ILETA AVỌ IVẸ PITA

1 Saemọn Pita, ọrigbo gbe ukọ Jesu Kristi, ro se enọ i wo ẹrọwọ ọghaghae ọvona nọ ma wo na,* fiki ẹrẹreokie Ọghẹnẹ mai gbe ọrọ Osiwi na Jesu Kristi:

2 Jọ Ọghẹnẹ o dhesẹ uwowou ulogbo riẹ kẹ owhai je ru owhai wo udhedhẹ vi epaọ anwẹdẹ ẹkwoma eriariẹ egbagba+ kpahe Ọghẹnẹ gbe Jesu Olori mai, 3 keme ogaga riẹ o kẹ omai eware kpobi* nọ i re fiobọhọ kẹ omai evaọ uzuazọ je ru omai romakẹ Ọghẹnẹ ẹkwoma eriariẹ egbagba kpahe Ọnọ o se omai+ fiki oruaro gbe ewoma riẹ. 4 Ọ rọ ẹkwoma eware nana ya obọdẹ eyaa eghaghae na kẹ omai,*+ re wha rọ ẹkwoma eware nana wo oma ẹzi wọhọ Ọghẹnẹ,+ keme wha vabọ no ogbekuo nọ ọ rrọ akpọ na no, onọ isiuru iyoma* e rẹ wha ze.

5 Fiki ugogo ẹjiroro nana, wha dawo ẹgba rai kpobi+ re wha fi ewoma ba ẹrọwọ rai,+ wha fi eriariẹ ba ewoma rai,+ 6 wha fi oma-onyẹ ba eriariẹ rai, wha fi ithihakọ ba oma-onyẹ rai,+ wha fi omarọkẹ Ọghẹnẹ ba ithihakọ rai,+ 7 wha fi uyoyou-inievo ba omarọkẹ Ọghẹnẹ rai, wha fi uyoyou ba uyoyou-inievo rai.+ 8 Keme otẹrọnọ eware nana e tẹ rrọ owhai oma jẹ da owhai oma fia, u ti ru nọ wha gbẹ te rọ jọ enọ e siọ iruo ba no ho hayo enọ e be mọ ibi hi+ evaọ eriariẹ egbagba kpahe Olori mai Jesu Kristi.

9 Keme ohwo kpobi nọ eware nana e rrọ oma ha o tuaro, ọ fare aro riẹ re ọ siọ elo ba ẹruẹ,*+ yọ o thọrọ e riẹ ẹro no nọ a ru rie fo no izieraha riẹ+ nọ ọ raha evaọ oke krẹkri nọ u kpemu. 10 Fikiere inievo, wha romatotọ ru eware avọ ọwhọ vi epaọ anwẹdẹ re wha ru use+ gbe ẹsalọ rai muẹro kẹ omarai, keme otẹrọnọ wha tẹ ruabọhọ bi ru eware nana wha ti kie vievie he.+ 11 Uzẹme riẹ họ, enẹ a te rọ kẹ owhai uvẹ obọdẹ* nọ wha te rọ ruọ Uvie ebẹdẹ bẹdẹ+ Olori gbe Osiwi mai, Jesu Kristi.+

12 Fiki ẹjiroro nana, o rrọ omẹ iroro ẹsikpobi nọ mẹ rẹ kareghẹhọ owhai eware nana dede nọ wha riẹ rai jẹ rrọ gaga evaọ uzẹme nọ wha wuhrẹ na. 13 Rekọ mẹ rehọ e riẹ nọ u kiehọ, nọ mẹ gbẹ rrọ uwou-udhu* nana na,+ re mẹ rọ ekareghẹhọ fi ọwhọ họ owhai oma,+ 14 keme mẹ riẹ nọ a ti si uwou-udhu mẹ na no kẹle wọhọ epanọ Olori mai Jesu Kristi o dhesẹ vevẹ kẹ omẹ.+ 15 Me ti ru utho ẹgba mẹ ẹsikpobi, re nọ mẹ tẹ nyavrẹ no, whai ọvo wha vẹ sae kareghẹhọ omarai* eware nana.

16 Orọnikọ iku erue nọ a nabe ma te ma lele ro ru owhai riẹ kpahe ogaga gbe ọzino* Olori mai Jesu Kristi hi, rekọ ma rọ ẹro ruẹ oruaro ulogbo riẹ.+ 17 Keme Ọghẹnẹ Ọsẹ na ọ kẹ riẹ ọghọ gbe oruaro. Onana o via okenọ ọnọ o wo oruaro ulogbo na ọ ta eme nana kẹe* nọ: “Ọnana họ Ọmọzae mẹ, oyoyou mẹ na, ọnọ mẹ omamẹ ọ jẹrehọ.”+ 18 Ẹhẹ, ma yo eme nana nọ i do no obọ odhiwu ze okenọ ma jọ kugbei evaọ obọ ugbehru ọrẹri na.

19 Onana u ru ẹme eruẹaruẹ na mu omai ẹro vi epaọ ọsosuọ, yọ wha be riẹ ru nọ wha be rọ tẹrovi ei wọhọ ukpẹ+ nọ o be jọ oria ebi lo evaọ udu rai (bẹsenọ oke o rẹ ke, esi ohiohiẹ+ ọ vẹ va ze). 20 Keme wha riẹ onana vẹre inọ eruẹaruẹ Ikereakere na ọvuọvo i no iroro obọ ohwo jọ ze he. 21 Keme a rọ ẹkwoma oreva ohwo-akpọ ruẹ eruẹaruẹ evaọ oke ọvo ho,+ rekọ ahwo a ta eme nọ i no obọ Ọghẹnẹ ze wọhọ epanọ ẹzi ọfuafo na ọ kpọ* rai.+

2 Rekọ eruẹaro erue e romavia evaọ udevie ahwo Izrẹl re, wọhọ epanọ iwuhrẹ erue e te jọ udevie rai re na.+ Enana e te lẹlẹ wha itu omohẹriẹ ze rọ raha ẹrọwọ rai, yọ a te tubẹ se olori nọ ọ dẹ rai na dede,+ rọ ere wha ọraha se omarai vẹrẹ vẹrẹ. 2 Ofariẹ, ibuobu i ti lele ai ru uruemu nọ u fo ho nọ a re ru ababọ omovuọ,*+ yọ fiki rai ahwo a te ta eme iyoma kpahe edhere uzẹme na.+ 3 U te no ere no, a te rehọ eme iwhayo fru owhai re avọ uvou-uthei. Rekọ oziẹ nọ a bru kpahe ae anwọ oke krẹkri nọ u kpemu+ o be nya kpẹlẹ kpẹlẹ hẹ, yọ ọraha rai ọ be wezẹ hẹ.+

4 Ababọ avro, Ọghẹnẹ ọ siọ ikọ-odhiwu nọ e raha uzi uye ba ẹkẹ hẹ,+ o gbolo i rai fihọ Tatarọs,*+ yọ ọ rehọ egbregba kare ae fihọ* ebi ọlala be hẹrẹ oziẹobro.+ 5 Yọ ọ siọ akpọ oke anwae uye ba ẹkẹ hẹ,+ rekọ o siwi Noa, ọtausiuwoma ẹrẹreokie,+ avọ imahrẹ efa+ okenọ ọ rehọ owhe ku akpọ ahwo nọ a riẹ Ọghẹnẹ hẹ.+ 6 Ọ rọ ẹkwoma erae nọ ọ rọ mahe ikpewho Sọdọm avọ Gomora muotọ dhesẹ nọ a fo obrukpe,+ rọ ere kẹ oriruo eware nọ e te via kẹ ahwo nọ a riẹ Ọghẹnẹ hẹ.+ 7 O siwi Lọt nọ o kiẹrẹe,+ ọnọ idhọvẹ egaga e jọ oma fiki uruemu nọ u fo ho nọ a re ru ababọ omovuọ* orọ ahwo nọ a jẹ raha izi— 8 keme no ẹdẹ te ẹdẹ, eware iyoma nọ a je ru nọ ọzae okiẹrẹe yena ọ jẹ ruẹ je yo evaọ okenọ ọ jẹ rria udevie rai na e jẹ kẹe uye gaga. 9 Fikiere, Jihova* ọ riẹ epanọ o re ro siwi ahwo nọ a romakẹ Ọghẹnẹ no odawọ,+ rekọ ọ rẹ nyasiọ ahwo nọ a kiẹrẹe he ba re a raha ae* evaọ ẹdẹ oziẹobro,+ 10 maero enọ e rẹ gwọlọ gbe oma amọfa ku+ gbe enọ i re rri udu-esuo vo.+

A rẹ wharo, a te je wo udu ogaga, a rẹ ta eme iyoma kpahe enọ i wo oruaro ababọ ozọ, 11 rekọ ikọ-odhiwu, enọ i wo ẹgba gbe ogaga vi ae dede, a rẹ ta eme ekela ha nọ a tẹ be ta kpahe ae nọ a ru thọ, fiki adhẹẹ nọ a wo kẹ* Jihova.*+ 12 Rekọ ezae nana nọ e wọhọ erao nọ i wo iroro ho nọ oma o rẹ sa ru eware, enọ a yẹ re a mu, a ve kpe ai no na, a rẹ ta eme iyoma kpahe eware nọ a rrọ ogbori rai.+ A te ruẹ uye ọraha nọ edhere omuomu obọrai ọ wha ze, 13 a te ruẹ uye, onọ o te jọ osohwa edhere oyoma obọrai.

Oma o rẹ were ae re a romakẹ uzuazọ akpọriọ,+ makọ evaọ oke uvo. Ahwo nana yọ epe gbe eka-afuẹwẹ evaọ udevie rai, nọ e rẹ rọ evawere* ro wuhrẹ iwuhrẹ eviẹhọ rai okenọ a tẹ rrọ ehaa kugbe owhai.+ 14 Ibiaro rai e vọ avọ ẹnwae-obro,+ yọ a rẹ sai siobọno uzioraha ha, a rẹ viẹ enọ* i dikihẹ ga ha họ. A rehọ uvou-uthei wuhrẹ udu rai no. Emọ nọ a duwu iyei a rrọ. 15 Fikinọ a nyasiọ edhere ọliọliọ na ba no, a su rai thọ no. A lele edhere Belam+ ọmọzae Biọ no, ọnọ o you osohwa eyoma oruo,+ 16 rekọ ọnọ a whọku fikinọ ọ raha uzi.+ Eketekete nọ ọ rẹ ta ẹme he nọ ọ rehọ urru ohwo-akpọ ta ẹme ọ whaha ọruẹaro na oware uyoma nọ ọ jẹ nyai ru.+

17 Ahwo nana yọ iyeri-ame nọ e kpọ no, gbe igrigri nọ ofou ọgaga o bi fou, yọ a ruẹrẹ ebi ọlala nọ o thesiwa họ kẹ ae.+ 18 A rẹ ta ikpeme ifofe. A rẹ ta eme nọ e rẹ kpare isiuru uwo na+ je ru iruemu nọ i fo ho nọ a re ru ababọ omovuọ* rọ lẹliẹ enọ e nwane vabọ obọ no usu ahwo nọ a bi yeri uzuazọ othọthọ.+ 19 A be ya eyaa ufuoma kẹ ae, kpakiyọ ae omarai yọ erigbo ogbekuo;+ keme otẹrọnọ ohwo o te fi ohwo jọ kparobọ, ọyena yọ ọrigbo riẹ.*+ 20 Ababọ avro, otẹrọnọ a va eware ogbekuo akpọ na abọ no+ ẹkwoma eriariẹ egbagba Olori gbe Osiwi na Jesu Kristi, a tẹ be wariẹ duomahọ eware evona je kie kẹ ae, kiyọ uyero rai uwhremu na u yoma kẹ ae vi orọ ọsosuọ no.+ 21 O hae mai woma kẹ ae o hae jọ nọ a riẹ edhere ẹrẹreokie na totọ họ, viukpenọ a rẹ riẹe no a vẹ nyasiọ ujaje ọrẹri nọ a kẹ rai na ba.+ 22 Ẹme itẹ na u gine rugba no evaọ oma rai, inọ: “Arakọ na o zihe nyae re eware nọ ọ kpa ze no, esi nọ a họ fo no na ọ wariẹ nyai duomahọ ọloho no.”+

3 Iyoyou mẹ, onana họ ileta avọ ivẹ nọ me bi kere se owhai na. Yọ wọhọ orọ ọsosuọ na, mẹ be rọ ẹkwoma eware nọ mẹ be kareghẹhọ owhai rọ jaja ẹgba iroro ivevẹ rai vi,+ 2 re wha kareghẹhọ eme* nọ eruẹaro erẹri na e ta evaọ oke nọ u kpemu jegbe ujaje Olori gbe Osiwi na nọ ọ rọ ẹkwoma ikọ rai kẹ owhai. 3 Orọ ọsosuọ kpobi, wha riẹ onana, inọ evaọ edẹ urere na isẹkoko e te romavia nọ i ti se ẹkoko, ru lele isiuru obọrai,+ 4 yọ a be ta nọ: “Kọ ọzino* riẹ nọ a tubẹ ya eyaa riẹ na ọ rrọ?+ Whaọ, no anwọ okenọ esẹ-esẹ mai i ro kie ruọ owezẹ uwhu rite inẹnẹ, eware kpobi e gbẹ rrọ epọvo na nọ e rrọ no emuhọ emama ze.”+

5 Keme a bi keke aro fihọ kpairoro vrẹ uzẹme nana inọ evaọ oke krẹkri nọ u kpemu, idhiwu e jariẹ gbe otọakpọ nọ u dikihẹ kothi kpehru vi ame jẹ rrọ udevie ame ẹkwoma ẹme Ọghẹnẹ;+ 6 yọ ẹkwoma eware yena a rọ raha akpọ oke yena okenọ ame o ku ei.+ 7 Rekọ ẹkwoma ẹme ọvo yena a ro vu idhiwu na gbe otọakpọ nọ e rrọ enẹna wa kẹ erae je bi vu ai wa bọo ẹdẹ ẹdhoguo gbe ẹdẹ nọ a te rọ raha ahwo nọ a riẹ Ọghẹnẹ hẹ.+

8 Rekọ iyoyou, wha jọ onana o thọrọ owhai ẹro ho, inọ ẹdẹ ọvo Jihova* yọ ikpe odu (1,000), yọ ikpe odu ọ wọhọ ẹdẹ ọvo.+ 9 Jihova* ọ be kpẹlẹ obọ evaọ erugba eyaa riẹ hẹ,+ wọhọ epanọ ahwo jọ a bi roro, rekọ o bi wo odiri kẹ owhai keme ọ gwọlọ nọ a raha ohwo ọvo ho rekọ ọ gwọlọ nọ ahwo kpobi a wo uvẹ nọ a re ro kurẹriẹ.+ 10 Rekọ ẹdẹ Jihova*+ ọ te nyaze wọhọ oji,+ nọ idhiwu na e te rọ vrẹ avọ edo ọgaga,+ rekọ ekwakwa nọ e be rrorro gaga na e te ghra no, a vẹ te fere otọakpọ na gbe iruo nọ e rrọ eva riẹ via.+

11 Nọ orọnọ eware nana kpobi e te ghra no evaọ oghẹrẹ nana na, wha roro kpahe oghẹrẹ ahwo nọ u fo nọ wha rẹ jọ. Jọ wha wo uruemu ọrẹri je wobọ evaọ iruẹru omarọkẹ Ọghẹnẹ, 12 nọ wha be hẹrẹ ọzino* ẹdẹ Jihova* je bi woi họ iroro ẹsikpobi na,*+ onọ a te jọ rehọ erae raha idhiwu na,+ ekwakwa na e vẹ te ghra evaọ erri ọgaga na! 13 Rekọ idhiwu ekpokpọ gbe otọakpọ ọkpokpọ e riẹ nọ ma be hẹrẹ wọhọ epaọ eyaa riẹ,+ yọ ẹrẹreokie ọ te jọ eva rai.+

14 Fikiere, iyoyou, nọ wha be hẹrẹ eware nana na, wha dawo ẹgba rai kpobi re ọ ruẹ owhai evaọ ukuhọ riẹ inọ wha kare epe jẹ kare afuẹwẹ je wo udhedhẹ.+ 15 Ofariẹ, wha rehọ odiri Olori mai wọhọ uvẹ nọ a re ro wo esiwo, wọhọ epanọ oniọvo oyoyou mai Pọl o kere se owhai re wọhọ epaọ areghẹ nọ a kẹ riẹ,+ 16 ọ jọ ileta riẹ kpobi ta kpahe eware nana. Rekọ eware jọ e rrọ eva rai nọ e rrọ bẹbẹ re a wo otoriẹ rai, yọ igbori* gbe enọ i dikihẹ ga ha a be gale eware nana uzou vi, wọhọ epanọ a bi ru Ikereakere na nọ i kiọkọ, onọ o te wha ọraha se ae.

17 Fikiere, iyoyou, nọ wha riẹ onana no na, wha yọroma re ahwo nọ a re koko uzi hi a gbẹ rọ oruthọ rai su owhai thọ kugbe ae he, nọ wha gbe ro dikihẹ ga ha.+ 18 Ukpoye, jọ Olori gbe Osiwi mai Jesu Kristi ọ gbẹ hai dhesẹ uwowou ulogbo riẹ kẹ owhai, wha vẹ jẹ hae rro evaọ eriariẹ kpahe iẹe. Jọ oruaro u tei enẹna je rite ebẹdẹ bẹdẹ. Ami.