A Dikihẹ Kẹ Ohwohwo nọ Eware Okpẹtu E Via Kẹ Ae

EWARE okpẹtu buobu e via kẹ Naomi. Okenọ ohọo u je mu evaọ Izrẹl, ọzae Naomi ọ tẹ jiroro nọ ọ rẹ kwa uviuwou riẹ no Bẹtlẹhẹm ẹwho rai. A tẹ kwa kpobọ ẹkwotọ Moab. Ẹdẹ jọ, ọzae Naomi o te whu siọ ọyomariẹ avọ emezae ivẹ rai ba evaọ orẹwho nọ a jẹ jọ erara na. Nọ u te oke jọ, emezae riẹ na a tẹ rehọ emetẹ Moab nọ e be gọ Jihova ha. Nọ ikpe ikpe e vrẹ no, oware okpẹtu ofa o tẹ via. Emezae ivẹ riẹ na i te je whu! Aimava na ọvuọvo o yẹ ọmọ họ. Ere te ọzae te emọ ivẹ i ro whu ku Naomi. Yọ o wo ọmọ-uruọmọ họ.

Nọ Naomi ọ ruẹ nọ oware ovo u gbe kiọkọ kẹe he, ọ tẹ tubẹ ta nọ o re zihe kpobọ Bẹtlẹhẹm nọ o no ze. Yọ onya na o sae rehọ iẹe te enwenọ oka soso. Rut avọ Ọpa nọ e jọ eyae emezae riẹ a lele i rie ruọ edhere je kpo. Rekọ Naomi ọ gwọlọ nọ a nyasiọ orẹwho rai gbe imoni rai ba fiki riẹ hẹ. O je roro inọ o sae whae ze nọ a gbẹ te rọ wariẹ rọo hayo yẹ emọ obọrai hi. Naomi ọ tẹ jẹ tẹzẹ Rut avọ Ọpa nọ a zihe bru ini rai. Onana u dhesẹ nọ eyae na ọ jẹ mai roro kẹ orọnikọ omobọ riẹ hẹ. Naomi ọ gba riẹ mu nọ ọye ọvo goli ọ rẹ nya kpo, onọ u dhesẹ nọ ọ gudu. Oghẹrẹ nọ Naomi ọ rọ tẹzẹ ai, o lẹliẹ Ọpa kuenu oviẹ, o te zihe kpo. Rut o kuenu oviẹ re, rekọ ọ rọwo zihe kpo ho.

Rut ọ ta kẹ Naomi nọ, “whọ tẹzẹ omẹ hẹ re mẹ nyasiọ owhẹ ba, . . . keme oria nọ whọ nya mẹ te nya, yọ oria nọ whọ te jọ evaọ aso mẹ te jọ. Ahwo ra a te jọ ahwo mẹ, yọ Ọghẹnẹ ra ọ te jọ Ọghẹnẹ mẹ. Oria nọ whọ jọ whu mẹ te jọ whu, yọ etẹe a ti ki omẹ fihọ.” Emamọ aye nana nọ ọ gudu na ọ salọ nọ Ọghẹnẹ Naomi nọ a re se Jihova na, ọ rẹ jọ Ọghẹnẹ riẹ re.

Ere Rut o ro lele Naomi kpobọ Izrẹl. Ọ nyasiọ uviuwou riẹ gbe uruemu ẹwho rai ba. Ọ tẹ jẹ nyasiọ eghẹnẹ nọ ọ jẹ gọ evaọ obọ Moab ba. Nọ aimava na a te Bẹtlẹhẹm, eyae na jọ a tẹ tehe enu fiki epanọ Naomi o nwene fihọ no. Naomi o te bi bruenu nọ Jihova o mi rie eware kpobi no. O fi rie họ ababọ, je ru uzuazọ riẹ rrọ yayare. O sae jọ nọ ẹme Naomi na ọ da Rut, keme ọ nyasiọ eware kpobi ba lele iei kpo. Rekọ Rut o muofu hayo go fiki ẹme na ha. Ukpoye, o te je si isogẹ evaọ idhu nọ e kẹle oyena re ọyomariẹ avọ Naomi a ruẹ emu re.

Boaz ọmọ Rehab nọ o fe je wo idhu, o muẹrohọ Rut nọ o bi si isogẹ evaọ idhu na. Ọzae nana nọ ọ rrọ ohwo okiẹrẹe na ọ tẹ nọ kpahe Rut. A tẹ vuẹe epanọ o bi ro ru iruo gaga re ọ sai fiobọhọ kẹ Naomi. O te jiri Rut rọkẹ epanọ ọ rọ salọ nọ ọ rẹ dhẹ ruọ otọ ibekpe Jihova re ọ jọ adhẹzọ riẹ. Ọ tubẹ vẹvẹ idibo-emezae riẹ unu dede nọ a dhobọtei hi.

Aso ẹdẹ yena, Rut o te gbiku kẹ Naomi epanọ Boaz o ro dhesẹ uwowou kẹe. Yọ o lẹliẹ eva were Naomi gaga. O sae jọ nọ Naomi ọ ta kẹ omariẹ nọ Boaz ọ sae rehọ Rut! Keme omoni rai ọ rrọ. U wo obọdẹ uzi jọ nọ Ọghẹnẹ o fihọ kpahe eyae-uku nọ e gbẹ maha wọhọ epaọ Rut na. Uzi na o ta nọ ohwo o te zihe ruọ aye-uku, omoni ọkpekpe ọzae nọ o whu na ọ sae rehọ aye na. Ere ọ sai ro yẹ ọmọ nọ o re yo odẹ ọzae riẹ nọ o whu no na. Re uyẹ riẹ gbe ukuoriọ riẹ u gbe vru no ho. (Izie. 25:5, 6) Naomi ọ tẹ vuẹ Rut oware nọ o re ru.

Rut ọ rọwo nọ o re ru epanọ Naomi ọ ta kẹe, dede nọ o wọhọ nọ a rẹ jọ oborai ru ere he. Yọ o sae jẹ jọ nọ o lẹliẹ ozọ mu ei re. Fikiere, o te kpohọ oria nọ a rẹ jọ si ibi no igbe ekakọ na evaọ aso. Ahwo a jẹ hai kiẹzẹ akotọ ibi ekakọ rai nọ a kokohọ evaọ etẹe. Rut ọ tẹ kuẹlẹ kpohọ oria nọ Boaz o kiẹzẹ, ọ tẹ lẹlẹ yẹ ohọ no awọ riẹ, o te kiẹzẹ. Nọ Boaz ọ rọwo ze, Rut ọ tẹ romakpotọ kareghẹhọ iẹe uzi Ọghẹnẹ, gbe epanọ Boaz ọ sai ro ru oware nọ uzi na o ta. O sae jọ nọ ọzae nana nọ ọ rrọ wowou na ọ ruẹ nọ ozọ o jẹ dina mu Rut. Rekọ, fikinọ Boaz ọ ruẹ nọ Rut ọ gudu, o te je you Jihova gbe uviuwou riẹ, ọ tẹ rọwo kẹe nọ ọ te daoma ruẹ sọ ọ sae rehọ iẹe wọhọ epanọ ọ vuẹ riẹ na.

Okiokiọ riẹ, Boaz ọ tẹ nyabru ekpako Bẹtlẹhẹm. O te ru eware kpobi owowa lele epanọ uzi Ọghẹnẹ o ta. Ọ tẹ rehọ Rut. Nọ oke jọ o vrẹ no, Rut o te yẹ ọmọzae. Naomi o you ọmọ-uruọmọ riẹ nana nọ a se Obẹd na gaga. Uyẹ ọmọ yena Devidi ovie na o no ze. Yọ ikpe buobu nọ i lele i rie, Mesaya na o te je no uyẹ riẹ ze! (Mat. 1:5, 6, 16) Jihova ọ ghale Naomi avọ Rut gaga fikinọ a gudu!

Se iku Ebaibol na:

• Rut 1:1–4:22

Onọ nọ a rẹ ta ẹme kpahe:

Eme gbe eme Naomi avọ Rut a ru ro dhesẹ nọ a gudu?

1. 2. Fikieme ma sae rọ ta nọ orọnọ fiki iroro ọfariẹ-ogbe Rut ọ rọ nyabru Boaz he? (ia 47 ¶17-18)

   Uyo ra

2. 3. Boaz o se Rut “ọmọtẹ mẹ.” Eme oyena u dhesẹ kpahe Boaz? (Rut 2:8; w16.11 3)

   Uyo ra

3. 4. Omoni ọkpekpe ọzae Naomi na ọ rọwo nọ ọ rẹ rehọ Rut hu, rekọ Boaz ọ rọwo. Ẹvẹ oware nọ Boaz o ru na u ro dhesẹ nọ o wo oriobọ họ wọhọ ọzae yena? (w23.03 14) Uwoho avọ 2

   Uyo ra

   

Roro Kpahe Eware nọ Who Wuhrẹ Noi Ze

• Rut o kru obọ ga ru iruo, umutho nọ o wo o tẹ jẹ dae ẹro. Ẹvẹ oriruo riẹ o sai ro fiobọhọ kẹ omai nọ eware e tẹ rrọ gaga, nọ ma gbe wo ugho ho? Uwoho avọ 3

  Uyo ra

  

• Okenọ eware okpẹtu e via kẹ Naomi, Rut ọ jọ kugbei nọ o fiobọhọ kẹe thihakọ. Naomi ọ romakpotọ kuvẹ re Rut o fiobọhọ kẹe. Eme onana u wuhrẹ omai nọ amọfa a tẹ gwọlọ fiobọhọ kẹ omai evaọ oke obẹbẹ? Eme ma wuhrẹ mi Rut kpahe epanọ ma sae rọ tuduhọ amọfa awọ?

  Uyo ra

• Oghẹrẹ ọfa vẹ whọ sae rọ rehọ aro kele Naomi avọ Rut gudu?

  Uyo ra

Roro Didi Kpahe Jihova avọ Oreva Riẹ

• Eme me wuhrẹ kpahe Jihova evaọ iku nana?

  Uyo ra

• Oghẹrẹ vẹ iku nana i ro dhesẹ oware nọ Jihova ọ gwọlọ ru via?

  Uyo ra

• Enọ vẹ mẹ te nọ Naomi avọ Rut nọ a tẹ kpare ae ze no?

  Uyo ra

Gbe Wuhrẹ Eware Efa

Eme ma sae jọ obe Rut wuhrẹ kpahe uyoyou nọ o rẹ hiẹ hẹ, kọ ẹvẹ ma sai ro ru eware nọ ma wuhrẹ na?

“Jọ Uyoyou nọ Ma Wo kẹ Ohwohwo O Hiẹ Hẹ” (w21.11 8-13)

Rọ ifoto iku Ebaibol nana fiobọhọ kẹ ahwo uviuwou ra re a rri iku na wọhọ ẹsenọ a jọ etẹe.

“Rut Yọ Ogbẹnyusu nọ Ọ Romakpotọ” (ijwis uzoẹme avọ 12)