Jesu Da Lu Emhin Ọhan-ilo Ne Bunbun

Ẹmhọn Agbejele nọnsi Osẹnobulua, ọle Jesu vae bhi ọne otọ nan dọ wewe. Jehova da re ẹlinmhin nọn khiale nin Jesu rẹ lu emhin ọhan-ilo ne bunbun, nin ọle rẹ rẹman ebi Jesu ha lu sade ọle kiẹn Ojie. Ọle da wo ha re egbe daan ẹbho bhi emianmhẹn nọn hi ki rẹ khin nin ele khọnmhọn. Eji ọ hi ki rẹ khin nin ọle diọ i, ẹbho nin egbe bha daan ki ha bu ọle re, sẹyẹ, ọle ki re egbe daan ele. Ene ruẹlo da ha daghe, ene yehọ da ha họn ẹmhọn, ene akhun da ha khian. Ọle da yẹ khu ẹlinmhin-ebe si ẹbho bhi egbe re. Aharẹmiẹn ehehe-ukpọn nọnsọle ele re obọ so, egbe ki wo daan ele. Eji ọ hi ki rẹ khin nin Jesu diọ i, ebho ki ha bu ọle re. Aharẹmiẹn ẹbho bu ọle re bhi ẹghe nin ọle ho nin ọle rẹ ha ribhi ọsọle, ọle i khu ele fia.

Ẹghe ọkpa, ẹbho da mun okpea ọkpa nọn yi akhun vae bhi uwa nin Jesu ha ye. Ọkpakinọn, ranmhude uwedẹ nin ẹbho rẹ manman ha bun bhi ọne uwa, ele bha sabọ nabhọ. Bhiriọ, ele da zẹ uhio ọbhi okhun ọne uwa, yẹ na bhi enin mun ọne okpea bu Jesu. Jesu da taman ọne okpea yọle: ‘Kpanọ mundia, uwẹ ha yẹ ha khian.’ Ọne okpea ki gene kpanọ, ọ da wo han ene ẹbho ilo.

Bhi ẹghe ọbhebhe, beji Jesu sẹbhi agbaẹbho ọkpa, ikpea igbe ne ha khọnmhọn emianmhẹn egbekẹn da na bhi eje reele ha so yọle: ‘Jesu, rẹkpa mhan!’ Bhi ọne ẹghe nin, a i re otọ nin ọria nọn khọnmhọn emianmhẹn egbekẹn rẹ ha sikẹ ẹbho. Jesu ki da taman ene ikpea nin ele ha khian uwa oga. Beji uhi nọnsi Jehova tale, egbe ha daan eria ne khọnmhọn emianmhẹn egbekẹn, ọkhẹke nin ele diọbhi uwa oga. Beji ene ikpea rẹ khian uwa oga, ẹgbe da daan ele bhi uwedẹ. Ẹghe nin ọkpa bhi ẹwẹ ele ki rẹ lẹn ghe egbe daan ọlẹn, ọle da fikie dọ taman Jesu obulu, yẹ ha khuẹnmhẹn Osẹnobulua. Bhi ẹwẹ ene ikpea igbe nan, ọle ọkpa dọ khuẹnmhẹn Jesu.

Okhuo ọkpa nọn mọn da khọnmhọn rẹ na bhi ikpe 12, da wo ha guanọ ọria nọn ha re egbe daan ọlẹn. Ọle da na eji usun ẹbho ye vae bhi ikeke Jesu dọ re obọ so ukpọn nọnsọle. Egbe da wo re osukpa daan ọlẹn. Ọnan ki sunu, Jesu da nọọn yọle: “Họla re obọ so mẹn?” Arẹmiẹn ofẹn wo ha mun ọne okhuo, ọle da yẹ dagbare taman Jesu ghe, ọle nọn. Jesu da ko ọne okhuo udu re, yẹ taman ọlẹn yọle: ‘Ọmọn, ha khian, egbe fu ẹ re.’

Okpea ọkpa natiọle Jairọs da ha bhii Jesu yọle: ‘Vae bhi uwa nọnsẹmhẹn! Ọmokhuo nọnsẹmhẹn manman wo ha khọnmhọn.’ Ọkpakinọn, ọne obhokhan da yu ọkuẹsẹ Jesu sẹbhi uwa nọnsi Jairọs. Ẹghe nin Jesu rẹ sẹbhi enin, ọle da daghe ẹbho ne bunbun ne vae dọ deba ọne azagba-uwa ha lu akhiẹ. Jesu da taman ele yọle: ‘Bha hẹi yẹ viẹ; owe ọne ọmọn gheghe ye.’ Jesu ki ta ọnan fo, ọle da re ọne ọmọn obọ yẹ taman ọlẹn yọle: “Ọmọn, kpanọ!” Ẹjẹje ọne ọmọn da kpanọ. Jesu ki da taman ẹne biẹ ọle nin ele guanọ ebale re nin ọne ọmọn le. Ria ẹmhọn ebi ene biẹ ọne ọmọn ha rẹ ha ghọnghọn yẹ!