Ebraham Bi Sera Da Hẹnmhọn Nin Osẹnobulua

Agbaẹbho ọkpa ribhọ natiọle Ọr. Ọne agbaẹbho bha manman ree bhi eji Babẹl ye. Ẹbho ne ribhi enin bha ha ga Jehova, ẹbọ ele wo ha ga. Ọkpakinọn, okpea ọkpa ribhi enin nọn ha ga Jehova. Ebraham hi elin ọlẹn.

Jehova da taman Ebraham yọle: ‘Kpanọ sibhi agbaẹbho nọnsẹ re, sibhi eji ibhio ẹ ye re ha khian agbaẹbho nin mẹn ha rẹman uwẹ.’ Osẹnobulua da ve nanlẹn yọle: ‘Uwẹ dẹ kiẹn udede agbaẹbho, sẹyẹ ranmhude uwẹ, mẹn dẹ lu emhin esili nin ẹbho ne bunbun bhi otọ agbọn rebhe.’

Ebraham bha lẹn eji Jehova je ọle nin ọle ha khian, orẹyiriọ, ọle da mun udu nyan Jehova yẹ hẹnmhọn nanlẹn. Bhiriọ, Ebraham, Sera nin okhuo ọle, Tira nin aba ọle, bi Lọt nin ọmọn ọsi obhio ọle da ne ihẹ nọnsele, yẹ muegbe rẹ khian ọne okhian nọn manman ree.

Ikpe 75 Ebraham ha ye bhi ẹghe nin ọle bi azagba-uwa nọnsọle rẹ sẹbhi ọne agbaẹbho nin Jehova yọle ghe ọle dẹ rẹman ele. Kenan a tie ọne agbaẹbho. Bhi enin, Osẹnobulua da ne Ebraham talọ yẹ ve nanlẹn yọle: ‘Ọne otọ nan rebhe nin uwẹ daghe, mẹn dẹ mun ọlẹn nin imọn nesẹ.’ Ọkpakinọn, Ebraham bi Sera ki dọmanlẹn, sẹyẹ, ele bha ha mhọn ọmọn. Bhiriọ, be Jehova ha ki rẹ mun ọne ive nan nin ọle ve sẹ yẹ?