Ele Bha Debhẹre Nin Amanzẹ Ọsi Nẹbukadnẹza

Ẹgheso ki gbera nin Nẹbukadnẹza nin Ojie rẹ bhohiẹ, ọle da re igolu man udede amanzẹ. Ọle da tie ẹbho kpataki rebhe ne ribhi ọne otọ koko bhi odalo ọne amanzẹ. Eji a tiọle Dura ọle da man ọne amanzẹ nan. Ọle da yẹ tie Shẹdrak, Mẹshak, bi Abẹdnigo. Ọne ojie da yọle: ‘Bha ha họn a khue akala bi emhin nekẹle nan rẹ khue illo, bha ha debhẹre nin ọne amanzẹ! Ọria nọn hi ki rẹ khin nọn bha debhẹre, a ki mun ọlẹn fiọbhi ẹkẹ eranlẹn nọn manman to.’ Ene ibhokhan Hibru ea nan dẹ be debhẹre nin ọne amanzẹ, la Jehova ọkpa ele ha ga?

Ọne ojie ki da yọle nan khue ọne illo. Beji ele ha khue ọne illo, ọrebhe da debhẹre ha ga ọne amanzẹ. Ọkpakinọn, Shẹdrak, Mẹshak, bi Abẹdnigo bha lu iriọ. Ikpea eso da daghe ele, bhiriọ, ele da dọ taman ọne ojie yọle: ‘Ene ibhokhan Hibru ea nan bha ka ga amanzẹ nọnsẹ.’ Nẹbukadnẹza da je nan datie ele re. Ele ki vae, ọle da taman ele yọle: ‘Mẹn dẹ re isẹhoa ọbhebhe nin bha rẹ ga ọne amanzẹ. Ibha bha da ga ọle, mẹn ki muno bha ọbhi ẹkẹ eranlẹn nọn manman to. Osẹ soso i ribhọ nọn ha sabọ hinmhin bha bhi obọ mẹn.’ Ele da ki wanniẹn ọne ojie yọle: ‘Eo ọnojie, mhan i guanọ isẹhoa ọbhebhe. Osẹnobulua nọnsẹmhan dẹ sabọ hinmhin mhan. A ha bhọ rẹ miẹn ọle bha hinmhin mhan, mhan i da ga ọne amanzẹ.’

Ẹkẹ da wo manman khọ Nẹbukadnẹza. Ọle da taman ikpea nesọle yọle: ‘Bha manman kuẹ ọbhi ọne eranlẹn; Bha ji ọ re igba ihinlọn ghan gbera beji ọ ka ye khẹ!’ Ọle da ki taman eyokhọnlẹn nesọle yọle: ‘Bha gbanọ ene ikpea nan, bha ha yẹ muno ele fiọbhi ẹkẹ ọne eranlẹn!’ Ọne eranlẹn da wo manman ha to rẹ sẹbhọ ghe, ọ da tuẹ ene eyokhọnlẹn an sẹsẹsẹ bhi ẹghe nin ele rẹ sikẹ ọle. Sokpan, ene ibhokhan Hibru da ha ribhi ẹkẹ ọle. Ẹghe nin Nẹbukadnẹza ki rẹ ghe ẹkẹ ọne eranlẹn, ikpea enẹn ọle ki daghe, ọ i yẹ yi itue ea. Ọnan da re ofẹn mun ọlẹn. Ọle da ki nọọn ene wẹnna nanlẹn yọle: ‘Ọ i be yi itue ea mhan mun fiọbhi ẹkẹ eranlẹn? Itue enẹn mẹn ki daghe, ọkpa bhi ẹwẹ ele wo diabe ẹhi!’

Nẹbukadnẹza da ki khian sikẹ ọne eranlẹn yẹ sotie ele, ọle da yọle: ‘Bha dagbare, ibha nin eguọmhandia nesi Osẹnobulua Nọn Ke Okhun Nẹ!’ Ọ da wo manman han ene ẹbho illo ẹghe nin Shẹdrak, Mẹshak, bi Abẹdnigo rẹ khian dagbare bhi ẹkẹ ọne eranlẹn, sẹyẹ emhin soso bha lu ele. Eranlẹn bha tuẹ egbe nọnsele a, eto nọnsele, bi ukpọn nin ele ne yọ. Ighogho bhọ bha ha ya ele bhi egbe.

Nẹbukadnẹza da yọle: ‘Osẹnobulua ọsi Shẹdrak, Mẹshak, bi Abẹdnigo kpọnọ gbe. Ọle da je ẹhi nọnsọle re nọn dọ hinmhin ele. Osẹ soso i ribhọ nọn diabe Osẹ nọnsele.’

Bọsi ene ibhokhan Hibru, uwẹ be muegbe nin uwẹ rẹ sun rẹkhan Jehova bhi emhin nọn hi ki rẹ khin nọn sunu?