Ibọkpọ Nan Da Ga Jehova

Ẹghe nin Mozis rẹ ha ribhi Oke ọsi Sanai, Jehova da taman ọlẹn nin ọle bọn ibọkpọ kpataki, nan da ha tiọle ibọkpọ ọsi oga. Enin ibhokhan Izrẹl ha da ha ga ọle. Ele dẹ sabọ ha mun ọne ibọkpọ ọsi oga rẹkhan egbe bhi eji ele hi ki rẹ diọ.

Jehova da taman Mozis yọle: ‘Taman ene ẹbho nin ele ne emhin nin ele mhọn re nan rẹ bọn ọne ibọkpọ ọsi oga.’ Ibhokhan Izrẹl da ne emhin ne bunbun re, emhin bii igolu, siliva, oze, udo ne ghanlẹn, emhin-ehọ, ileghe bi emhin ne dia iriọ. Ele da yẹ ne olu nan rẹ do ukpọn re, linẹn, ohian-elanmhẹn, bi emhin ne bunbun ebhebhe. Ele da wo ha ne emhin re rẹ sẹbhọ ghe, Mozis da taman ele yọle: ‘Ọsẹriọ! Bha hẹi yẹ ne emhin re.’

Ikpea bi ikhuo ne bunbun ne manman guẹ iwẹnna da deba bọn ọne ibọkpọ. Jehova da re ẹwanlẹn nin ele rẹ lu ọne iwẹnna. Eso da ha fi olu, eso da ha do ukpọn, la so ọle. Eso da ha mhanmhan udo, eso da ha re igolu rẹ man emhin yẹ kanọ eran.

Ene ẹbho da bọn ọne ibọkpọ ọsi oga beji Jehova rẹ taman ele. Ele da noo ukpọn nọn mhọn-ose rẹ wa ọne ibọkpọ yi eva. Obọ ọkpa bhọ da ha yi, eje Khiale, obọ nọnkẹle da ha yi, eje Khia Nẹ. Ẹkpẹti ọsi akovẹn nan re eran akesha bi golu lu da ha ribhi eje Khia Nẹ. Ebi a mun orukpa ọi nan re igolu lu, itebu, bi ukhuo-izọese nan da tuẹ emhin nọn viohin an da ha ribhi eje Khiale. Itasa nan re oze lu bi udede ukhuo-izọese da ha ribhi ọne ẹgodo. Ọne ẹkpẹti akovẹn da ha ye ibhokhan Izrẹl re ọne ive nin ele ve, ghe ele dẹ ha hẹnmhọn nin Jehova. Uwẹ be lẹn ebi akovẹn khin? Ive kpataki akovẹn khin.

Jehova da zẹ Erọn bi imọn nesọle nin ele ha lu iwẹnna ohẹn bhi ọne ibọkpọ ọsi oga. Ẹle hi ene gbẹloghe ọne ibọkpọ, sẹyẹ, ele zọese ji Jehova bhi enin. Erọn nin Ojohẹn, ọle ọkpa sabọ nabhi eje Khia Nẹ. Osukpa bhi ukpe ọle rẹ nabhọ. Ọle ha nabhọ, ọle ki zọese ọbhi olukuọ nọnsọle, ọsi azagba-uwa nọnsọle, bi ọsi ibhokhan Izrẹl rebhe.

Ọ ki ribhi ukpe ọkpa nin ele sibhi otọ Ijipt re, ele da bọn ọne ibọkpọ ọsi oga fo. Bhi ejayenan nian, ele ki mhọn eji ele ha da ha ga Jehova.

Jehova da re uyi nọnsọle gue ọne ibọkpọ, sẹyẹ, ọle da lu ọle nin adudu-amẹn ha ribhi okhun ọne ibọkpọ. Ẹghe rebhe nin ọne adudu-amẹn rẹ ha ribhi okhun ọne ibọkpọ, ibhokhan Izrẹl i da sibhi eje ele da mun agọ re. Ọkpakinọn, ọne adudu-amẹn ha ki sibhọ re, ele ki lẹn ghe ẹghe sẹ nin ele rẹ kpanọ. Ele ki banọn ọne ibọkpọ ọsi oga a, yẹ mun rẹkhan egbe rẹkhan ọne adudu-amẹn.