A Wa Ọne Ejele A

Otọ Izrẹl da wo fure bhi ẹghe nin Solomọn rẹ ha ga Jehova. Ọkpakinọn, Solomọn da dọ ne ikhuo ne bunbun bhi agbaẹbho kẹkẹ. Ẹbọ ene ikhuo nan ga. Khere-khere, Solomọn da ha fidenọ, ọle da dọ deba ene ikhuo ha ga ẹbọ. Ọnan bha ti Jehova bhọ hiehie. Bhiriọ, ọle da taman Solomọn ghe, ọle dẹ wa ugbẹloghe ọsi Izrẹl ọbhi ijanlẹn eva. Ọle ki mun obọ nọn kpọnọ nẹ nin ọguọmhandia nọnsi Solomọn. Sokpan, ulin-uwa ọsi Solomọn ki ha gbẹloghe obọ nọn khere nẹ.

Jehova da re uwedẹ ọbhebhe rẹ re ebi ọle ho nin ọle lu man. Ẹdọkpa, beji Jẹroboam nin ọguọmhandia nọnsi Solomọn ha khian okhian, ọle da miẹn akhasẹ ọkpa natiọle Ahaija. Ahaija da kuọ ukpọn nin ọle yọ ke okhun, ye sọnọ ọle a diọbhi ijanlẹn igbeva. Ọle da taman Jẹroboam ghe, Jehova dẹ mun ugbẹloghe ọsi Izrẹl sibhi ulin-uwa ọsi Solomọn re, yẹ wa ọle a diọbhi obọ eva. Ọle da yẹ taman Jẹroboam nin ọle ne igbe bhi ene ukpọn nin ọle sọnọ a, ranmhude, ọle nin Jẹroboam dẹ gbẹloghe ulin-uwa igbe bhi otọ Izrẹl. Ẹghe nin Solomọn ki rẹ họn ebe sunu, ọle da ha guanọ nin ọle gbe Jẹroboam an. Bhiriọ, Jẹroboam da nẹgbe ha khian otọ Ijipt. Akizẹbue, Solomọn da yu. Ọmọn nọnsọle natiọle Rehoboam da kiẹn ojie. Bhiriọ, ofẹn bha yẹ ha mun Jẹroboam, ọle da fikie vae bhi otọ Izrẹl.

Ene ewanlẹn ne ribhi otọ Izrẹl da taman Rehoboam ghe, ọle ha re obọ esili mun ene ẹbho, ele dẹ wo ha hẹnmhọn nanlẹn. Ọkpakinọn, imọẹ Rehoboam ne yi ibo ọle da taman ọlẹn ghe, ọkhẹke nin ọle re obọ nọn kaka mun ene ẹbho, ghe, nin ọle mun ẹsọn ba ele ẹsọn. Rehoboam da re ehọ ọbhi ebi ibo ọle taman ọlẹn. Ọle da re obọ oya ha mun ene ẹbho, bhiriọ, ele da sọtọ da ọle. Ele da re Jẹroboam kiẹn ojie ọsi ulin-uwa igbe bhi otọ Izrẹl. Ene ulin-uwa igbe nan, ele a ha tiọle ejele ọsi Izrel. Rehoboam da ha gbẹloghe ulin-uwa eva ne kẹre. A da ha tie ele ejele ọsi Juda. Iriọ a rẹ wa agbaẹbho ọsi Izrẹl a.

Jẹroboam bha guanọ nin ẹbho nesọle ha diọbhi Jerusalẹm dọ ha ga Jehova. Bezẹle? Ranmhude Rehoboam hi ọnọn ha gbẹloghe Jerusalẹm. Ofẹn da ha mun ọlẹn ghe, ene ẹbho dẹ fikie bu Rehoboam, yẹ fikekegbe ọle. Bhiriọ, ọle da re igolu man ibhi ẹmena eva. Ọle da taman ẹbho nesọle nin ele ha ga ene amanzẹ ranmhude Jerusalẹm ree gbe nin ele. Bhiriọ, ene ẹbho da dọ ha ga ene ibhi ẹmena nan re igolu man. Iriọ ele rẹ gbo kie fikekegbe Jehova.