Jehova Da Re Ahu Nin Samsin

Ene bunbun bhi ẹwẹ ibhokhan Izrẹl da gbo fikie dọ ha ga ẹbọ, bhiriọ, Jehova da re otọ nin ibhokhan Filistia rẹ ha re obọ oya mun ele. Ọrẹyiriọ, ibhokhan Izrẹl eso ribhọ ne sẹyẹ wo hoẹmhọn Jehova. Manoa da yi ọkpa bhi ẹwẹ ele. Ọle bi okhuo ọle bha ha mhọn ọmọn. Ẹdọkpa, Jehova da je ẹhi bu okhuo Manoa. Ọne ẹhi da taman ọlẹn yọle: ‘Uwẹ dẹ biẹ ọmokpea. Ọne ọmọn dẹ hinmhin ibhokhan Izrẹl bhi obọ ibhokhan Filistia. Ọle dẹ ha yi Nazarait.’ Uwẹ be lẹn eria nin ene Nazarait khin? Eguọmhandia kpataki nesi Jehova ele ha khin. Nazarait i gbẹn eto a.

Akizẹbue, okhuo Manoa da biẹ ọmokpea, sẹyẹ, ọle da hẹ ọne ọmọn Samsin. Ẹghe nin Samsin ki rẹ wanre, Jehova da manman re ahu nanlẹn. Ọle da sabọ re obọ ọkhọn-ọkhan gbe oduman an. Ẹghe ribhọ nin Samsin ọkpa rẹ gbono ibhokhan Filistia an ne bun sẹbhi 30. Ẹkẹ Samsin da wo manman ha khọ ibhokhan Filistia, bhiriọ, ele da ha guanọ uwedẹ nin ele ha rẹ gbe Samsin an. Asọn ọkpa, bhi ẹghe nin Samsin rẹ ha wẹ bhi Gaza, ele da dọ mundia khẹ ọle bhi igeti ọsi ọne agbaẹbho beji ele ha da gbe ọle a ọsewewiẹ. Ọkpakinọn, bhi ọsasọn ogiziẹn, Samsin da kpanọ ha khian eji ọne igeti ọsi ọne agbaẹbho ye. Ọle da vu ọne igeti sibhi ọne ogbe re, mun ọlẹn ọbhi ijanbọ ha khian uke oke nọn sikẹ Hibrọn!

Akizẹbue, ibhokhan Filistia da bu Dẹlaila, nin Samsin zẹ ọle ọshọ, yẹ taman ọlẹn yọle: ‘Mhan dẹ re igho isiliva nọn manman kpọnọ nin uwẹ sade uwẹ rẹkpa mhan guanọ otọ ebe re ahu nin Samsin. Mhan ho nin mhan mun ọlẹn ọbhi ighan.’ Dẹlaila da wo ha guanọ ọne igho, bhiriọ, ọle da ka. Bhi ọsi ọhẹnhẹn, Samsin bha ka taman ọlẹn ebe re ahu nanlẹn. Sokpan, ọle bha ji egbe da fu Samsin re. Bhiriọ, Samsin ki da taman ọlẹn ebe re ahu nanlẹn. Samsin da taman ọlẹn yọle: ‘Nazarait mẹn khin. A bha sẹ gbẹn eto nọnsẹmhẹn an ghẹdẹ. A ha gbẹn mẹn eto a, mẹn i yẹ da ha mhọn ahu.’ Samsin wo dobọ nin ọle rẹ taman ọlẹn. Ọ be yi iriọ?

Dẹlaila da re ẹjẹje dọ taman ibhokhan Filistia yọle: ‘Mẹn lẹn ebe re ahu nanlẹn!’ Ọle da ji Samsin da nowẹ bhi uke egbe nọnsọle. Bhiriọ, ọle da tie ọria re nin ọle dọ gbẹn ọlẹn eto a. Dẹlaila da reso yọle: ‘Samsin, ibhokhan Filistia vae.’ Samsin ki riọ bhi owe, ọle bha yẹ ha mhọn ahu. Ene ibhokhan Filistia da mun ọlẹn, gbono ọle ẹlo a, yẹ mun ọlẹn ọbhi ighan.

Ẹdọkpa, ibhokhan Filistia ne bunbun da si koko bhi uwa ẹbọ nọnsele natiọle Degọn. Ele da ha so yọle: ‘Osẹ mhan re Samsin ji mhan. Re ọle dagbare nin mhan re ọle ha zojiẹ.’ Ele da re ọle ọbhi adesẹ ikazi eva ne ribhi ọne uwa, yẹ ha jiẹ ọle. Samsin da ki reso yọle: ‘Eo, Jehova, huẹan re ahu nin mẹn bhi ọne osukpa nan ọkpa.’ Bhi ọne ẹghe nan, eto ọsi Samsin ki wo sọn. Ọle da wo re ahu nọnsọle rebhe rẹ sua ene ikazi ne ribhi ọne uwa. Ọne uwa da siẹn kua. Ọ da gbono ọrebhe ne ribhi ekẹ ọle a, rẹ dọ sẹbhi Samsin.