Jesu Da Wewe Uhọnmhunje Ọsi Agbejele

Beji Jesu mianmẹn fo, ọle da wo munhẹn ha tẹmhọn Osẹnobulua. Ọle da ha yọle: ‘Agbejele nọnsi Osẹnobula sire.’ Etuegbe nesọle da rẹkhan ọlẹn beji ọle rẹ ha tẹmhọn Osẹnobulua bhi Galili bi Judia. Ẹghe nin Jesu rẹ fikiere bhi agbaẹbho nọnsọle nọn yi Nazarẹt, ọle da diọbhi sinagọg. Bhi enin, ọle da tuje ebe nan khili ọsi Ẹzaya a, yẹ si urulu okhun tie ọle dagbare. Ọle da yọle: ‘Jehova re ẹlinmhin nọn khiale nọnsọle nin mẹn, beji mẹn ha da sabọ wewe ọne ọta nọn mhẹn.’ Be ene ẹmhọn nan rẹman? Ọ rẹman ghe arẹmiẹn ẹbho guanọ nin Jesu lu emhin ọhan-ilo kẹkẹ nin ele, emhin kpataki nọn zẹle nan da re ẹlinmhin nọn khiale nanlẹn hi, nin ọle rẹ ha wewe ọne ọta nọn mhẹn. Ọle da taman ene ka ọle ehọ yọle: ‘Ẹlẹnan nian, ọne ọta-akhasẹ nan munsẹ.’

Jesu ki lu ọnin fo, ọle da diọbhi Okpẹdẹ Ọsi Galili. Enin ọle da miẹn ikpea enẹn ne gbe ehẹn, nin ọle rẹ kiẹn edibo nesọle. Ọle da taman ele yọle: ‘Bha rẹkhan mẹn, mẹn ki re ibha ha muno eria beji ibha rẹ muno ehẹn.’ Ene edibo hi, Pita, Andru, Jemis bi Jọni. Ele da wo re ẹjẹje zẹ ehẹn nin ele ha gbe obọ, yẹ rẹkhan ọlẹn. Ele da ha wewe ẹmhọn Agbejele nọnsi Jehova na bhi Galili. Ele da ha tẹmhọn Osẹnobulua bhi sinagọg, bhi eji a da do ẹki, bi bhi ughe. Eji ọ hi ki rẹ khin nin ele diọ i, usun ẹbho ki vẹ rẹkhan ele. A da ha tẹmhọn Jesu bhi ijerebhe rẹ dọ sẹbhi Siria nọn bha sire.

Akizẹbue, Jesu da re ahu nin eso bhi edibo nesọle rẹ ha hinmhin ẹbho yẹ khu ẹlinmhin-ebe si ẹbho bhi egbe re. Edibo nekẹle da yẹ rẹkhan ọlẹn beji ọle rẹ ha tẹmhọn Agbejele rẹ na bhi agbaẹbho rẹ sẹbhi agbaẹbho, bi idunmhun rẹ sẹbhi idunmhun. Ikhuo eso ne ga Osẹnobulua nọnsẹn, da ha gbẹloghe Jesu bi ene rẹkhan ọlẹn. Ikhuo bii Meri Madalin, Joana, Suzana, bi ikhuo ebhebhe.

Jesu ki man edibo nesọle emhin fo, ọle da je ele dagbare nin ele dọ ha tẹmhọn Osẹnobulua. Beji ele rẹ tẹmhọn Osẹnobulua na bhi Galili khian, eria ne bunbun ebhebhe da rẹọbhi ebi ele ha ta, sẹyẹ, ele da mianmẹn. Ene ha ho nin ele kiẹn edibo nesi Jesu wo manman ha bun, rẹ sẹbhọ ghe Jesu da re ele khọkhọ ugbo nin ebi a kọle bhọ wolo, nin ẹghe yẹ sẹ nan rẹ koko. Bhiriọ, ọle da taman ele yọle: ‘Bha bhii Jehova nin ọle je ẹbho re nin ele dọ koko ene emhin nan kọle.’ Akizẹbue, ọle da zẹ itue 70 bhi ẹwẹ edibo nesọle yẹ je ele dagbare eva-eva, nin ele dọ ha tẹmhọn Osẹnobulua bhi Judia. Ele da ha wewe ẹmhọn ọne Agbejele man unan ẹbho rebhe nin ele miẹn. Ene edibo ki fikiere, ọ da wo ha hu ele bhi udu rẹ taman Jesu ebe sunu. Emhin soso i ribhọ nin Esu ha sabọ lu rẹ re ọkpẹnlẹn ọbhi ọne iwẹnna itẹmhọn Osẹnobulua nan.

Jesu da lu ọle beji edibo nesọle ha da yẹ sabọ ha lu ọne iwẹnna kpataki nan sade ọle diọbhi okhun. Ọle da taman ele yọle: ‘Bha wewe ọne ọta nọn mhẹn nan na bhi otọ agbọn rebhe. Bha man ẹbho ọta nọnsi Osẹnobulua, bha ha yẹ gbe ele ruẹ bhi amẹn.’