9 SHIFRA, PUA, AMRAM, JOKEBẸD, GBE MIRIAM
‘Fiki Ẹrọwọ, A Ko Mosis Dhere’
JOSẸF o whu vrẹ ikpe udhosa (60) no. Emamọ ọzae nana nọ Jihova o ro siwi ahwo Ijipti evaọ okenọ ohọo u je mu evaọ orẹwho na soso na, ọ thọrọ ahwo Ijipti ẹro no. Fẹro ọkpokpọ o bi su Ijipti enẹna. O mukpahe ahwo Izrẹl na, yọ ozọ rai u je mu ei re. O jọ ere keme a je dhe ebuebu fikinọ Jihova ọ jẹ ghale ae. Fikiere, ahwo Ijipti a te ru ahwo Hibru na họ erigbo, a te je gboja kẹ ae. O make jọ ere na, erigbo na i je dhe evievihọ.
Fẹro ọ tẹ gba ẹgwae oware omuomu ọfa jọ nọ o re ru. Ọ tẹ ta nọ a se Shifra avọ Pua sei. Eyae Hibru ivẹ nana i re yẹ eyae. Fẹro ọ tẹ ta kẹ ae nọ, otẹrọnọ aye Izrẹl jọ kpobi o yẹ ọmọzae, jọ a kpei no. Ẹme nana nọ osu ologbo nana ọ ta kẹ ae na ọ te lẹliẹ ozọ mu ai gaga! Rekọ eyae ivẹ nana a gudu, a tẹ jẹ be “dhozọ Ọghẹnẹ uzẹme na.” A riẹ nọ ohwo-akpọ ọvuọvo o wo udu nọ o re ro ru ai ghẹmeeyo kẹ Jihova ha, Ọnọ ọ rrọ osu ehrugbakpọ na. Ozọ Ọghẹnẹ nọ a be dhẹ u ru nọ a rọ gudu ziezi. “A ru oware nọ ovie Ijipti ọ ta kẹ ae na ha.” Ukpoye, a jẹ thọ emọ nọ a je yẹ na. O make rọnọ eva e jẹ dha Fẹro gaga, a vuẹ riẹ oware nọ a je ru hu. Jihova ọ ruẹ emamọ oware nọ a je ru na. “Fikiere Ọghẹnẹ o te ru ewoma kẹ eyae nọ i re yẹ eyae na.” Uwhremu na, Jihova o ru nọ a ro wo ọvuọ uviuwou riẹ.
Eme ọ hae te via kẹ Mosis okenọ ọ gbẹ jọ ọmọboba, ogbẹrọnọ eyae nọ i re yẹ eyae na, ọsẹgboni riẹ, gbe oniọvo ọmọtẹ riẹ a gudu hu?
Nọ Fẹro ọ ruẹ nọ omaa omuomu riẹ na u wiruo ho, o te jie uzi nọ a ru oware jọ nọ u tube yoma vi oyena. Ọ ta nọ ahwo Ijipti a gbolo emọboba ahwo Izrẹl nọ e rrọ emezae fihọ Ethẹ Naele na re a da ame whu! Evaọ etoke oyoma yena, u wo ọzae-avọ-aye jọ nọ a re se Amram avọ Jokebẹd. Aimava na a yẹ emọ ivẹ nọ a re se Miriam avọ Erọn. Rekọ nọ Jokebẹd o dieva ọmọ avọ esa rai họ, tei te Amram a riẹ nọ o te yẹ ọmọzae, ahwo Ijipti a ti kpe ọmọzae na no. Fikiere, o te gwọlọ nọ a rẹ jẹ okpiroro jọ. Nọ a yẹ ọmọ na no, a tẹ daoma re a ko ẹe dhere te epanọ o sae lọhọ kẹ ae te. Rekọ whọ riẹ nọ re a ko ọmọboba dhere, o nwane lọhọ tere he. Nọ ọmọ na o te emerae esa no, Jokebẹd ọ tẹ rehọ ekete, ọ tẹ rọ bitumẹn avọ ikota ralọ iẹe re ọ seba efi, ọ tẹ wọ ọmọ na fihọ eva riẹ. Ọ tẹ wọ ekete na fihọ udevie ikpoko nọ e rrọ akotọ Ethẹ Naele na. Ọmọtẹ ọsese riẹ nọ a re se Miriam o te dikihẹ umugbo jọ re ọ hai rri oware nọ o te via kẹ oniọvo ọmaha riẹ.
Nọ omoke jọ o vrẹ no, ọmọtẹ Fẹro ọ tẹ nyaziọ Ethẹ Naele te họ. Ọ tẹ ruẹ ekete na nọ o bi vori. Ọ tẹ ta kẹ odibo ọmọtẹ riẹ jọ re ọ nyae wọe ze. Nọ a rovie ei, ọmọtẹ Fẹro na ọ tẹ ruẹ ọmọzae ọboba nọ ọ be jọ eva riẹ viẹ yọ o wo erru wumuo ho. Ohrọ ọmọ na o tẹ re iẹe. Ọ tẹ ta nọ ọ rẹ rehọ ọmọ na re ọ jọ ọmọ riẹ. Rekọ ọ tẹ ruẹ nọ u fo nọ ọmọ na o re wo oni nọ ọ rẹ rẹrotei. Miriam ọ tẹ nwane dhẹ kpohọ oria nọ a rrọ na ududu, ọ tẹ ta kẹ ọmọtẹ Fẹro nọ ọ sai se aye jọ ze re ọ yọrọ ọmọ na kẹe. Ọmọtẹ Fẹro ọ tẹ rọwo. Ere Miriam ọ rọ dhẹ nyai se oni obọriẹ ze. Ma riẹ nọ eva e te were Jokebẹd gaga nọ ọ ruẹ nọ ọ sae yọrọ ọmọ riẹ nọ o you gaga na ababọ ozọ, a vẹ jẹ tubẹ hwae osa fihọ iẹe dede! Ma tẹ jẹ riẹ nọ ọyomariẹ avọ Amram a dawo ẹgba rai kpobi re a wuhrẹ ọmọ na kpahe Jihova. Nọ a yọrọ ọmọ na te umuo jọ no, u te te ẹdẹ nọ a ro zihe ei se ọmọtẹ Fẹro. Ọmọtẹ na o te sei Mosis.
Kọ Jihova ọ ghale Amram, Jokebẹd, gbe Miriam fikinọ a wo ẹrọwọ jẹ gudu? Ee! Amram avọ Jokebẹd a yọrọ Miriam avọ Erọn ziezi, onọ u ru nọ a sae rọ gọ Jihova wowoma. A tẹ jẹ rọ ibiaro rai ruẹ epanọ Jihova ọ jẹ rọ thọ Mosis. Ebaibol na ọ ta ha sọ ọsẹgboni Mosis a tọ te epanọ a rọ ruẹ oghẹrẹ ohwo nọ Mosis ọ jọ uwhremu na gbe epanọ Jihova ọ rọ rehọ iẹe ru iruo. (Ọny. 6:20) Rekọ Miriam avọ Erọn a tọ tere. A ruẹ eware igbunu nọ Jihova ọ rọ Mosis ru. Yọ aimasa na a dhesẹ ẹrọwọ ọgaga, a tẹ jẹ gudu ziezi. Evaọ uzou nọ o kẹle onana, ma ti wuhrẹ epanọ a rọ yọrọ Mosis gbe epanọ ọ rọ gudu ziezi.
Se iku Ebaibol na:
Onọ nọ a rẹ ta ẹme kpahe:
Eme gbe eme eyae nọ i re yẹ eyae na gbe uviuwou Mosis a ru ro dhesẹ nọ a gudu?
Gbẹ Kiẹ Kodo
1. Eme a tọ ku nọ u dhesẹ nọ iku Ebaibol nana ginọ uzẹme? (g04 4/8 4 ¶4–5 ¶1)
2. Eme egba-eriariẹ a ta nọ u dhesẹ nọ ahwo Ijipti a jẹ hae rehọ papirọs zuo ekete gbe nọ Fẹro ọ ginẹ ta nọ a kpe emọ ahwo Hibru no wọhọ epanọ Ebaibol ọ ta? (g04 4/8 6 ¶1-2) Uwoho 1
Christine Osborne Pictures/Alamy Stock Photo
Uwoho 1: A gbẹ be rọ igbe papirọs zuo ekọ rite inẹnẹ
3. Eme ma riẹ kpahe eyae Hibru nọ e jẹ hai yẹ eyae na, kọ ẹvẹ Ọghẹnẹ ọ rọ ghale ae? (w03 11/1 20 ¶3-4; it “Aye nọ O re Yẹ Eyae”) Uwoho avọ 2
Uwoho 2
4. Ẹvẹ Miriam o ro dhesẹ nọ o wo ẹrọwọ ọgaga makọ evaọ okenọ ọ who no? (ijwia uzoẹme avọ 7 ¶14-18)
Roro Kpahe Eware nọ Who Wuhrẹ Noi Ze
Eme esẹgbini a rẹ sai wuhrẹ mi Amram avọ Jokebẹd?
Eme emọ a rẹ sai wuhrẹ mi Miriam evaọ okenọ ọ gbẹ maha? Uwoho avọ 3
Uwoho 3
Ẹvẹ whọ sae rọ rehọ aro kele Shifra avọ Pua gudu evaọ uzuazọ ra?
Roro Didi Kpahe Jihova avọ Oreva Riẹ
Eme me wuhrẹ kpahe Jihova evaọ iku nana?
Oghẹrẹ vẹ iku na i ro dhesẹ oware nọ Jihova ọ gwọlọ ru via?
Enọ vẹ mẹ te nọ ahwo nọ a fodẹ odẹ rai evaọ iku nana nọ a tẹ kpare ae ze no?
Gbe Wuhrẹ Eware Efa
Se kpahe oware nọ ma rẹ sai wuhrẹ mi eyae nọ e rọwo ru oware nọ Fẹro ọ ta ha.
“Eyae Nọ I Ru Eva Were Jihova” (w03 11/1 20-21 ¶3-5)
Nọ ohwo ọ tẹ gbaudu yoẹme kẹ Jihova viukpọ ahwo, kọ Jihova ọ rẹ gbẹ rẹrotei?