Ọne Ebe Nan Gbẹn Ọbhi Egbuwa

Akizẹbue, Bẹshaza da kiẹn ojie ọsi Babilọn. Ẹdọkpa, beji ọle ha lu iluemhin bhi ọsasọn, ọle da tie ẹbho kpataki ne bun sẹbhi uli ọkpa bhi ọne agbaẹbho. Ọle da taman eguọmhandia nesọle nin ele ne ene ukpu ọsi golu dagbare, nin Nẹbukadnẹza ne bhi uwa oga nọnsi Jehova. Bẹshaza bi ene ẹbho da re ene ukpu ha da anyọn, yẹ re ogẹn ji osẹ nọnsele. Osukpa, obọ da wo zegbere yẹ munhẹn ha gbẹnẹn emhin ọbhi egbuwa bhi eji ele da ha le ebale. Ebi ọne obọ gbẹn ọbhi egbuwa da wo han ele ilo, sẹyẹ, ele bha lẹn otọle.

Ọnan da wo re ofẹn manman ha mun Bẹshaza. Bhiriọ, ọle da tie ẹbho nesọle ne lu ilọnmhọn idunan yẹ taman ele yọle: ‘Ọria nọn hi ki rẹ khin bhi ẹwẹ bha nọn ha sabọ taman mẹn ebi ene ikpọta nan mundia nan, mẹn ki re ọle kiẹn ọria nọnzi ea nọn mhọn ahu nẹ bhi Babilọn.’ Ọrebhe ne lu ilọnmhọn idunan da wo ha dọnmhegbe nin ele rẹ tare ebi ọ mundia nan, ọkpakinọn, ọ bha fo ele. Inẹn ọnojie ki da dagbare yẹ yọle: ‘Okpea ọkpa ribhọ natiọle Daniẹl, ọle ka ha gbotọ emhin fanọn an man Nẹbukadnẹza. Ọle dẹ sabọ taman uwẹ ebi ene ẹmhọn nan mundia nan.’

A da tie Daniẹl bu ọnojie. Bẹshaza da taman ọlẹn yọle: ‘Uwẹ ha sabọ tie ene ebe nan, yẹ gbotọle fanọn an man mẹn, mẹn ki re ileghe nan re golu lu nin uwẹ, sẹyẹ, mẹn ki re uwẹ kiẹn ọria nọnzi ea nọn mhọn ahu nẹ bhi Babilọn.’ Daniẹl ki da yọle: ‘Mẹn bha guanọ emhin nesẹ, ọkpakinọn, mẹn dẹ taman uwẹ ebi ene ọta nan mundia nan. Aba uwẹ nin Nẹbukadnẹza wo ha tẹngbemun, ọkpakinọn, Jehova da man ọlẹn ebi a rẹ degbere yẹ. Uwẹ lẹn emhin rebhe ne sunu ji aba uwẹ, ọrẹyiriọ, uwẹ bha mun ekpẹn nin Jehova. Uwẹ da dọ re ukpu ọsi golu nan ne re bhi uwa oga nọnsọle rẹ ha da anyọn. Ọnan zẹle nin Osẹnobulua da gbẹn ene ẹmhọn nan: Mini, Mini, Tikẹ, bi Pasin. Ebi ọne ọta nan mundia nan hi, ibhokhan Mẹdis bi ibhokhan Pẹsia dẹ khọn Babilọn miotọ, sẹyẹ, uwẹ i da yẹ ha yi ojie.’

Babilọn wo diabe agbaẹbho nan i da sabọ khọn miotọ. Ogbe ọsi ọne agbaẹbho wo manman ziẹn, sẹyẹ, ẹdẹ nẹga ọle. Sokpan, bhi ọne ukpasọn nin, ibhokhan Mẹdis bi Pẹsia da mun okhọnlẹn bu Babilọn. Sairọs nin Ojie ọsi Pẹsia da dia ọne amẹn diọbhi eji ọbhebhe beji ele ha da sabọ sẹbhi geti ọsi Babilọn. Beji ele sẹbhi enin, ele da kere ghe a tuje ọne geti ọbhi otọ! Ene eyokhọnlẹn da nabhi ọne agbaẹbho, yẹ gbe ojie ọsi Babilọn an. Bhiriọ, Sairọs ki ha gbẹloghe Babilọn.

Beji ọ sẹyẹ ribhi ukpe ọkpa nin Sairọs khọn Babilọn miotọ, ọle da taman ene ẹbho yọle: ‘Jehova taman mẹn ghe nin mẹn kie bọn uwa oga nọnsọle bhi Jerusalẹm. Obhokhan Ju nọn hi ki rẹ khin nọn guanọ nin ọle rẹkpa bhi ọne ẹsọn sabọ rẹ ha khian.’ Beji Jehova ka ta, ene bunbun bhi ibhokhan Ju da fikie ha khian Jerusalẹm beji ikpe 70 ki gbera nan dunmhun ọlẹn an. Sairọs da re ene ukpu nan re golu bi siliva lu bi ene emhin nekẹle rebhe nin Nẹbukadnẹza ne bhi uwa oga nọnsi Jehova fikie ha khian Jerusalẹm. Uwẹ be daghe ebi Jehova rẹ noo Sairọs rẹ rẹkpa ẹbho nesọle yẹ?