Pita Da Sin Ghe Ọle Bha Lẹn Jesu

Ẹghe nin Jesu bi etuegbe nesọle rẹ ha ribhi ọne ugha nọn ribhi okhun uwa, ọle da taman ele yọle: ‘Ibha rebhe dẹ fikekegbe mẹn bhi ọne asọn nan.’ Pita da yọle: ‘Imẹn i da lu iriọ! Aharẹmiẹn enekẹle fikekegbe uwẹ, imẹn i da fikekegbe uwẹ.’ Ọkpakinọn, Jesu da taman Pita yọle: ‘Ọkuẹsẹ ọkpa viẹ, uwẹ dẹ sin igba ea ghe uwẹ bha lẹn mẹn.’

Ẹghe nin ene eyokhọnlẹn rẹ mun Jesu ha khian uwa ọsi Kaefas, ene bunbun bhi etuegbe nesọle da nẹgbe. Ọkpakinọn, eva bhi ene etuegbe da rẹkhan ene usun ẹbho ne mun ọlẹn. Ọkpa bhi ẹwẹ ele da ha yi Pita. Ọle da nabhi ẹgodo nọn ribhi uwa ọsi Kaefas, yẹ ha gha eranlẹn. Obhokhan ọmanmhẹn ọkpa nọn wẹnna bhi ọne uwa da daghe Pita, ọle da yọle: ‘Mẹn lẹn uwẹ! Uwẹ rẹkhan Jesu!’

Pita da yọle: ‘Eye, ọ i yi mẹn! Mẹn bha lẹn ebi uwẹ tẹmhọnlẹn!’ Pita da kpanọ ha khian eji geti ye. Ọ bha buegbe, obhokhan ọmanmhẹn ọbhebhe nọn wẹnna bhi ọne uwa da daghe ọle. Ọle da taman ene usun ẹbho yọle: ‘Ọne okpea nan rẹkhan Jesu khian!’ Pita da yọle: ‘Mẹn bhọ bha lẹn Jesu!’ Sẹyẹ, okpea ọkpa bhi enin da yọle: ‘Ọkpa bhi ẹwẹ ele uwẹ khin! Uwedẹ nin uwẹ rẹ talọ mẹn rẹ lẹn. Uwedẹ nin Jesu nin obhi Galili rẹ talọ uwẹ yẹ rẹ talọ.’ Ọkpakinọn, Pita da vihẹn ọbhọ yọle: ‘Imẹn bha lẹn ọlẹn!’

Bhi ọne ẹghe nin tee, ọkpa da viẹ. Jesu da fiorọ ghe Pita. Ọnan da yẹ Pita ebi Jesu taman ọlẹn re, bhiriọ, ọle da diọbhi olele dọ ha viẹ.

Bhi ọne ẹghe nan, ẹbho ne ko bhi ikotu ọsi Sanhẹdrin da ha gua Jesu ọta bhi unun bhi uwa ọsi Kaefas. Ele bhọ ki mhanmhanlẹn fo nin ele rẹ gbe Jesu a. Ọkpakinọn, ele da ha guanọ emhin ebe nin ele ha yọle ghe Jesu lu, nin ele ha gbe ọle a nan. Sokpan, ele bha miẹn emhin soso. Bhi ọkike ọle, Kaefas da nọọn Jesu yọle: ‘Ọmọn nọnsi Osẹnobulua uwẹ khin?’ Jesu da yọle: ‘Ehe, ọle mẹn khin.’ Kaefas da yọle: ‘Be mhan ha ki gbo ha guanọ ọsali ba? Ọle re unun ji Osẹnobulua!’ Ọrebhe bhi ọne ikotu da re obọ ọbhọ nan rẹ gbe Jesu a. Ele da ha fino Jesu ubi, tuno ẹsẹn nyan ọlẹn, fino ọlẹn emhin, yẹ gue ọle ẹlo. Ele da ha yọle: ‘Ahamiẹn akhasẹ uwẹ khin, taman mhan ọnọn fi uwẹ emhin!’

Ẹdẹ ki we, ele da mun Jesu ha khian Sanhẹdrin yẹ gbo kie nọọn ọlẹn yọle: ‘Ọmọn nọnsi Osẹnobulua uwẹ khin?’ Jesu da wanniẹn ele yọle: ‘Ehe, ọle mẹn khin.’ Bhiriọ, ele da yọle ghe ọle re unun ji Osẹnobulua. Ele ki da mun ọlẹn ha khian ẹgua ọsi Pọntiọs Pailet, nin gọvanọ ọsi Judia. Be ki sunu bhi enin? Bha ji mhan fẹ ọle ghe.