Uwa Oga Nan Bọn Nin Jehova

Beji Solomọn kiẹn ojie fo bhi otọ Izrẹl, Jehova da nọọn ọlẹn yọle: ‘Be uwẹ guanọ nin mẹn lu nin uwẹ?’ Solomọn da yọle: ‘Obhokhan mẹn khin, mẹn i sẹ wanlan. Huẹan, re ẹwanlẹn nin mẹn rẹ sabọ dia ẹbho nesẹ.’ Jehova da wanniẹn ọlẹn yọle: ‘Ranmhude ẹwanlẹn uwẹ nọọn bhi obọ nọnsẹmhẹn, mẹn dẹ re uwẹ kiẹn ọnọn wanlan nẹ bhi ọne agbọn nan rebhe. Mẹn dẹ sẹyẹ re ẹfe nin uwẹ. Ahamiẹn uwẹ hẹnmhọn nin mẹn, uwẹ ki manman tọ bhi ọne otọ.’

Bhiriọ, Solomọn da munhẹn ha bọn ọne uwa oga. Ọle da noo igolu, isiliva, eran, bi udo ne mhẹn nẹ rẹ bọn ọlẹn. Ikpea bi ikhuo ne bunbun ne manman guẹ iwẹnna, ele bọn ọne uwa oga. Ikpe ihinlọn ki gbera, a da bọn ọne uwa oga fo, yẹ re ọle guẹ nin Jehova. Eji a da zọese da ha ribhi ọne uwa oga, sẹyẹ, elanmhẹn nan rẹ zọese da ha ribhi uke ọne ukhuo-izọese. Solomọn da diguẹ bhi odalo ọne ukhuo-izọese ha nan erọnmhọn ji Jehova. Ọle da yọle: ‘Eo Jehova, ọne uwa oga nan bha kpọnọ sẹ la mhọn-ose sẹ bii ebi a ha mun nin uwẹ, sokpan huẹan, miẹn oga nọnsẹmhan ọbhi egbe, uwẹ ha yẹ kaehọ erọnmhọn nọnsẹmhan.’ Be Jehova ghe ọne uwa ga bi erọnmhọn nin Solomọn nanlẹn yẹ? Ẹghe nin Solomọn ki rẹ nan erọnmhọn fo, eranlẹn da na bhi okhun vae yẹ tuẹ ọne izọese a. Jehova da miẹn ọne uwa oga ọbhi egbe. Ẹghe nin ibhokhan Izrẹl rẹ daghe ọnan, ele da wo ha ghọnghọn.

A wo hẹnmhọn ẹwanlẹn nọnsi Solomọn nin Ojie bhi otọ Izrẹl rebhe, rẹ dọ sẹbhi agbaẹbho kẹkẹ ne bha sire. Ẹbho da wo ha bu Solomọn re nin ọle rẹkpa ele bhi ọnọghọ nin ele ye. Esọn ọsi Shiba bhọ da yẹ vae dọ re inọnta ne kaka rẹ dọnmhẹn ọlẹn. Ọle ki daghe ebi Solomọn rẹ wanniẹn ọlẹn yẹ, ọle da yọle: ‘Mẹn bha rẹ rẹọbhi ebi ẹbho tale rẹji uwẹ, ọkpakinọn, ẹlẹnan nian, mẹn dọ re ẹlo nọnsẹmhẹn rẹ daghe ọle ghe ẹwanlẹn nọnsẹ bhọ kpọnọ gbera ebi ẹbho ha ta. Jehova nin Osẹnobulua nọnsẹ wo nan erọnmhọn nin uwẹ.’ Iẹnlẹn wo ha mhẹn nin ibhokhan Izrẹl, sẹyẹ, ene ẹbho da wo ha ghọnghọn. Sokpan, emhin dẹ kẹ fidenọ.