ nọ: “Me ti ru owhẹ ga, ẹhẹ, me ti fiobọhọ kẹ owhẹ, mẹ te rehọ obọze ẹrẹreokie mẹ kru owhẹ kekeke.” (Aiz. 41:10) Rri ẹme nọ Jihova avọ Jesu a ta na ziezi. Orọnikọ Jesu ọ ta nọ, ‘Ẹsejọhọ wha ghare vi imuedi buobu’ hu. Rekọ anọ: “Wha ghare vi imuedi buobu.” Yọ orọnikọ Jihova ọ ta nọ ‘Otiẹsejọ me ti fiobọhọ kẹ owhẹ’ hẹ. Rekọ anọ: “Me ti fiobọhọ kẹ owhẹ.” A ta ẹme na gbiae, a fi unu họ akotọ tae he. Udu ra o tẹ be vuẹ owhẹ nọ Jihova o gbe you owhẹ hẹ fiki ebẹbẹ nọ i te owhẹ, eme itieye na nọ Ebaibol ọ ta na e rẹ sasa owhẹ oma. Rekọ ere ọvo ho, e rẹ kareghẹhọ owhẹ uzẹme nọ whọ riẹ na inọ Jihova o you owhẹ. Eware nọ whọ riẹ na uzẹme ọvo, a rẹ vro rai hi. Whọ tẹ be hai roro kpahe eme itieye na jẹ lẹ se Jihova, whọ te ta ọkpọ ẹme nọ ọ rrọ 1 Jọn 4:16 na inọ: “Ma riẹ jẹ rọwo nọ Ọghẹnẹ o you omai.”a

8. Otẹrọnọ ẹsejọ whọ rẹ vro nọ Jihova o you owhẹ hẹ, eme whọ rẹ kareghẹhọ?

⁸ Kọ otẹrọnọ ẹsejọ udu ra o rẹ gbẹ vuẹ owhẹ nọ Jihova o you owhẹ hẹ, eme who re ru? Kareghẹhọ oware nọ whọ riẹ nọ o rrọ uzẹme na. Ma riẹ nọ ẹsejọ iroro mai e rẹ viẹ omai họ, rekọ oware nọ ma jọ Ebaibol wuhrẹ inọ Jihova o you omai na yọ uzẹme, a rẹ vro riẹ hẹ. Ma tẹ be vro nọ Jihova o you omai hi, kiyọ oghẹrẹ ohwo nọ Jihova ọ rrọ o be thọrọ omai ẹro no, o be thọrọ omai ẹro inọ ọye họ uyoyou.—1 Jọn 4:8.

KAREGHẸHỌ NỌ JIHOVA ‘O YOU OWHẸ’

9-10. Eme Jesu ọ jẹ ta kpahe okenọ ọ jọ Jọn 16:26, 27 ta nọ “Ọsẹ na omariẹ o you owhai”? (Rri uwoho na re.)

⁹ Ma te roro kpahe ẹme jọ nọ Jesu ọ ta kẹ ilele riẹ, ma rẹ riẹ nọ Jihova o gine you omai gaga. Ọ ta kẹ ae nọ: “Ọsẹ na omariẹ o you owhai.” (Se Jọn 16:26, 27.) Orọnikọ Jesu ọ ta ẹme yena kẹ ilele riẹ re eva e were ae ọvo ho. Who te rri eme nọ Jesu ọ ta no re ọ tẹ te ta ẹme yena, whọ rẹ ruẹ nọ orọnikọ ọ jẹ ta eme nọ i re ru oma were ilele riẹ kẹ ae he. Rekọ ọ jẹ ta ẹme kẹ ae kpahe oware jọ nọ u wuzou gaga, oye họ olẹ.

¹⁰ Jesu ọ kake ta kẹ ilele riẹ nọ odẹ riẹ a rẹ rọ lẹ, rekọ Jihova a rẹ lẹ se. (Jọn 16:23, 24) O roja nọ ilele Jesu a rẹ riẹ ere. Fikieme? Keme na nọ a kpare Jesu ze no, ẹsejọhọ ilele na a je roro nọ a sae nwane lẹ se Jesu. A riẹ Jesu gaga, yọ a bi lele iei ẹsikpobi. Fikiere a sai roro nọ, nọ orọnọ Jesu a mae riẹ na, a tẹ gwọlọ lẹ, a sae vuẹ Jesu oware nọ a gwọlọ vuẹ Ọghẹnẹ, Jesu ọvo ọ vẹ wọ ẹme na bru Ọghẹnẹ. Rekọ Jesu ọ ta kẹ ae nọ ere a re ru hu. Fikieme? Ọ ta kẹ ae nọ: “Ọsẹ na omariẹ o you owhai.” Ẹme yena yọ oware jọ nọ u wuzou gaga nọ Ebaibol o wuhrẹ omai kpahe olẹ. Roro ẹme na ziezi. Whọ jọ Ebaibol wuhrẹ kpahe Jesu no, who te ti you rie no. (Jọn 14:21) Rekọ epanọ Jesu ọ ta kẹ ilele riẹ inọ a sae lẹ se Jihova na, whọ sae lẹ se Jihova keme whọ riẹ nọ “Ọsẹ na omariẹ o you” owhẹ, orọnọ Jesu ọvo o you owhẹ hẹ. Oke kpobi nọ whọ tẹ be lẹ se Jihova, yọ who bi dhesẹ nọ whọ rọwo ẹme yena.—1 Jọn 5:14.

RIẸ EWARE NỌ E BE LẸLIẸ OWHẸ VRO NỌ JIHOVA O YOU OWHẸ HẸ NA

11. Ma tẹ be vro nọ Jihova o you omai hi, fikieme eva e rẹ rọ were Setan?

¹¹ Ma tẹ be vro nọ Jihova o you omai hi, ono o bi ru nọ ma bi ro wo avro otiọye na? Whọ tẹ ta nọ Setan Ẹdhọ na, whọ ta thọ họ. Ẹdhọ ọ “be gwọlọ ohwo nọ ọ rẹ re no,” yọ mai ọ be gwọlọ re no na. (1 Pita 5:8) Fikiere ọ tẹ ruẹ nọ ma be vro nọ Jihova o you omai hi, eva ọvo e rẹ were iẹe. Jihova o you omai jabọ o ro vi Jesu ze te ta omai no igbo. Rekọ Setan ọ gwọlọ nọ ma roro nọ ma te ahwo nọ a rẹ rọ izieraha rai vrẹ fiki idhe ẹtanigbo na ha. (Hib. 2:9) Who je rri oware ofa: Ma tẹ be vro nọ Jihova o you omai hi, ono eva e rẹ were? Setan. Kọ ma tẹ siọ Jihova ba ẹgọ fiki ebẹbẹ nọ i te omai, ono eva e rẹ were? Setan ọvona. Whaọ Setan ọ be gwọlọ nọ ma roro nọ Jihova o you omai hi. Rekọ who te rri rie, ginọ ono họ ohwo nọ Jihova o you ho? Setan, orọnọ omai hi, yọ ọye ọvo o ru nọ Jihova o gbe you rie he. O make rrọ ere na, “iruẹru ẹghẹ” jọ nọ Ẹdhọ ọ be rọ gwọlọ viẹ omai họ họ, o re ru re ma roro nọ mai họ ahwo nọ Jihova o you ho. (Ẹf. 6:11) Ma tẹ kareghẹhọ nọ Ẹdhọ nọ ọ rrọ ọwegrẹ mai na ọye o re ru re ma wo avro na, ma te daoma gaga re ma “wọso Ẹdhọ.”—Jem. 4:7.

12-13. Eme uzioraha nọ o rrọ omai oma na o rẹ lẹliẹ omai roro ẹsejọ, kọ fikieme?

¹² Orọnikọ Setan ọvo o bi ru nọ ma re ro roro ẹsejọ nọ Jihova o you omai hi hi. Oware ofa jọ o riẹ. Oye họ uzioraha nọ ma reuku riẹ na. (Ol. 51:5; Rom 5:12) Uzioraha u ru nọ ohwo-akpọ ọ gbẹ kẹle Ọghẹnẹ nọ ọ ma riẹ na ha. U te je ru nọ iroro mai, udu mai, gbe ugboma mai na soso o gbẹ rọ wọhọ epanọ Ọghẹnẹ ọ rọ mae vẹre he.

¹³ Uzioraha u ru nọ iroro mai e gbẹ rọ rrọ epanọ Ọghẹnẹ ọ rọ mae he. Fikiere ẹsejọ udu u re brukpe omai, ma rẹ ruawa, ozọ u re mu omai, yọ oma o rẹ vuọ omai. Enẹ o rẹ jọ kẹ omai nọ ma tẹ raha uzi. Rekọ ma gbẹ make raha uzi ọvo ho, nọ ma tẹ kareghẹhọ nọ mai erahaizi, o rẹ jọ ere kẹ omai re. Orọnọ Ọghẹnẹ ọ ma omai re ma jọ erahaizi hi. (Rom 8:20, 21) Oriruo jọ nọ ma sai ro dhesẹ oware nọ ma be ta na họ, omoto nọ etaya riẹ o fi no. Omoto na ọ rẹ gbẹ sae dhẹ ziezi te epanọ ọ hae te dhẹ hẹ. Ere re, fiki uzioraha, iroro mai gbe ugboma mai na soso e gbẹ be nwani ru iruo ziezi oghẹrẹ nọ Ọghẹnẹ ọ ma rai nọ i re ru hu. Oyejabọ nọ ma re ro roro nọ Jihova o you omai hi na evaọ ẹsejọ. Ma tẹ nwani mu ere họ eroro no, joma kareghẹhọ nọ Jihova họ “Ọghẹnẹ nọ ọ rrọ ruaro, nọ o re mu ọwhewhe, ọnọ o re . . . dhesẹ uyoyou nọ o rẹ hiẹ hẹ kẹ enọ i you rie je bi koko ijaje riẹ.”—Neh. 1:5.

14. Ma te roro kpahe idhe ẹtanigbo na, ẹvẹ u ti ro fiobọhọ kẹ omai nọ ma tẹ be vro nọ Jihova o you omai hi? (Ahwo Rom 5:8) (Rri ẹkpẹti na re “Rri Otọ Mu Fiki ‘Ogaga Eviẹhọ Uzioraha.’”)

¹⁴ Ẹsejọ ma re roro nọ ma te ahwo nọ Jihova o re you ho. Uzẹme riẹ họ, who te rri rie evaọ ofẹ jọ, ma gine te ahwo nọ Jihova o re you ho. Rekọ o you omai ghele, o gine wou kẹhẹ. Orọnikọ oware jọ nọ ma ru kẹ Jihova oye o soriẹ ze nọ o ro you omai hi. Rekọ Jihova họ ohwo nọ ọ hwa osa nọ a rọ ta omai no igbo, u te ru nọ ọ be rọ rehọ iruthọ mai vrẹ omai. O ru enana kpobi kẹhẹ na, fikinọ o you omai. (1 Jọn 4:10) Ma rẹ jẹ kareghẹhọ nọ orọnikọ ahwo nọ a re ruthọ họ Jesu ọ nyaze ti siwi hi, rekọ erahaizi. (Se Ahwo Rom 5:8.) Ohwo ọvo nọ o re ruthọ họ ọ riẹ hẹ, yọ Jihova o bi rẹro nọ ma re ru eware kpobi gbagba ha. Ma tẹ kareghẹhọ nọ uzioraha nọ ma reuku riẹ oye o rẹ lẹliẹ omai vro ẹsejọ inọ Jihova o you omai hi na, ma te daoma gaga re ma gbẹ kẹ avro otiọye uvẹ evaọ udu mai hi. —Rom 7:24, 25.

GBAEMU NỌ WHỌ RẸ GBẸ GỌ JIHOVA VRẸ ỌVO

15-16. Ma tẹ talamu Jihova be gọe vrẹ ọvo, eme ma riẹ nọ Jihova o ti ru, kọ fikieme? (2 Samuẹle 22:26)

¹⁵ Jihova ọ gwọlọ nọ ma “rẹ talamu” ọyomariẹ keme oware nọ o mai woma nọ ma re ru oye. (Izie. 30:19, 20) Ma te ru ere, Jihova ọ te talamu omai re, ọ te siọ omai ba ha. (Se 2 Samuẹle 22:26.) Ma tẹ be gbẹ gọ Jihova vrẹ ọvo, joma riẹ nọ ẹbẹbẹ kpobi nọ o te omai, o ti fi omai hotọ họ.

¹⁶ Eware nọ ma wuhrẹ no na i dhesẹ nọ ma sai kru udu ga nọ ebẹbẹ i te te omai. Ma riẹ nọ Jihova o you omai, yọ o ti fiobọhọ kẹ omai. Oware nọ Ebaibol ọ vuẹ omai nọ Jihova o ti ru oye. Udu mai o tẹ be vuẹ omai nọ Jihova o you omai hi, ma du roro nọ onọ udu mai o be vuẹ omai na họ uzẹme he. Rekọ oware nọ ma riẹ evaọ Ebaibol inọ Jihova o you omai na họ uzẹme. Jọ oware nọ Ebaibol o wuhrẹ omai inọ uyoyou Jihova nọ o rẹ hiẹ hẹ o rẹ jọ bẹdẹ bẹdẹ na, o thọrọ omai ẹro vievie he.