Uwa Nọn Yoyo Nan Bọn Bhi Babẹl

Ẹghe nin ọne okpamẹn ki rẹ rọ fo, imikpea nesi Noa da biẹ imọn. Azagba-uwa nọnsele da dọ ha bun ọbhọ rẹ sẹbhọ ghe, ele da dọ ha nyẹnlẹn bhi ije kẹkẹ bhi ọne otọ nan, beji Jehova yọle nin ele lu.

Ọkpakinọn, eso bhi ene azagba-uwa nan bha hẹnmhọn nin Jehova. Ele da yọle: ‘Bha ji mhan bọn agbaẹbho nin mhan da ha nyẹnlẹn. Mhan ki bọn udede uwa nọn manman yoyo, nọn ha tan sẹbhi okhun. Bhiriọ, a ki ha họn ẹmhọn mhan bhi ijerebhe.’

Jehova bha ha ghọnghọn bhi ọne emhin nan nin ele ha lu. Bhiriọ, ọle da re ọkpẹnlẹn ọbhi ọne uwa nin ele rẹ ha bọn. Uwẹ be lẹn ebi ọle rẹ lu ọle yẹ? Ọle da re osukpa lu ọle nin ele ha zẹ urolo kẹkẹ. Ranmhude ọnan, ele bha yẹ ha họn ebi ele taman egbe. Bhiriọ, ele da zobọ bhọ rẹ ha bọn ọne uwa. A da ha tie ọne agbaẹbho nin ele rẹ ha bọn, Babẹl. Ebi a re ọne elin ta hi, “Ozughu.” Bhiriọ, ene ẹbho da kpanọ dọ ha nyẹnlẹn bhi ije kẹkẹ bhi ọne otọ nan. Ọkpakinọn, ele da dọ ha lu emhin ebe bhi ije kẹkẹ nin ele da ha nyẹnlẹn. Ọria be ribhọ bhi ẹwẹ ele nọn sẹyẹ hoẹmhọn Jehova? Mhan dẹ miẹn ọne ewanniẹn bhi uhọnmhọn-ọta nọn ki sẹ ọle egbe.