Ejele Nan Re Udede Eran Khọkhọ

Bhi asọn ọkpa, Nẹbukadnẹza da bhohiẹ ebhohiẹ nọn re ofẹn mun ọlẹn. Ọle da tie ene ikpea ne wanlan nesọle, nin ele taman ọlẹn ebi ọne ebhohiẹ mundia nan. Ọkpakinọn, ọsoso bhi ẹwẹ ele bha sabọ lu iriọ. Bhiriọ, ọle ki da taman Daniẹl nin ọle taman ọlẹn ebi ọ mundia nan.

Nẹbukadnẹza da taman Daniẹl yọle: ‘Bhi ebhohiẹ nin mẹn bhohiẹ, mẹn da daghe eran. Ọne eran da wo manman tantan rẹ sẹbhọ ghe, ọrebhe bhi ọne otọ nan dẹ sabọ ha daghe ọle. Ebe nesọle da wo mhọn-ose a; ọ da yẹ wo manman mọn ikpẹ. Elanmhẹn da ha kọn bhi otọ ọne eran, sẹyẹ, afianmhẹn da bọn akolo ọbhi ikpabọ ọle. Bhi ọne ẹghe nin, ẹhi ọkpa da na bhi okhun vae. Ọle da reso yọle: “Hian ọne oran fia, gia ikpabọ nesọle kua. Ọkpakinọn, ze ugungunmhun ọlẹn bi iniẹn ọlẹn obọ bhi otọ. Re oze bi emantọn rẹ gbanọ ọlẹn nẹga. Ji ọkhọle nọnsọle fidenọ sibhi ọsi ọria re, yẹ re ọkhọle ọsi elanmhẹn nanlẹn, sẹyẹ, nin ẹghe ihinlọn gbera ọle. Beji a ha da miẹn ghe, ẹbho ne ribhi agbọn ki lẹn ghe, Osẹnobulua hi Ọnọn Gbẹloghe, sẹyẹ ọnọn ghọn ọlẹn, ọle mun ejele nan.” ’

Jehova ki da rẹman Daniẹl ebi ọne ebhohiẹ mundia nan. Ẹghe nin Daniẹl ki rẹ lẹn otọ ebi ọne ebhohiẹ mundia nan, ofẹn da ha mun ọlẹn. Ọle da yọle: ‘Eo ọnojie, ọ ha rẹ ha mhẹn sade eghian nesẹ ọne ebhohiẹ nan rẹso, ọkpakinọn uwẹ ọ rẹso ọnojie. Uwẹ hi ọne eran nan hian fia. A dẹ miẹn uwẹ ejele nọnsẹ, sẹyẹ, uwẹ ki diọbhi ẹwẹ dọ ha le ilunmhun bọsi elanmhẹn ẹwẹ. Ọkpakinọn, ranmhude ọne ẹhi yọle nan ze ọne ugungunmhun-eran bi iniẹn ọlẹn obọ, uwẹ dẹ kie ha yi ojie.’

Ukpe ọkpa ki gbera, Nẹbukadnẹza da ha khian nẹga bhi uwa nọnsọle. Ọle da na bhi enin ha ghe Babilọn. Ọle da yọle: ‘Ghe ọne udede agbaẹbho nan nin mẹn bọnlẹn. Imẹn kpọnọ gbe!’ Beji ọle sẹ yẹ ha talọ, ukpuru da na bhi okhun yọle: ‘Nẹbukadnẹza! Bhi ejayenan nian, a miẹn uwẹ ejele nọnsẹ.’

Bhi ọne ẹghe nin tee, Nẹbukadnẹza da ha mhẹnmhẹn, sẹyẹ ọle da ha lu emhin bọsi elanmhẹn ẹwẹ. Bhiriọ, a da khu ọle sibhi ẹguale nọnsọle re. Ọle da dọ deba elanmhẹn ẹwẹ ha nyẹnlẹn. Eto ọsi Nẹbukadnẹza da wo sọn rẹ sẹbhọ ghe, ọ da diabe igẹn ọsi oghohọn, sẹyẹ, ihiẹn-obọ nesọle da na bọsi ihiẹn ọsi afianmhẹn.

Ikpe ihinlọn ki gbera, egbe da daan Nẹbukadnẹza, sẹyẹ, Jehova da kie re ọle kiẹn ojie ọsi Babilọn. Nẹbukadnẹza da ki yọle: ‘Imẹn gẹn Jehova nin Ojie nọn ribhi okhun. Imẹn ki dọ lẹn nian ghe Jehova hi Ọnọn Gbẹloghe. Ọle hi ọnọn de ẹbho ne mhọn okpẹhio re. Sẹyẹ, ọria nọn hi ki rẹ khin nọn ghọn ọlẹn, ọle mun ejele nan.’