Ighian Jesu Da Mun Ọlẹn

Jesu bi etuegbe nesọle da rẹkhan Iyala Ọsi Kidrọn ha khian Oke Ọsi Olivi. Ọsasọn ogiziẹn a ha ye bhi ọne ẹghe nan, sẹyẹ, uki da wo manman ha bhala. Ele ki sẹbhi ogba ọsi Gẹtsimani, Jesu da taman ele yọle: “Ibha debhi enan an, ibha ha yẹ ha babegbe.” Jesu ki khian nabhi ọne ogba khere, ọle da de diguẹ. Ranmhude ọbalọ nin ọle ha ye, ọle da nan erọnmhọn ji Jehova yọle: “Ji iho nọnsẹ munsẹ.” Bhi ọne ẹghe nin, Jehova da je ẹhi re nọn dọ re ikoudure nin Jesu. Jesu ki fikie bu ene etuegbe, ọle da kere ghe ele wẹ. Bhiriọ, ọle da taman ele yọle: ‘Bha riọ bhi owe! Ọnan i yi ẹghe nan rẹ wẹ! Ọne ẹghe sẹle nan ha rẹ mun mẹn nin ighian mẹn.’

Ọ bha buegbe, Judas da vae. Usun ẹbho ne muno agbada bi ukpokpo mhọn da rẹkhan ọlẹn. Judas wo lẹn eji ọle ha da miẹn Jesu, ranmhude ọle sẹ ka rẹkhan Jesu diọbhi ọne ogba khẹ. Judas ki ka taman ene eyokhọnlẹn ebi ọle ha lu rẹ rẹman ele ọne Jesu khin. Ọle da wo khian bu Jesu yẹ taman ọlẹn yọle: ‘Ara Ọman-emhin.’ Ọle da yẹ re unun fiofio Jesu. Jesu ki da taman Judas yọle: ‘Uwẹ dọ re unun fiofio mẹn nin uwẹ rẹ mun mẹn khiẹn?’

Jesu da khian bu ene ẹbho yẹ nọọn ele yọle: “Họla bha guanọ?” Ele da yọle: “Jesu nin obhi Nazarẹt.” Jesu da wanniẹn ele yọle: “Imẹn nọn.” Ọle ki ta ọnan, ene ikpea da siegbe re ikeke yẹ deọbhi otọ. Jesu da kie nọọn ele yọle: “Họla bha guanọ?” Ele da yẹ yọle: “Jesu nin obhi Nazarẹt.” Jesu da wanniẹn ele yọle: ‘Imẹn taman ibha ghe imẹn nọn. Bha ji ene ikpea nekẹle nan da ha khian.’

Pita ki lẹn otọ ebe sunu, ọle da yo agbada a rẹ hian ehọ ọsi Makus nin ọguọmhandia ọsi ojohẹn an. Ọkpakinọn, Jesu da re obọ so ọne okpea ehọ, yẹ re egbe daan ọlẹn. Ọle da taman Pita yọle: ‘Re agbada nọnsẹ fikie diọbhi eji uwẹ da re. Uwẹ ha re agbada khọn, a ki yẹ re agbada gbe uwẹ a.’ Ene eyokhọnlẹn da mun Jesu, yẹ gbanọ ọle obọ, bhiriọ, ene etuegbe da nẹgbe. Ene ẹbho da mun Jesu bu Annas nin ohẹn nọn khua. Annas ki nọọn Jesu ọta fo, ọle da je ọle ha khian uwa ọsi Keafas nin Ojohẹn. Ọkpakinọn, be bhọ ki sunu ji ene etuegbe?