Jọ Onọ Who Wo O Da Owhẹ Ẹro

OWARE NỌ U RO WOMA RE ONỌ WHO WO O DA OWHẸ ẸRO

Edọktọ jọ nọ a re se Jessica Koehler o muẹrohọ nọ ahwo nọ umutho eware nọ a wo o rẹ da ẹro ae eva e rẹ mae were. Ọ ta re inọ ahwo otiọye na a rẹ kake re amọfa ihri hi. Oyejabọ nọ ahwo nọ a wo edẹro a gbẹ rọ ruawa tere he na. Uzẹme riẹ họ, ahwo nọ a wo ugho tere he a rrọ usu ahwo nọ eva e rẹ mae were evaọ akpọ na. Maero kọ ahwo nọ a riẹ nọ u wo eware efa nọ i wuzou vi ugho evaọ uzuazọ. Ọjọ họ, eva nọ e rẹ were ohwo nọ ọ tẹ rrọ kugbe ahwo uviuwou riẹ gbe egbẹnyusu riẹ.

OWARE NỌ WHỌ RẸ SAI RU

Whọ rọ uzuazọ ra wawo orọ amọfa ha. Whọ tẹ be hae rọ uzuazọ ra wawo orọ amọfa, bi roro nọ a be reakpọ kuoma, who gbe ti wo edẹro ho. Yọ whọ sai mu ihri họ ẹre dede. U te no ere no, whọ riẹ oghẹrẹ nọ amọfa a bi yeri uzuazọ rai hi. O sae jọnọ ahwo jọ nọ a wo eware buobu na a re esa vọ uzou. Nicole nọ ọ be rria obọ Senegal ọ ta nọ: “U du gwọlọ nọ me re wo eware buobu hu re mẹ tẹ wereva. Umutho eware nọ me wo e tẹ da omẹ ẹro, mẹ sae wereva dede nọ amọfa a fe vi omẹ.”

Dao onana: Kẹnoma kẹ ighe etẹlẹvishọno hayo eria itanẹte nọ a rẹ jọ dhesẹ efe nọ ahwo a wo hayo uzuazọ akpọriọ nọ amọfa a bi yeri.

Hae kẹ uyere. Nọ ohwo ọ tẹ be hai yere enọ i ru ọghọ kẹe, u dhesẹ nọ umutho eware nọ o wo e da riẹ ẹro. Yọ ohwo otiọye na ọ rẹ kaki wo ubiẹro ulogbo ho. Ọzae jọ nọ a re se Roberton nọ ọ rrọ obọ Haiti ọ ta nọ: “Mẹ rẹ romatotọ roro kpahe eware iwoma nọ ahwo a ru kẹ omẹ avọ ahwo uviuwou mẹ. Me ve yere ahwo nọ a ru ọghọ kẹ omẹ na. Me te je wuhrẹ ọmọzae mẹ nọ ọ rrọ ikpe eree re ọ hai yere ohwo nọ ọ kẹ riẹ oware.”

Dao onana: Hai kere emamọ oware kpobi nọ who muẹrohọ evaọ uzuazọ ra fihotọ. O sae jọ oma ra nọ o rrọ sasasa, uviuwou ra nọ u wo okugbe, emamọ egbẹnyusu nọ who wo, makọ ọre nọ o bi lo kẹ omai na.

Ẹsejọ o rẹ jọ bẹbẹ re eware nọ ma wo e da omai ẹro. Rekọ u te oware nọ ma rẹ daoma fihọ! Ma te wo edẹro, eva e te were omai, yọ a sae rọ ugho dẹ evawere he.