Jehoada Da Re Izebhudu Man

Jezibẹl da ha mhọn ọmokhuo natiọle Atalaya. Ọria ebe ọle yẹ wo khin bii inẹn ọlẹn. Ojie ọsi Juda, ọle Atalaya bọle. Ẹghe nin ọdọ ọle rẹ yu, ọmọn nọnsọle da munhẹn ha gbẹloghe. Ọne ọmọn ki yu, Atalaya da re egbọle kiẹn ojie ọsi Juda. Bhiriọ, ọle da ha dọnmhegbe nin ọle rẹ fuẹn ọrebhe a ne na bhi ulin-uwa ọsi ojie vae. Ọria nọn hi ki rẹ khin nin ojie sẹ ọle bhi egbe, ọle ki gbe ọle a, rẹ dọ sẹbhi eyẹ nesọle. Ọrebhe da wo ha mun ofẹn ọlẹn.

Jehoada nin Ojohẹn bi okhuo ọle nin Jehoshiba wo lẹn ghe emhin ne bha gba, ọle Atalaya a lu. Ele da mun iẹnlẹn nọnsele ọbhi okhẹnan, nin ele da sabọ re eyẹ ọkpa ọsi Atalaya natiọle Jehoash nẹhe. Ẹkẹ uwa oga ele da bẹẹ ọne ọmọn wanre.

Ẹghe nin Jehoash rẹ ha ribhi ikpe ihinlọn, Jehoada da tie ene ekhaẹmhọn bi ene ibhokhan Livai koko, yẹ taman ele yọle: ‘Bha gbega odẹ nan da nabhi uwa oga, bha hẹi ji ọria soso da nabhi ẹkẹ ọle.’ Bhi ọne ẹghe nan, Jehoada da mun ukparu ọsi ojie Jehoash bhi uhọnmhọn, yẹ rẹ ọle kiẹn ojie ọsi Juda. Ibhokhan Juda da reso yọle: ‘Uwẹ dẹ tọ mhan ga ọnojie!’

Ẹghe nin Atalaya nin esọn ki rẹ họn uru ọsi ene ẹbho, ọle da runẹ diọbhi ọne uwa oga. Ọle ki daghe ọne ọria nan wo la re kiẹn ojie, ọle da reso yọle: “Eku khọnan! Eku khọnan!” Ene ekhaẹmhọn da mun ọlẹn yẹ gbe ọle a. Ọkpakinọn, ọne uwedẹ nan nọn i mhẹn nin ọle rẹ lu emhin nin ọle ki man ọne agbaẹbho le ki?

Jehoada da rẹkpa ene ẹbho rẹ deba Jehova ve akovẹn. Ele da ve ghe ele dẹ ha ga Jehova ọkpa. Jehoada da taman ene ẹbho nin ele dunmhun uwa oga ọsi Bel a, yẹ dunmhun ẹbọ ne ribhọ a. Ọle da zẹ ene ohẹn bi ene ibhokhan Livai ne ha wẹnna bhi ẹkẹ ọne uwa oga, beji ẹbho ha da sabọ kie dọ ha ga bhi enin. Ọle da ne ẹbho ọbhi ọne uwa oga nin ele ha gbega ọle, beji a ha da miẹn ghe eria ne bha khia bha nabhọ. Jehoada bi ene ekhaẹmhọn da re Jehoash ha khian ẹgua ọsi ojie yẹ re ọle kiẹn ojie bhi enin. Ibhokhan Juda rebhe da ha ghọnghọn. Ele ki dẹ sabọ ha ga Jehova nian, ele i yẹ da ha ga Bel, sẹyẹ, Atalaya i yẹ ribhọ nọn ha kpokpo ele. Uwẹ be daghe ebi izebhudu nin Jehoada ha mhọnlẹn rẹ rẹkpa ẹbho ne bunbun yẹ?