Jonatan—Ọmọẹ Ọsaje Bi Ọkpea Nọn Mhọn Izebhudu

Ọmọdiọn ọsi Sọl nin Ojie Jonatan ha khin, ọkakulo nọn mhọn izebhudu ọle yẹ khin. Devid da yọle ghe, Jonatan bhọ tua nẹ oghohọn, yẹ mhọn ahu nẹ oduman. Ẹdọkpa, Jonatan da daghe eyokhọnlẹn ọsi ibhokhan Filistia ne bun sẹbhi 20 bhi okhun oke. Bhiriọ, ọle da taman ọnọn nanlẹn mun emhin okhọn mhọnlẹn yọle: ‘Mhan dẹ mun okhọn bu ele sade Jehova re iyaman nin mhan. Ene eyokhọnlẹn ọsi ibhokhan Filistia ha yọle nin mhan vae, mhan ki lẹnmhin ghe ẹghe sẹle nin mhan ha rẹ dọ khọn ele.’ Ene ibhokhan Filistia da reso yọle: ‘Bha vae bhi okhun oke nin mhan ko khọnlẹn!’ Bhiriọ, ele veva da hẹn ọne oke, yẹ dọ khọn ene eyokhọnlẹn miotọ.

Beji a miẹn ghe Jonatan hi ọmọdiọn ọsi Sọl, ọle ọ rẹ khẹke nọn ha yi ojie sade Sọl yu. Ọkpakinọn, Jonatan lẹnmhin ghe, Devid hi ọria nin Jehova zẹle nọn ha ki ha yi ojie ọsi ibhokhan Izrẹl; ọrẹyiriọ, Jonatan bha ha mhọn ikhu da ọle. Jonatan bi Devid da kiẹn imọẹ ọsaje. Ele da ve nin egbe ghe, ele dẹ ha gbega egbe yẹ khọn nin egbe. Jonatan ki da re ukpọn nọnsọle, agbada, uhẹn, bi ugbakun nọnsọle nin Devid, nin ọle rẹ reman ọle ghe ọmọẹ ọle ọsaje ọle khin.

Ẹghe nin Devid rẹ ha nẹ khian ranmhude Sọl, Jonatan da bu ọle yẹ taman ọlẹn yọle: ‘Ha mhọn izebhudu, uwẹ ha yẹ ziẹn. Jehova zẹ uwẹ nin uwẹ ha yi ojie. Aba mẹn bhọ lẹn ọnan.’ Ọ dẹ be yẹẹ uwẹ rẹ ha mhọn ọmọẹ nọn diabe Jonatan?

Bhi igba ne bunbun, Jonatan da mun iẹnlẹn nọnsọle ọbhi okhẹnan nin ọle rẹ rẹkpa ọmọẹ ọle nin Devid. Ọle lẹnmhin ghe, aba ọle nin Sọl nin Ojie guanọ nin ọle gbe Devid a. Bhiriọ, ọle da taman aba ọle yọle: ‘Emhin ebe ọ da ha khin sade uwẹ gbe Devid a, ranmhude ọle bha lu uwẹ emhin soso.’ Ẹkẹ Jonatan da wo ha khọ Sọl. Ikpe eso ki gbera, Sọl bi Jonatan da yu bhi okhọnlẹn.

Jonatan ki yu fo, Devid da dọ guanọ Mẹfiboshẹt nin ọmọn nọnsi Jonatan. Ẹghe nin Devid ki rẹ miẹn Mẹfiboshẹt, ọle da taman ọlẹn yọle: ‘Ranmhude ọmọẹ esili aba uwẹ ha khin rẹji mẹn, mẹn dẹ gbẹloghe uwẹ bhi ẹdagbọn iẹnlẹn nọnsẹ rebhe. Uwẹ dẹ ha nyẹnlẹn bhi ẹguale nọnsẹmhẹn, yẹ le ebale bhi uke tebu nọnsẹmhẹn.’ Devid bha ye ọmọẹ ọle nin Jonatan a ghẹdẹ.