1925—Ikpe Udhusoi nọ E Vrẹ

EWARE NỌ A JE RẸRO RAI E VIA HA

Emọ-Uwuhrẹ Ebaibol buobu a je rẹro nọ akpọ na o ti zihe ruọ Aparadase evaọ ukpe 1925. Fikieme a je ro roro ere? Brọda Albert Schroeder nọ ọ jọ Utu Ẹruorote na uwhremu na ọ ta nọ: “Ma je roro nọ evaọ ukpe yena, Ileleikristi nọ a rọ ẹzi wholo nọ i kiọkọ otọakpọ na a ti kpobọ odhiwu no re a su Uvie Ọghẹnẹ. Yọ ma je roro re nọ ukpe yena ọvona amọ Abraham, Devidi, gbe ezae efa nọ e gọ Ọghẹnẹ ziezi a te kparoma ze, a vẹ te jọ emọ ivie nọ i ti su otọakpọ na nọ Uvie Ọghẹnẹ u te muhọ esu no.” Rekọ ukpe yena u te, u te bi je re no, rekiyọ eware nọ a je rẹro rai na e via ghele he. O kẹ ejọ uye gaga yọ o rẹ ginẹ kẹ ohwo uye.—Itẹ 13:12.

Dede nọ eware nọ Emọ-Uwuhrẹ Ebaibol na a je rẹro rai e via ha, ibuobu rai a gbẹ jẹ rọ ajọwha ta usi uwoma na. A ruẹ vevẹ nọ re a se isẹri kẹ Jihova họ iruo nọ e mai wuzou nọ a re ru. Joma dhunu te eware jọ nọ a ru re usi uwoma na o sai te eria nọ i thabọ.

A BỌ ERIA EFA NỌ A RẸ JỌ REHỌ IREDIO TA USI UWOMA

Taure ukpe 1925 u te ti te, Emọ-Uwuhrẹ Ebaibol na a bọ oria nọ a rẹ jọ ta ẹme fihọ iredio nọ a se WBBR. Nọ ukpe 1925 u te, Emọ-Uwuhrẹ Ebaibol na a tẹ jẹ bọ oria iredio ọfa kẹle ẹwho nọ a re se Chicago, evaọ Illinois. A se rie nọ WORD. Ralph Leffler nọ ọ jọ usu ahwo nọ a bọ oria iredio na ọ ta nọ: “Nọ u te te owọwọ no, evaọ ezi ekpahe, ahwo nọ a be rria eria nọ e maki thabọ gaga a jẹ hae jọ iredio rai yo ẹme nọ a be ta evaọ oria iredio WORD na.” Okenọ a ro mu ẹme họ ẹta obọ evaọ oria iredio na, uviuwou jọ nọ a jẹ rria ẹwho nọ a re se Pilot Station evaọ Alaska a jọ iredio rai gaviezọ kẹ ẹme na. Oria nọ a jẹ rria na o rehọ ikilomita nọ i bu vrẹ idu isoi (5,000) koyehọ emaele idu esa (3,000) thabọ no oria iredio na. Uviuwou na u te kere ileta se inievo nọ i bi ru iruo evaọ oria iredio na bi yere ae rọkẹ emamọ eme nọ a be ta no Ebaibol ze rọ tuduhọ ahwo awọ evaọ iredio.

Uwou-Eroro Akpegbivẹ 1, 1925 o ta epanọ eme nọ a be jọ iredio na ta e be nya thabọ te. O ta nọ: “Oria iredio WORD na o rrọ usu enọ a be mae gaviezọ kẹ eme riẹ evaọ eria nọ e maki thabọ evaọ United States. Ahwo nọ a rrọ ofẹ ovatha-ọre gbe ukiediwo-ọre United States, Cuba, gbe obọ ẹkpẹlobọ ovatha-ọre Alaska a rẹ sai yo ẹme nọ a be jọ iredio WORD na ta, yọ eme na e be were ahwo gaga. Eme na e be were ahwo buobu nọ a ri yo usi uwoma na vẹre he.”

Oke yena ukoko o jẹ daoma re a rọ iredio ta usi uwoma ziezi evaọ Canada. U wo oria iredio jọ nọ a re se CHUC nọ ahwo jọ a bọ fihọ Saskatoon, evaọ Saskatchewan nọ ọ rrọ Canada evaọ ukpe 1924. Ọ jọ usu eria iredio ọsosuọ nọ a jẹ hae jọ ta ẹme kpahe egagọ evaọ Canada. Nọ ukpe 1925 u te, ahwo nọ a wo oria iredio na a tẹ jẹ gwọlọ kwae kpohọ oria ofa keme etẹe na o gbẹ jẹ gba ae he. Ukoko o tẹ dẹ oria iredio na gbe eware na kpobi mi ai. Oke yena yọ ukoko o dẹ oria jọ no vẹre nọ a bọ ruẹrẹhọ ziezi no evaọ Saskatoon nọ a te hae jọ ta ẹme evaọ iredio. Kọ etẹe a nwane kwa eware iredio na nya.

Ahwo buobu nọ a jẹ rria iwhre nọ e rrọ Saskatchewan a ri yo usi uwoma na vẹre he. Rekọ nọ a mu ẹme họ ẹta no evaọ oria iredio ọkpokpọ na, kọ etẹe ahwo yena a ro yo usi uwoma na. Aye jọ ọ jariẹ nọ a re se Mrs. Graham. Ọ jẹ rria ẹwho nọ o siomano. Nọ ọ gaviezọ kẹ ẹme nọ a be ta evaọ iredio na no, o te kere se ukoko inọ a kẹe ebe. Brọda George Naish ọ ta nọ, “Oghẹrẹ nọ aye na o ro kere ẹme na u dhesẹ nọ ọ gwọlọ nọ a wuhrẹ iẹe Ebaibol obọnana obọnana. Fikiere nwanọ iko ebe Studies in the Scriptures na kpobi ma vi sei.” U kri hi, aye na ọ tẹ jẹ vuẹ ahwo buobu eware nọ ọ be jọ Ebaibol wuhrẹ.

A RIẸ OTỌ OWARE JỌ NỌ U WUZOU GAGA EVAỌ EBAIBOL NA

A kere uzoẹme jọ nọ u wuzou gaga fihọ Uwou-Eroro Asa 1, 1925. Uzoẹme na họ “Birth of the Nation.” Eme a jọ uzoẹme na ta nọ u wuzou gaga na? Emọ-Uwuhrẹ Ebaibol na a riẹ no vẹre inọ Setan o wo ukoko riẹ. Yọ ahwo nọ a rrọ ukoko riẹ na họ, izi imuomu, egagọ erue, egọmeti akpọ na, gbe enọ i wuzou ekiọthuọ akpọ na. Rekọ “ọrigbo nọ a re fievahọ nọ o wo areghẹ na” ọ tẹ rọ uzoẹme yena jẹ inievo na kpobi riẹ nọ Jihova omariẹ o wo ukoko riẹ re, yọ ukoko riẹ o be wọso ọrọ Setan. (Mat. 24:45) Ọrigbo nọ a re fievahọ na ọ tẹ jẹ ta nọ, Uvie Ọghẹnẹ u muhọ esu evaọ ukpe 1914, yọ ‘ẹmo o du lahwe evaọ obọ odhiwu,’ a te le Setan avọ izi imuomu riẹ no obọ odhiwu ze evaọ ukpe yena, yọ obọ otọakpọ obonẹ a rrọ enẹna.—Evia. 12:7-9.

Inievo jọ a rọwo ẹme nana nọ ukoko u ru vẹ no Ebaibol ze na ha. Ukoko o riẹ nọ ahwo jọ a te kake rọwo fihọ ẹme na ha. Fikiere a tẹ jọ uzoẹme nọ a jọ ta ẹme na ta nọ: “Otẹrọnọ ahwo jọ nọ a bi se Uwou-Eroro na a gbẹ rọwo fihọ ẹme nọ a jọ etenẹ ta na ha, ma be ta kẹ ahwo otiọye na nọ jọ a rọ udu kpotọ jẹ hẹrẹ Olori na, re a jẹ rọ udu rai kpobi gọe vrẹ.”

Evaọ obọ Britain, Brọda Tom Eyre nọ ọ jọ ọgbaẹmo aro (nọ a bi se ọkobaro enẹna), ọ ta oghẹrẹ nọ inievo buobu a rri ẹme nọ uzoẹme na o ta na. Ọ ta nọ: “Eva e were inievo na gaga nọ a ruẹ oghẹrẹ nọ ukoko u ro ru ẹme nọ ọ rrọ obe Eviavia izou 12 na vẹ. U ru nọ ma rọ riẹ nọ Uvie Ọghẹnẹ u muhọ esu no evaọ obọ odhiwu. Fikiere ma tẹ jẹ rọ ọwhọ vuẹ ahwo kpahe iẹe keme emamọ usi o rrọ. Onana o lẹliẹ omai se iruo usi uwoma ota na gboja gaga, ma tẹ jẹ ruẹ nọ Jihova o ti ru ikpeware kẹ omai evaọ obaro.”

A JE SE ISẸRI KẸ JIHOVA

Nẹnẹ na, Isẹri Jihova a riẹ ẹme nọ ọ rrọ obe Aizaya 43:10 na ziezi. Etẹe ọ ta nọ: “’Whai họ isẹri mẹ,’ ere Jihova ọ ta, ‘Ẹhẹ, odibo mẹ nọ mẹ salọ no.’” Rekọ taure ukpe 1925 u te ti te, a jẹ hae kake ta ẹme te oria Ebaibol yena evaọ ebe mai hi. Rekọ eware i nwene evaọ ukpe 1925 keme a ta kpahe ẹme nọ ọ rrọ Aizaya 43:10 gbe 12 na evaọ uvitha Uwou-Eroro nọ i te ikpegbọvo soso evaọ ukpe yena.

Evaọ obọ ekuhọ Aria 1925, Emọ-Uwuhrẹ Ebaibol na a te ru okokohọ ologbo evaọ Indianapolis nọ ọ rrọ Indiana. Brọda Joseph F. Rutherford o kere ẹmẹme jọ fihọ iprogramo okokohọ na nọ o ro dede ahwo nọ a nyaze rehọ. O kere nọ: “Okokohọ nana nọ ma nyaze na, ma nyaze re . . . Olori na ọ kẹ omai ẹgba nọ ma re ro se isẹri kẹe viere nọ ma te zihe kpo.” Edẹ eree a ru okokohọ na. Yọ a jẹ ta kẹ ahwo nọ a ziọ okokohọ na inọ a rọ uvẹ kpobi nọ u rovie se isẹri kẹ Jihova, a je si unu no ẹme na ha.

Evaọ edẹ udhegbizii Aria nọ o kiefihọ Ẹdẹ-Ọmaha, Brọda Rutherford o ru ẹme jọ nọ uzoẹme riẹ o ta nọ “A Call to Action.” Evaọ ẹme riẹ na, ọ ta nọ o roja gaga re ma se isẹri kẹ Jihova. Ọ ta nọ: “Jihova ọ ta kẹ ahwo riẹ nọ . . . : ‘Whai họ isẹri mẹ’ nọ i bi se isẹri nọ ‘mẹ họ Ọghẹnẹ.’ Nọ Jihova ọ ta ere no, ọ tẹ vuẹ ahwo riẹ oware nọ a re ru vevẹ, ọ vuẹ rai nọ: ‘Kpare oware oka kpehru rọkẹ ahwo na.’ U te no ahwo nọ Jihova ọ be rọ ẹzi ọfuafo riẹ fiobọhọ kẹ no, amọfa a rrọ otọakpọ na ha nọ a rẹ sai se isẹri kẹ Jihova keme ae họ ahwo riẹ.”—Aiz. 43:12; 62:10.

Nọ Brọda Rutherford o je ku ẹme riẹ họ, o te se ẹme jọ no obe jọ ze. Uzoẹme riẹ họ “Message of Hope.” Ogbotu na soso a rọwo fihọ ẹme nọ o se na. Ọ jọ ẹme na ta nọ Uvie Ọghẹnẹ ọvo họ emamọ ẹruore nọ ahwo-akpọ a wo. Oye u ti ru nọ a ti ro wo “udhedhẹ, u ti ru nọ eware i ti ro woma kẹ ahwo, a ti wo omakpokpọ, uzuazọ ebẹdẹ bẹdẹ, ufuoma, gbe evawere nọ u ti wo ere he.” Uwhremu na, a tẹ fa eme nọ e rrọ obe na fihọ evẹrẹ efa buobu. A te printi riẹ fihọ emebe evẹvẹ. Enọ a ghale kẹ ahwo i bu te enwenọ ima udhuvẹ (40,000,000).

Evaọ oke yena, Emọ-Uwuhrẹ Ebaibol na a nwane ta nọ jọ a se ae Isẹri Jihova ha. Ikpe buobu e vrẹ taure a tẹ te re odẹ yena. Rekọ nọ oke o be nya na, a tẹ be ruẹ nọ re a se isẹri kẹ Jihova yọ oware nọ o roja gaga nọ a re ru.

A JE ZIHE BRU AHWO NỌ A GWỌLỌ GBE YO EME ỌGHẸNẸ

Ahwo buobu a je kurẹriẹ ziọ ukoko na. Yọ ukoko o jẹ tuduhọ ae awọ re a zihe bru ahwo nọ a ta usi uwoma kẹ nọ a gwọlọ gbe yo eme na. Nọ a ghale omobe ovẹvẹ Message of Hope na kẹ ahwo gaga no, obe ukoko na jọ nọ a je se Bulletina o tẹ ta nọ: “Wha daoma zihe kpohọ eria nọ wha jọ ta usi uwoma kẹ ahwo no vẹre, o tẹ make rọnọ omobe ovẹvẹ Message of Hope na ọvo wha jọ etẹe kẹ ahwo vẹre.”

A jọ Bulletin Ọvo 1925 ta kpahe ẹme nọ oniọvo jọ nọ ọ jẹ rria Plano, evaọ Texas ọ ta. Anọ: “Ma ruẹ nọ ohwo o te zihe nyae ta usi uwoma evaọ eria nọ a ta usi uwoma te no vẹre, ẹsibuobu ahwo a rẹ tubẹ jariẹ gaviezọ vi eria nọ a re ta usi uwoma te no vẹre he. Ẹwho jọ nọ ma jẹ hai kpohọ nyae ta usi uwoma, a jariẹ ta usi uwoma te isiasoi no evaọ ikpe ikpe nọ e vrẹ na. . . . Kẹle na oni mẹ gbe Sista Hendrix a kpohọ etẹe nyae ta usi uwoma. Yọ ebe nọ a ghale kẹ ahwo i bu vi enọ a kẹ ahwo no vẹre anwẹdẹ evaọ ẹwho na.”

Ọkobaro jọ nọ ọ jọ orẹwho nọ a re se Panama o kere nọ: “Ahwo buobu nọ a le omẹ vẹre nọ mẹ nyae ta usi uwoma kẹ ae, a gaviezọ kẹ omai uwhremu na nọ me zihe ọrọ avọ isiava hayo ọrọ avọ isiasa. Ahwo nọ mẹ ta usi uwoma kẹ no mẹ be mai zihe bru enukpe nana. Yọ eva e were omẹ gaga inọ eme na e were rai.”

A RUABỌHỌ IRUO NA

Brọda Rutherford ọ jọ ileta nọ o kere se ekobaro ta ẹme kpahe epanọ a ru iruo Uvie na te evaọ ukpe yena gbe epanọ a re gbe ro ru iruo na vrẹ. Ọ ta nọ: “Mẹ riẹ nọ eva e were owhai gaga nọ wha rọ sasa ahwo buobu nọ eva e be were he oma evaọ ukpe nana nọ o vrẹ na. Iruo nana nọ wha ru na u ru eva were owhai . . . Enukpe nana, wha ti wo uvẹ nọ wha ti ro se isẹri kẹ Ọghẹnẹ gbe uvie riẹ je dhesẹ nọ whai họ ahwo riẹ dẹẹ. . . . Fikiere ajọ mai kpobi ma kpare irru mai kpehru re ma so ile jiri Ọghẹnẹ mai nọ ọ rrọ Ovie mai na.”

Evaọ ubrobọ ekuhọ ukpe 1925, ukoko o jẹ ma omaa epanọ a rẹ rọ bọ Ebẹtẹle nọ ọ jọ Brooklyn re ọ rro vi epanọ ọ jọ. Ukpe 1926 ukoko u ro mu ebabọ na họ, yọ ukoko o re bọ oria nọ o rro te ere ẹdẹvo ho evaọ oke yena.