ỌTA NIN ELASẸRE NỌỌN
Igboghẹ Be Gene Nọn Nin Ọria Rẹ Re Unun Ha Fiofio Egbe Okpea La Egbe Okhuo ọsi Ọria Ọbhebhe?
Beji U.S. Centers for Disease Control and Prevention rẹman, ene ribhi ikpe 15 rẹ sẹbhi 19 bhi ẹwẹ ẹbho ne bunbun nan nọọn ele ọta rẹji ọne ẹmhọn nan, ele sẹ ka lu ọne igboghe nan khẹ, nin ọria rẹ ha re unun fiofio egbe okpea la egbe okhuo ọsi ọria. Ọria ọkpa natiọle Sharlene Azam nọn gbẹn ebe natiọle Oral Sex Is the New Goodnight Kiss da yọle, “uwẹ ha nọọn usun ibhokhan eso ne bha sẹ wanre sẹbhi ikpe uje rẹji ọne ẹmhọn nan, ele ki yọle ghe ọ iyi emhin ebe. Bhi ọsi ẹmhọanta, ele bhọ ighe ọle bi inegbe-nowẹ hiehie.”
Be uwẹ riale yẹ?
Re ewanniẹn ọbhi ene inọnta nan.
Ọmanmhẹn dẹ be sabọ mun ẹkẹ ranmhude nin ọle rẹ re unun ha fiofio egbe okpea la egbe okhuo ọsi ọria?
Ehe
Eye
Ọria dẹ be sabọ mun emianmhẹn sade ọle re unun fiofio egbe okpea la egbe okhuo ọsi ọria?
Ehe
Eye
Igboghẹ be gene nọn nin ọria rẹ re unun ha fiofio egbe okpea la egbe okhuo ọsi ọria ọbhebhe?
Ehe
Eye
Be bhọ ẹmhọanta nọn ribhọ?
Re ewanniẹn nese rẹ fẹ enan ghe.
Ọmanmhẹn dẹ be sabọ mun ẹkẹ ranmhude nin ọle rẹ re unun ha fiofio egbe okpea la egbe okhuo ọsi ọria?
Ewanniẹn: Eye. Ọnan bhọ hi emhin ọkpa nọn zẹle nin ẹbho da riale ghe, nin ọria rẹ ha re unun fiofio egbe okpea la egbe okhuo ọsi ọria iyi emhin ebe.
Ọria dẹ be sabọ mun emianmhẹn sade ọle re unun fiofio egbe okpea la egbe okhuo ọsi ọria?
Ewanniẹn: Ehe. Ọria nọn re unun fiofio egbe okpea la egbe okhuo ọsi ọria dẹ sabọ mun emianmhẹn ne ebo tiọle hepatitis (A la B), genital warts, gonorrhea, herpes, HIV, bi syphilis.
Igboghẹ be gene nọn nin ọria rẹ re unun ha fiofio egbe okpea la egbe okhuo ọsi ọria ọbhebhe?
Ewanniẹn: Ehe. Ahamiẹn ọria re obọ so egbe okpea la egbe okhuo ọsi ọria, re unun fiofio ọle, ho ọle bhi uhio ọkpu, la ho ọle, igboghe ele rebhe yẹ khin.
Bezẹle nọn da khẹke nin uwẹ lẹn otọle?
Fẹ adia eso ghe bhi Baibo ne rẹkpa mhan rẹ lẹn ebi Osẹnobulua ghe ọle yẹ nin ọria rẹ ha re unun fiofio egbe okpea la egbe okhuo ọsi ọria .
Baibo yọle: ‘Ọnan hi iho nọnsi Osẹnobulua, . . . nin bha re egbe nẹ bhi igboghẹ.’—1 Thessalonians 4:3.
Ọne ukpọta nan zedu ọle diọbhi “igboghẹ” mundia nin uwedẹ nọn hi ki rẹ khin nin ọria rẹ gboghẹ, ahamiẹn ọle bha sẹ bọn ọdọ la re okhuo. Ahamiẹn ọle ho ọria, ọle re unun fiofio egbe okpea la egbe okhuo ọsi ọria, ọle ho ọle bhi uhio ọkpu, la ọle re obọ so egbe okpea la egbe okhuo ọsi ọria, igboghẹ ele rebhe khin. Ọria nọn gboghe dẹ sabọ riia ikolu nin ọle bi Jehova ko mhọnlẹn an, ọ dẹ yẹ sabọ si ọkakale kẹkẹ ji egbe ọle.—1 Peter 3:12.
Baibo yọle: “Ọria nọn hi ki rẹ khin nọn gboghẹ, egbe nọnsọle ọle lu khọlọ.”—1 Corinthians 6:18.
Ọria nọn re unun fiofio egbe okpea la egbe okhuo ọsi ọria dẹ sabọ mun emianmhẹn, ọle dẹ yẹ sabọ riia ikolu nin ọle bi Jehova ko mhọnlẹn an. Sẹyẹ, ọle dẹ sabọ ha ria eria ne bha gba. Ọne ebe natiọle Talking Sex With Your Kids da yọle, “Ẹbho ne ne ẹbho nowẹ ọkuẹsẹ ele bọn ọdọ la re okhuo dẹ sabọ ha kiẹ egbe nin ele rẹ lu iriọ, la ele dẹ sabọ ha riale ghe ọdọ ele la okhuo ele bha hoẹmhọn ele. Iriọ yẹ nọn rẹji uwedẹ nọn hi ki rẹ khin nin ọria rẹ ghoghẹ. Ọbalo nin ọria nọn dọ ne ọria nọn iyi ọdọ ọle la okhuo ọle nowẹ ha miẹn bhi egbe, ọle ọria nọn dọ ghoghẹ bhi uwedẹ nọn hi ki rẹ khin ha yẹ miẹn bhi egbe.”
Baibo yọle: “Imẹn nin Jehova, imẹn hi Osẹnobulua nọnsẹbha, Ọnọn man bha emhin nin bha da miẹn elele.”—Isaiah 48:17.
Uwẹ riale ghe ebi Baibo tale rẹji ẹmhọn inegbe-nowẹ dẹ sabọ rẹkpa ẹ? La uwẹ riale ghe ọ si uwẹ re ikeke rẹ lu ebe ghọn uwẹ? Nin uwẹ rẹ sabọ re ewanniẹn ọbhi ene inọnta nan, ji mhan re ukhuo nin moto na gbera rẹ re ijiẹmhin man. Ukhuo nan ne iyaman kẹkẹ ọi nọn ha sabọ rẹkpa ẹbho ne hẹn moto rẹ lẹn eji ele ha hẹn moto sẹ, ebi ele ha rẹ hẹn moto yẹ, bi ije ọkhẹke nin ele da mundia. Uwẹ be ghe ene iyaman nan bi emhin ne si uwẹ re ikeke rẹ hẹn moto beji ọ ghọn uwẹ? La uwẹ be ghe ele bii emhin ne ha sabọ gbega uwẹ? Be ha sabọ sunu sade uwẹ bi ẹbho nekẹle ne hẹn moto bha rẹ obọ rẹkhan ene iyaman nan?
Uhi kẹkẹ nan ne ọbhi uwedẹ nọn rẹkpa ẹbho ne hẹn moto sabọ rẹ re uwẹ bha ha hẹn moto beji ọ ghọn uwẹ, ele gbega uwẹ. Iriọ yẹ nọn rẹji adia nesi Jehova, ele sabọ si uwẹ re ikeke rẹ lu emhin eso bhi iẹnlẹn, sokpan ele gbega uwẹ.
Iriọ yẹ nọn rẹji adia nesi Osẹnobulua. Uwẹ ha gbobọra ele, uwẹ dẹ miẹn ebe nabhọre nin uwẹ rẹ lu iriọ. (Galatians 6:7) Ọne ebe natiọle Sex Smart yọle, “Uwẹ da munhẹn ha fikeke gbe emhin nin uwẹ rẹọ i bi emhin nin uwẹ lẹnmhin ghe ele khẹke, yẹ munhẹn dọ ha lu emhin nin uwẹ lẹn sẹ ghe ele bha gba, ekpẹn nọn ri uwẹ bhi egbe uwẹ munhẹn ha re fia.” Bhi obọ nọnkẹle, ahamiẹn uwẹ re obọ rẹkhan adia nesi Jehova uwẹ ki ha nyẹn iẹnlẹn esili. Rẹ deba ọnin, uwẹ ki ha mhọn ọkhọle nọn khiale.—1 Peter 3:16.