Satọde, Epre 18
Aharẹmiẹn ọria soso bhi ẹwẹ bha lu emhin ebe, mhan mhọn ọnọn ha rẹkpa mhan.—1 Jọni 2:1.
Emhin nọn kokhun nẹ nin mhan ha sabọ zẹ rẹ lu hi, nin mhan rẹ re egbe guẹ nin Jehova, yẹ dọ deba ẹbho nesọle ha ga ọle. Jehova guanọ nin ọrebhe lu iriọ. Bezẹle? Ọle guanọ nin ele deba ọle ha mhọn ikolu, yẹ ha mhọn ọne isẹhoa rẹ nyẹnlẹn bhi ighegheghe. (Deut. 30:19, 20; Gal. 6:7, 8) Ọrẹyiriọ, Jehova i sua ọria soso ọbhọ rẹ dọ ha ga ọle. Ọle re otọ nin ọdeọde rẹ zẹ ebi ọle ha lu. Ọkpakinọn, be ene ewanlẹn ha lu yẹ sade ọria nọn mianmẹn dọ lu emhin ebe nọn manman kaka? Ahamiẹn ọle bha fidenọ, a ki re ọle sibhi agbotu re. (1 Kọr. 5:13) Ọrẹyiriọ, Jehova sẹyẹ wo re ẹlo ọbhọ ghe ọne ọria dẹ fikie bu ọle re. Ọnan bhọ zẹle nin ọle da je Ọmọn nọnsọle re nọn dọ yu nin mhan, beji ọle ha da sabọ ha re emhin ebe ọsi eria ne fidenọ rẹhunmhan ele. Jehova nin Osẹ ọsi oyẹẹ wo guanọ nin eria ne lu olukhọ fidenọ.—Zech. 1:3; Rom 2:4; Jem. 4:8. w24.08 14 ¶1-2
Sọnde, Epre 19
Ahamien uwẹ mhọn ẹwanlẹn bhi ẹkẹ ọkhọle nọnsẹ, ọkhọle nọnsẹmhẹn ki ha ghọnghọn.—Prov. 23:15.
Bhi ẹghe nin Jọni rẹ gbẹn ilẹta nọnzi ea, eria eso da ha man iman-emhin oghoghe bhi agbotu, yẹ si ozughu. Ọrẹyiriọ, eso da yẹ wo ha “khian bhi uwedẹ ẹmhọanta.” Ele da wo ha hẹnmhọn nin Jehova, yẹ “re obọ rẹkhan uhi nin ọle gbe nin mhan.” (2 Jọni 4, 6) Ene Kristiẹn nan da re Jọni bi Jehova manman ha ghọnghọn. (Prov. 27:11) Be imhan miẹn luẹ bhi ọnan? Mhan dẹ miẹn eghọnghọn bhọ sade mhan wo ha sun rẹkhan Jehova. (1 Jọni 5:3) Bhi ọsi ijiẹmhin, ọ re imhan ghọnghọn nin mhan rẹ lẹn ghe emhin nin mhan lu re Jehova ghọnghọn. Ọ re Jehova ghọnghọn sade mhan rẹban ene emhin kẹkẹ ne i mhẹn nin ẹbho lu bhi ọne agbọn nan, bi sade mhan wo ha hẹnmhọn nanlẹn. Ọnan yẹ wo re ene ẹhi ne ribhi okhun ghọnghọn. (Luk 15:10) Mhan rebhe yẹ wo ghọnghọn sade mhan daghe ọle ghe, ibhio mhan sun rẹkhan Jehova. (2 Tẹsẹ. 1:4) Bhi ẹghe nan ha rẹ fuẹn ọne agbọn Esu nan an, ọ dẹ wo manman re mhan ha ghọnghọn nin mhan rẹ zẹ nin mhan rẹ sun rẹkhan Jehova. w24.11 12 ¶17-18
Mọnde, Epre 20
Bha ji mhan ha khu ọbhi ọmhẹn ọsi eria ọbhebhe, ọ iyi ọsi egbe mhan.—1 Kọr. 10:24.
Eka ẹghe ọ ha ree ọkuẹsẹ uwẹ dọ taman ọria ghe uwẹ hoẹmhọn ọlẹn? Uwẹ ha wo kẹ re ẹjẹje nanlẹn talọ, ọle sabọ rẹ ha riale ghe uwẹ bha ria eria nyan ọlẹn fo ọkuẹsẹ uwẹ dọ nanlẹn talọ. (Prov. 29:20) Bhi obọ nọnkẹle, ahamiẹn ọ bue gbe, ọne ọria sabọ rẹ ha riale ghe uwẹ bha lẹn ebi uwẹ guanọ, manman nọn ahamiẹn ọne ọria ki mọn lẹn sẹbhọ ghe ẹmhọn ọlẹn ri uwẹ bhi ọkhọle. (Eccl. 11:4) Ọkuẹsẹ uwẹ dọ ne ọria talọ, hẹi wo ha mhọn ọlẹn bhi ọkhọle ghe uwẹ bi ọne ọria dẹ wo bọ egbe. Ọkpakinọn, ji a miẹn ghe uwẹ muegbe nin uwẹ rẹ re okhuo, yẹ ha mhọn ọlẹn bhi ọkhọle ghe asabọmiẹn ọne ọria dẹ ha yi amhẹn esili rẹji uwẹ. Be ọkhẹke nin uwẹ lu sade uwẹ dọ kere ghe ẹmhọn uwẹ ti ọria bhọ? Ahamiẹn uwẹ bha hoẹmhọn ọne ọria, re uwedẹ nin uwẹ rẹ lu emhin rẹ rẹman ọne ọria ghe ẹmhọn ọlẹn i ri uwẹ bhi ọkhọle. Ọ i da ha yi emhin nọn mhẹn nin uwẹ rẹ re ọria ha riale ghe, ibha dẹ sabọ zẹ egbe ọshọ, sokpan ẹmhọn ọlẹn i ri uwẹ bhi ọkhọle.—Ẹfẹ. 4:25. w24.05 22-23 ¶9-10