Ive Nin Ibhokhan Izrẹl Ve Nin Jehova

Ọ ki bu uki eva nin ibhokhan Izrẹl sibhi otọ Ijipt re, ele da sẹbhi Oke ọsi Sanai, bhi enin ele da mun agọ. Jehova da datie Mozis ha khian uke oke ọsi Sanai. Bhi enin, Jehova da taman ọlẹn yọle: ‘Imẹn hi ọnọn hinmhin ibhokhan Izrẹl. Ahamiẹn ele hẹnmhọn nin mẹn, yẹ re obọ rẹkhan uhi nesẹmhẹn, mẹn ki re ele kiẹn ẹbho kpataki nesẹmhẹn.’ Mozis da huẹnre bhi ọne oke dọ taman ene ibhokhan Izrẹl ebi Jehova talẹ. Be ele ki rẹ wanniẹn ọlẹn yẹ? Ele da yọle: ‘Mhan dẹ lu emhin rebhe nin Jehova yọle nin mhan lu.’

Mozis da gbo fikie ha khian ọne oke. Bhi enin, Jehova da taman ọlẹn yọle: ‘Mẹn dẹ nin uwẹ talọ iriakhọ. Taman ene ẹbho nin ele hẹi dọnmhọnlẹn vae bhi Oke ọsi Sanai.’ Bhiriọ, Mozis da huẹnre dọ taman ene ibhokhan Izrẹl nin ele muegbe ọbhi otọ ranmhude Jehova ho nin ọle nin ele talọ.

Ọ ki gene ribhi ikpẹdẹ ea, ibhokhan Izrẹl da daghe ayan bi adudu-amẹn nọn bhihi a bhi okhun ọne oke. Sẹyẹ, ele da ha họn ẹmhọn usomhin ọsi avan nọn manman ha de bi usomhin ọsi akala. Jehova da na eranlẹn vae bhi okhun ọne oke. Ofẹn da ha mun ene ibhokhan Izrel, rẹ sẹbhọ ghe ele da ha guọ. Ọne oke rebhe da manman ha mun lueghe, sẹyẹ, ighogho da vuọn ije rebhe. One akala da wo kie manman ha rolo. Ẹghenin, Osẹnobulua da taman ele yọle: ‘Imẹn hi Jehova. Ibha hẹi ga osẹ ọbhebhe.’

Mozis da fikie ha khian okhun ọne oke, bhi enin Jehova da re uhi nanlẹn nọn tẹmhọn ebi ene ẹbho ha rẹ ha ga ọle yẹ, bi ebi ele ha rẹ ha nyẹnlẹn yẹ. Mozis da ki gbẹn ene uhi rebhe ọbhi otọ yẹ tie ọle man ibhokhan Izrẹl. Ele da ve yọle: ‘Mhan dẹ lu emhin rebhe nin Jehova yọle nin mhan lu.’ Ọne ive nan nin ele ve nin Jehova, ele dẹ be mun ọlẹn sẹ?