Emhin Ebe Nin Devid Nin Ojie Lu

Sọl ki yu, a da re Devid kiẹn ojie. Ikpe 30 ọle ha ye bhi ọne ẹghe nan. Ẹdọkpa, ọle da na bhi okhun uwa nọnsọle daghe okhuo ọkpa nọn mhọn-ose a. Devid da dọ lẹn kere ghe Batshiba a tie ọne okhuo, sẹyẹ, Uraya nin ọkakulo hi ọdọ ọle. Devid da je nan re Batshiba re bhi uwa nọnsọle. Ọle da ne Batshiba nowẹ, bhiriọ, ọle da ha hanmhan. Devid bha ho nan lẹn ebi ọle lu. Bhiriọ, ọle da taman ọwanlẹn ọsi ene eyokhọnlẹn ghe, nin ọle re Uraya bhi eji okhọnlẹn da manman kaka, sẹyẹ, ọle ha siegbe kie bhi eji ọle ye sade ọle lu iriọ fo. A ki gbe Uraya a fo bhi okhọnlẹn, Devid da dọ re Batshiba bhi amhẹn.

Ọkpakinọn, Jehova daghe ene emhin ne i mhẹn nan ne sunu. Bhiriọ, be ọle ki da lu yẹ? Jehova da je Netan nin akhasẹ bu Devid. Netan da taman Devid yọle: ‘Okpea ọkpa da ha ribhọ nọn fe, nọn mhọn ihuan ne bunbun, bi okpea ọkpa nọn bha fe, nọn mhọn obhi ohuan ọkpa. Ọne okpea wo manman hoẹmhọn ọne ohuan. Ọne okpea nọn fe da miẹn ọne okpea nọn bha fe obhi ohuan ọkpa sẹsẹ nin ọle mhọn.’ Devid ki họn ọnan, ẹkẹ da manman khọ ọle, bhiriọ, ọle da yọle: ‘Ọkhẹke nan gbe ọne okpea nọn fe nin an!’ Netan ki da taman Devid yọle: ‘Uwẹ hi ọne okpea nọn fele!’ Bhiriọ, egbe da lọ Devid, sẹyẹ, ọle da taman Netan yọle: ‘Mẹn lu olukhọ da Jehova.’ Ọne emhin ebe nan nin Devid lu da wo manman si ọkakale ji ọle bi azagba-uwa nọnsọle. Jehova da re oya nin Devid, ọkpakinọn, ọle da yẹ ji Devid da sẹyẹ ha nyẹnlẹn ranmhude nin ọle rẹ ta ẹmhọanta, yẹ re idegbere man.

Devid da ha guanọ nin ọle bọn uwa oga nin Jehova, ọkpakinọn, Jehova da yọle ghe Solomọn nin omọn nọnsọle ha bọn ọlẹn. Devid da munhẹn ha ne emhin ọbhi otọ nin Solomọn, sẹyẹ, ọle da yọle: ‘Uwa oga nan ha bọn nin Jehova dẹ manman kpọnọ, sẹyẹ, ọ dẹ ha mhọn-ose. Obhokhan khere Solomọn sẹyẹ wo khin, bhiriọ, mẹn dẹ rẹkpa ọle rẹ koko emhin nan ha rẹ bọn ọne uwa oga ọbhi otọ.’ Devid da re igho nọnsọle rẹ re iyobọ re bhi ọne uwa oga nan ha bọn. Ọle da yẹ guanọ eria ọbhi otọ ne guẹ rẹ miẹnsọn. Ọle da koko golu bi siliva ọbhi otọ, yẹ muno eran sida re bhi agbaẹbho ọsi Taya bi Saidọn. Ọ ki kẹ khere nin Devid ha rẹ yu, ọle da re emhanmhan nan ha rẹ bọn ọne uwa oga nin Solomọn. Ọle da taman Solomọn yọle: ‘Jehova je mẹn nin mẹn gbẹn ene emhin nan ọbhi otọ nin uwẹ. Jehova dẹ rẹkpa uwẹ. Hẹi ji ofẹn ha mun uwẹ. Deziẹn, uwẹ ha yẹ dọ lu ọne iwẹnna.’